សិស្ស​ក្រីក្រ​មួយ​ចំនួន បាន​បោះបង់ចោល​ឱកាស​សិក្សា​តាម​អនឡាញ​អំឡុង​ពេល​បិទ​សាលា​នៅ​ក្នុងស្ថានភាព​ជំងឺ​កូវីដ១៩នេះ។ ជំនួស​ឲ្យ​ការរៀន​តាម​អនឡាញ​កុមារា​កុមារី​បី​នាក់​បង​ប្អូន​រស់នៅ​ជាមួយជីដូន​ក្នុង​ខេត្ត​សៀមរាប​បាន​ចុះ​ទៅ​រាវ​ខ្ចៅ​និងខ្យង់ ចាប់​ក្ដាម ជញ្ជត់​ត្រី បេះ​ត្រកួន​ព្រលិត​ជាដើម ដើម្បីចិញ្ចឹម​ជីវិត​ប្រចាំ​ថ្ងៃ។ ជីវិត​ប្រចាំ​ថ្ងៃ​របស់​កុមារ​ទាំងបី​ពឹង​អាស្រ័យ​លើ​វាលស្រែ​ដែល​មាន​ចម្ងាយ​រាប់​រយគីឡូម៉ែត្រ​ពី​ផ្ទះ។ កុមារី​ម្នាក់​ក្នុង​ចំណោម​បងប្អូន​ប្រុស​ស្រី​ទាំង​បី​នាក់ ចង់​ឃើញ​ការ​បើក​សាលា​ឡើង​វិញ បើ​សិន​ជា​ការ​ចាក់វ៉ាក់សាំង​ដល់​កុមារ​បាន​ធ្វើ​ដំណើរ​ទៅ​ដល់​ភូមិ​ឋាន​គេ​រស់នៅ ក្នុង​ភូមិ​កន្ត្រក សង្កាត់ស្វាយដង្គំ ក្រុង​សៀមរាប ខេត្ត​សៀមរាប។