បុគ្គលិក​បម្រើការងារ​ក្រុមហ៊ុន​ Naga World​ ត្អូញត្អែរថា ​ខ្លួនរួមនឹង​មិត្តរួមការងារ​កំពុងប្រឈម​នឹងការរឹបអូស​ផ្ទះបង់រំលោះ ​ព្រោះក្រុមហ៊ុន​កាត់បន្ថយ​ម៉ោងការងារ​ក្នុងបរិបទ​កូវីដ១៩​ដែលនាំឲ្យ​បាត់បង់​ចំណូលយ៉ាង​ច្រើន។ ​នៅ​ចំពោះ​មុខ​ឧបសគ្គ​នេះ​បុគ្គលិក​រូបនេះ​ត្រៀម​ស្នើ​ការ​អនុគ្រោះ​ជា​ថ្មី​ទៅ​ភាគី​ពាក់ព័ន្ធ ព្រោះ​កន្លង​មក​ទាំងធនាគារ ​និង​ក្រុមហ៊ុនអចលនទ្រព្យខ្លះ​មិន​បាន​យោគយល់​អាធ្យាស្រ័យ​ឡើយ ហើយ​ធនាគារ​មួយ​ចំនួន​ទៀត​បាន​អនុវត្ត​លក្ខខណ្ឌ​អនុគ្រោះ​ដែរ តែ​មាន​លក្ខណៈ​ដាក់​បន្ទុក​បន្ថែម​លើ​បញ្ហា​ជីវភាព​ពួកគេទៅ​វិញ។ បុគ្គលិករូបនេះ ​សង្ឃឹមថា​លក្ខណ្ឌ​អនុគ្រោះថ្មី​ស្នើដោយរដ្ឋាភិបាល​កាលពីថ្មីៗនេះ​ នឹងអាចឲ្យ​ក្រុមហ៊ុន​អចលនទ្រព្យ ​និងធនាគារ​ ផ្តល់ការអនុគ្រោះ​ណាមួយ​ដែលល្អប្រសើរ​ជាងលើកមុន​។