រាប់ចាប់ពី​ព្រឹត្តការណ៍​សហគមន៍២០​មក ក្មេង ចាស់ ប្រុស ស្រី ​បានចូលខ្លួន​ព្យាបាលជំងឺ​កូវីដ១៩​ជាបន្តបន្ទាប់​រហូតដល់​ខ្វះកន្លែង​ព្យាបាល ​ដែលបញ្ហានេះ​បង្ខំឲ្យ​រដ្ឋាភិបាល​ប្រើប្រាស់​ទីតាំង​ឯកជន​មួយចំនួន​សម្រាប់ព្យាបាល​។ ​ចំណែក​អ្នកជំងឺ​កូវីដ១៩​ ភាគច្រើន​សុទ្ធតែ​បង្ហាញ​អារម្មណ៍​ភ័យខ្លាច​ តក់ស្លុត​ រន្ធត់​ មុនចូលខ្លួន​ព្យាបាល​ជំងឺ​កូវីដ១៩​ ដោយគិតថា​ ខ្លាចត្រូវបានគេ​ទុកចោល ​ ទៅហើយ​មិនត្រឡប់​មកផ្ទះវិញ​ជាដើម។​ តែផ្ទុយមកវិញ​អ្នកជំងឺ​កូវីដ១៩​ម្នាក់បានឲ្យដឹងថា ​អារម្មណ៍ទាំងនេះ​ប្រែជាធម្មតា​វិញពេលចូលខ្លួន​ទៅដល់​កន្លែង​ព្យាបាល។​ ធម្មតា​ព្រោះឃើញថា​ អ្នកជំងឺ​កូវីដឯទៀត​មានសកម្មភាព​ធម្មតាដូចជាៈ​ ហាត់ប្រាណ ​វាយសី ​បោះបាល់ ​អាហារ​ហូបចុក​គ្រប់គ្រាន់​ជាដើម។ ​បើតាម​អ្នកជំងឺ​កូវីដ១៩ ​ភាពរឹង​មាំរបស់អ្នក​ជំងឺពិត​រួមចំណែកយ៉ាងសំខាន់​ នៅក្នុងការកាត់បន្ថយ​ភាពនឿយហត់​របស់​ក្រុមគ្រូពេទ្យ​។​