La vita da Daniela Denoth-Grass sa drizza adina puspè tenor il plan da lavur da ses um che lavura sco guardiaselvaschina.Avant che la famiglia è sa domiciliada a Zernez, ha la dunna da 46 onns manà durant 12 onns l'hotel Il Fuorn – il sulet hotel aifer il territori dal Parc Naziunal. En quel hotel ha ella gia passentà tut sia uffanza.En il Profil mussa Daniela Denoth-Grass co e nua ch'ella chatta lieus da recreaziun ed ella declera pertge ch'ella n'ha betg gronds plans per ir a viagiar.

Oriund da S-chanf maina l'um da 47 onns la praschun Realta dapi questa stad.Sia gronda passiun è l'agricultura. Perquai è Padruot Salzgeber daventà pur, ha lavurà divers onns al Strickhof a Turitg e lura manà passa 15 onns ils champs e la stalla da la praschun da Realta. Dapi l'avust è el il directur da la praschun.En il Profil raquinta el co el è sa vivì en en sia nova funcziun e pertge ch'el è anc adina il pli gugent sin il bain puril. El pussibilitescha dentant era in sguard davos las culissas da la praschun e raquinta per exempel da las sfidas d'ina praschun averta tge che pertutga il commerzi cun drogas.

Il «Miischel dil pèc». uschia numnan ils da Sursaissa Michel Simmen. El è gugent tranter la glieud e giauda las baterladas.Uschia ha el era emprendì rumantsch. Dapi 30 onns abita el cun sia famiglia a Rueun, e la cultura rumantscha è er daventada sia cultura. Per la terza giada fa el part dad in musical a Rueun. Sco uffizial da stumadira e concurs vegn Michel Simmen confruntà cun destins e situaziuns magari cumplitgadas. Gist ses dun da conversar gida el en ses mastergn. En il Profil dat el invista en sia vita.

Varga 30 onns è Werner Degonda da Cumpadials stà guardiaselvaschina sisum la Surselva.Questa primavaira è el ì en pensiun e giauda uss il temp da chatscha senza squitsch e stress. Esser en la natira, observar flora e fauna e dar ina baterlada, quai fa il bab da dus uffants creschids il pli gugent en ses mises entadim la Val Sumvitg.Davart las midadas e las sfidas dals ultims onns e davart muments spezials e decisivs raquinta l'ornitolog passiunà en il Profil.

Prisco Janett da Savognin ha 33 onns e viva ad Engelberg ed en Florida.Prisco Janett da Savognin ha realisà ses siemi american. El porscha vacanzas da pestga cun alloschi en Florida. Cun ses 33 onns fa el ussa quai ch'el ha adina vulì far ed el di da sasez ch'el saja il pli ventiraivel carstgaun. Da quels plaschairs, da la motivaziun e tut las sfidas sin sia via raquinta il giuven Surmiran en il Profil.

Marcus Kobler – alias «Mamut» – lavura e viva cun sia famiglia en l'hotel famigliar a Segl. Ma nua ch'ìgl è necessari da gidar, è l'um da 50 onns adina da la partida.Surtut cura ch'i va per la segirezza è il pumpier dapi 30 onns adina in dals emprims sin il plaz. Uschè è il bab da trais uffants er ì en Bregaglia cun collegas a gidar als da Bondo suenter las malauras. Il pli gugent è l'Engiadinais dentant sut aua a sfunsar.

Ellas tutgan tar la Svizra sco las vatgas, la tschigulatta, las uras ed il chaschiel. Las bancas. Dapi prest 20 onns lavura era Claudio Deplazes (44) en quella branscha.El è docter da l'economia e dapi curt en la direcziun da la Banca chantunala dal Uri.En il Profil raquinta Claudio Deplazes pertge che las filialas da las bancas vegnan a sa midar ils proxims onns, quant fitg che servetschs da telefonin sco Apple Pay pericliteschan las bancas e pertge ch'el ha midà da Zug en il chantun Uri.

«Üna buna, chera duonna – ma üna creppuna e qualvoutas da sgualatter... »Uschia ha il bab dad Uorschla Campell caracterisà sia figlia, cur ch'ella ha preschentà avant 30 onns ses partenari. La biografia musicala dad Uorschla Campell è lura er marcada da vuschs da dunnas, da dunnas schregas che san tge ch'ellas vulan. L'unica excepziun fan ils Boss Bueba ord la juke-box da sia uffanza a Cinuos-chel ed Elvis Presley. En «Mia vita – mia musica» raquinta ella da ses temp sco manadra da champs per uffants da la Belgia en Val Susauna, daco che la Grezia è en sias colurs in'inversiun da l'Engiadina e tgenins cussegls ch'ina buna cussegliadra da professiun duess dar.La musica dad Uorschla Campell:S'Täumli - Boss BuebeFollow me - Amanda LearAre You Lonesome Tonight? (Laughing Version) - Elvis PresleyIts a Man's Man's Man's World - Marla GlenDove sta Zazà - Gabriela FerriTo tango to Nefelis - Charis AlexiouShow City, show Girl - HiromiDär Sohn vum Pfarrär - Sina

Musica è essenzial en la vita da Silvan Gabriel da Breil.Queen ha accumpagnà el tras l'uffanza e cun ils open airs è lura era il hip hop daventà actual. Emprendì ha Silvan Gabriel conditer confisier. L'interess per novas chaussas ha dentant manà el en autras professiuns ed era per il mund enturn. «Jau sun adina a la tschertga da novas aventuras», di l'um che suonda il pli savens ses sentiment dal cor.

«Süls texts da schlagher nu's po propi tadler.»E tuttina chanta Silvio Hunger da Champfèr chanzuns da schlagher e dat era pitschens concerts. Uschia è el durant la stad sin turnea tras las festas dal vitg da las vischnancas da l'Engiadin'Ota.Cumenzà ha questa «carriera» cun ina dumonda da la televisiun svizra al chor La Cumbricula. L'emissiun è dentant vegnida emessa live durant l'avust ed il chor consistiva surtut da magisters ch'èn stads en vacanzas. Uschia ha l'um da 61 onns surpiglià questa incumbensa sulet ed ha chantà «Que sera, sera» da Doris Day.En l'emissiun «Mia vita – mia musica» raquinta Silvio Hunger dal cumenzament difficil en Engiadina sco mat, dals bels temps sin ed a l'ur da la bobera a San Murezzan e dal chant.