El ha dà il maun a dictaturs in Rumenia, ha gì da far cun drogas en Ollanda ed ha passentà la Revoluziun da neglas en il Portugal. Curdin Duriet ha passentà 30 onns en otg differents pajais en l'Europa ed Africa sco consul.

Uschia ha el emprendì d'enconuscher la birocrazia dal sistem communistic e da guardar davos las fatschadas pumpusas da Bucarest. El ha vis baras en ils flums da Lagos, ha emprendì da sa lavar à la franzosa a Lissabon ed ha exportà la tradiziun da far sauna da la Finlanda a Susch. Ses post il pli difficil haja el però gì en Svizra a Berna. La avess el stuì relaschar bler persunal. Ma Curdin Duriet ha chattà in tric per evitar quai.

En quest Profil udin nus be in per da bleras istorgias ed experientschas da sia vita sco biro communal dals Svizzers e Svizras a l'ester. Tranter auter era pertge ch'il program d'autocorrectura sin il computer ha midà ses mintgadi e daco ch'el ha adina profità d'esser in figl da pur.

Sia uffanza ha Marionna Lombriser passentà en il chantun da Berna, a Zweisimmen. Là ha ella – sco tut ils uffants - pudì far la carriera da las maschinas agriculas. Ma avant che pudair ir cun tractor e chargiafain, èn ses geniturs turnads en il Grischun. 

Suenter il Seminari da scolastas e scolasts a Cuira, gist il di ch'ella ha survegnì la novitad d'avair passà l'examen final dal seminari, ha la futura moderatura dad RTR er survegnì la novitad dad esser en speranza. L'emprim mument in schoc da stuair prender ina decisiun co vinavant. Ma suenter er il plaschair da vegnir mamma.

Sch'ina Sursilvana entaupa in Chilen en ina bar a Barcelona è quai l'entschatta d'ina istorgia d'amur.

Dapi 4 onns viva Cornelia Vinzens a Barcelona, nua che ses um maina in'ustaria amez la citad. Ella sezza lavura sco fotografa, architecta d'interiurs e scenografa en Spagna ed en Svizra. Grazia a sia lavur en Svizra sajan els vegnids finanzialmain sur las rundas quest ultim onn da pandemia che saja stà tut auter che simpel.

La commembra dal comité d'organisaziun dal Bikemaraton Parc Naziunal, sa regorda anc bain vid la 10avla ediziun, cura che l'aura aveva sfurzà d'interrumper la cursa.

La data dal Bikemaraton Parc Naziunal è per Chantal Mayor ina da las pli impurtantas en sia agenda. La dunna da 27 onns è da la partida dapi l'emprima ediziun da la cursa da velos e quai en tut differentas funcziuns. Actualmain è ella responsabla per il secretariat da l'eveniment.

Sper la cursa da bike en Engiadina, s'occupa la figlia d'ustiers er en in lavurdi cun eveniments sco managera tar la destinaziun turistica Engiadina Scuol Samignun Val Müstair. Per avair in midament da la lavur en biro ha Chantal Mayor cumenzà ina scolaziun al Plantahof.

Ses pli grond siemi è dentant da surpigliar ina giada l'hotel da famiglia en la, Val S-charl. Numnadamain là nua ch'ella ha sias ragischs e sa senta il pli bain.

Il siemi da Luana Bergamin era adina ina medaglia. Ma la malsogna da Pfeiffer ha franà ella gia baud. Era 20 onns pli tard influenzeschan las consequenzas da la malsogna ses mintgadi. Parter en las forzas, viver da moda sauna e tadlar bain sin il corp fa la dunna da 36 onns da Lai ussa – quai n'era dentant betg adina uschia.

Prestaziun ha ussa per ella in'autra muntada – è dentant anc adina in grond tema. En il «Profil» raquinta ella da la malsogna, e co ella è vegnida en il sport da handicap ed ha manà la delegaziun svizra als gieus paralimpics da Pyeongchang.

