Or da trais mais èn daventads passa 10 onns. La Sursilvana pendulescha regularmain tranter la Svizra e la Tansania. Per il mument è ses focus sin sia fatschenta sco planisadra da viadis individuals a Tansania ed a Sansibar. In discurs sur da las sfidas e dal curaschi da suandar l’atgna intuiziun.

L’Africa cun tut sias colurs ha fascinà Romina Casutt oriunda da Falera gia da pitschen ensi. Suenter il studi d’architectura d’interiurs a Lucerna ha ella pachetà sia cofra ed è ida en l’Africa dal Sid per emprender englais. Planisads eran trais mais en la Citad dal Cap. Cura ch’igl è puspè stà temp da turnar a chasa, ha ella decis da restar pli ditg. Quest nov sentiment da vita african ha immediat attratg la giuvna ch'aveva da quel temp 25 onns – ina nova aventura ha uschia entschet. Per pudair finanziar sia vita en il sid è ella adina puspè turnada per intgins mais en Svizra.

Suenter tschintg onns Citad dal Cap, bleras differentas plazzas da lavur, ina relaziun ch’è ida dapart ed in viadi da trais mais tras set pajais africans è Romina Casutt turnada l’onn 2018 enavos en Svizra per puspè fitgar pe sco architecta d’interiurs. Fisicamain era ella en Svizra, il cor è dentant restà en l’Africa. Uss è stà dumandà curaschi. Curaschi da suandar l’atgna intuiziun senza savair nua che la via va. Midar clamada, midar continent. Uschia ha la via manà ella a Daressalam. Dapi set onns viva ella uss en la pli gronda citad da Tansania. Actualmain para ella dad avair chattà ses cletg: planisadra da viadis individuals, cunzunt per giasts da l’Europa. Ina lavur che pussibilitescha da cumbinar omadus munds da Romina Casutt – il svizzer e l’african. L’aventura po damai cuntinuar.