La figlia dad Iris Cadalbert è naschida en la 25avla emna. Ella aveva be 700 grams tar la naschientscha. Uschia che Iris Cadalbert aveva fitg blers differents sentiments il medem mument.

«Igl è in schoc, temas, betg savair chapir, speranza – in sammelsuri da sentiments.»

L'emprima giada ha Iris Cadalbert pudì prender sia figlia sin il pèz suenter tschintg dis. In grond spectacul da prender uschè ina poppina pitschna or da l'isoletta.

Creschida si è Anna Mengiardi ad Ardez en Engiadina Bassa. Uss viva e lavura ella ad Ins, in vitg tranter Berna e Neuchatêl. «In pau sco ina randulina sa senta jau schon», di Anna Mengiardi. Ma ad Ins ha ella chattà in'insla per sai. Ella viva en in vitg en il vitg. En 20 chasas d'ina fundaziun vivan artists ed artistas, pedagogas ed artisans che han furmà ina cuminanza libra, mintgin e mintgina cun ses project. Anna Mengiardi ha avert ina scola alternativa, inspirada da la filosofia da Rudolf Steiner e lavura là cun corp ed olma sco mussadra. Ad Ins ha però il teater manà ella, vul dir ses temp sco actura en la cumpagnia Stradini cun quala ella è stada trais stads sin viadi sco nomada artistica. Nus giain en quest Profil a spass cun Anna Mengiardi tras «si'insla» ad Ins e tras differentas staziuns biograficas.

El lavura tar la Polizia chantunala, dentant senza unifurma. Ursus Sonder è il schef logistica ed uschia responsabel per las finanzas, la tecnica, l'informatica – ed er per las unifurmas.

En il Profil guardain nus davos las culissas e vegnin a savair, pertge che lain plascha ad el meglier che fier, schebain ch'el ha passentà sco uffant bler temp en la fuschina da ses bab. Plinavant tradescha el, pertge ch'el sto adina esser en moviment e na sa betg far nagut e tge ch'il «princip da Pareto» ha da far en sia lavur ed en ses temp liber.

«Jau hai adina vulì daventar ina persuna enconuschenta – e tschertgà quella pussaivladad da daventar renumà».

«Mes manaschi puril cun vatgas brinas da tratga è per mai la satisfacziun ch'jau dovrel.» Per Renzo Blumenthal è far il pur insumma insatge impurtant. Cun daventar «Mister Svizra» l'onn 2005 n'è quai betg sa midà, ed il puresser è restà la pli gronda passiun.

«Po esser ch'jau sun restà autentic sco Mister Svizra, gist per questa raschun.» Uschia manegia Renzo Blumenthal ch'el saja ina persuna structurada ed ambiziusa. Ed era 16 onns suenter ch'el è daventà Mister Svizra, ha el anc adina engaschis per differents sponsurs e vala sco ambassadur per questas interpresas. Era sin l'agen manaschi da puresser po el profitar da ses renum, per exempel cun la vendita directa da ses products.

Braschunet da dents, tablettas da malaria e l'apparat da fotografar èn las trais chaussas las pli impurtantas ch'il fotograf da Segl dovra durant ses viadis a l'exteriur sin ils fastizs dals nomads.

I saja meglier da betg far memia blers quitads, avant che partir per in viadi, di Gian Giovanoli. Il figl d'ina famiglia d'hoteliers a Segl, ha ristgà cun 30 onns da far il pass en l'independenza e da metter tut las cartas sin sia passiun: il fotografar.

Sper sias lavurs ch'el expona en sia atgna galaria «L'atelier» a San Murezzan, è el era fascinà da la vita da differents pievels da pasters. Uschia ha l'um da 42 onns visità per exempel ils «Nenets» sin la peninsla Jamal en la Sibiria u er ils Mundari en il Sudan dal Sid.