SBS Tigrinya - ኤስ.ቢ.ኤስ ትግርኛ

ሰማዕቲና ሰማዕቲ ሬድዮ ኤስ ቢ ኤስ፡ ልኡኽና ዝሰደደልና ጸብጻብ ኣሎ ኣርእስታቱ ድማ እዚ ዝስዕብዩ

ኣብ መቐለ ምስ ዕጡቓት ኤርትራ ብዝተፈጥረ ምስሕሓብ ሰላማውያን ሰባት ተቐቲሎም።

ኤርትራዊ ናጽነት ፕሬስ ብምጉዕጻጽ ኣብ ቅድሚት ተሰሪዓ።

ኣብ ክልል ቤንሻንጉል ጉሙዝ፣ ኣብ ክልል ደቡብ ብዝተፈጸሙ መጥቃዕትታት ሰላማውያን ሰባት ከም ዝተቐትሉ፣ ከም ዝተሰደዱን ትካላት ከም ዝነደዱን ተገሊጹ።

ኣብ ክልል ኣምሓራ ዞባ ሰሜን ሸዋ ብዝቐነየ ዓሌታዊ ግጭት ሕጹይ መረጻ ኢዜማ ተቐቲሉ።

ትካል ዶብ ኣልቦ ሓካይም ካብ ዓዲግራት ናብ ኣክሱም ዝወስድ ጽርግያ ብምዕጻዉ ኣብ ኣክሱም ኦክስጅን ዝደልዩ ሕሙማት ክበጽሐሎም ከም ዝተጸገመ ገሊጹ።

ንምሉእ ትሕዝቶ ጸብጻብ ኣብዚ ምስማዕ ይከኣል’ዩ፡

ቀዳማይ ሚኒስተር ህንዲ ናሬንድራ ሞዲ ነቲ ኣብ’ታ ሃገር እናገደደ ዝኸደ ቅልውላው ኮቪድ-19 ንምምካት መዕጸውቲ ወይ ሎክዳውን እቲ ናይ መወዳእታ ኣማራጺ ክኸውን ኣለዎ ኢሉ። ህንዲ ልዕሊ 200000 መልከፍታት ኣብ መዓልቲ’ያ ካብ ሚያዝያ 15 ጀሚራ መዓልታዊ ተመዝግብ ዘላ። 

ጎስጎስቲ ኣንጻር ዘቤታዊ ዓመጽ እቶም ኣብ ሓደ ዝምድና ኣካላዊ ጎነጽ ከጋጥም ምዃኑ ዘአንፍቱ ቀንዲ ኣመልከትቲ ዝኾኑ መጻምድትኻ ክትቆጻጸር ናይ ምድላይ ባህርያት ክቕጽዑ ወይ ገበን ክበሃሉ ይጽውዑ ኣለው። እንተኾነ ግን ሰራሕተኛታት ብዝሐባህላዊ ደገፍ ጋጋት ወይ ክፍተታት ኣብ ሕጋጋትን ኣገልግሎታትን ነቶም ኣብ ትሕቲ ግዝያዊ ቪዛታት ዘለው ግዳያት ዝኾኑ መጻእቲ የግድዖም ኣሎ ይብሉ።

ሰማዕትና ሰማዕቲ ሬድዮ ኤስ ቢ ኤስ፡ ሉኡኽና ካብ ኢትዮጵያ ዝለኣኸልና ሓጸርቲ ጸብጻባት ነዞም ዝስዕቡ ኣርእስታት ሒዙ ኣሎ፡ዝርዝሩ ናብ ጸብጻብ ልኡኽና ከብለኩም።

ኣብ ልዕሊ ተወለድቲ ኣምሓራ ዝወርድ መጥቃዕቲ ደው ክብል ዝጠልቡ ሰልፍታት ኣብ ክልል ኣምሓራ ተኻይዶም፣

ማእሰርቲ ተጋሩ ነበርቲ ኣዲስ ኣበባን ከባቢኣን ይቕጽል፣

ሕብረት ኣውሮፓ ኤርትራ ሰራዊታ ካብ ትግራይ ክተውጽእ ደጊሙ ይጽውዕ፣

ኤምባሲ ኣመሪካ ኣብ ኣስመራ ብሰሉስን ረቡዕን ኣብ ዝዘርግሖ ሓበሬታ ሰራዊት ኤርትራን ዕጡቓት ኣምሓራን ክወጹ ሓቲቱ፣

ትካል ህጻናት ሕቡራት ሃገራት ዩኒሴፍ መጻኢ ዕድል ህጻናት ትግራይ ኣብ ዘጸግም ኩነታት ከይወድቕ ኣጠንቂቑ፣

ዝብሉ እዮም ኣብዚ ክስማዕ ይከኣል’ዩ።

ኣብዚ ቕነ፡ ቤት ጽሕፈት መንበረ ፓትርያርክ ኤርትራ፡ ሓሙሻይ ፓትርያርክ ከምዝሸይም መግለጺ ኣውጺኡ ቀኒዩ ኣሎ። እዚ ዝኸውን ዘሎ እቶም ሕጋዊ ሳልሳይ ፓትርያርክ ኣቡነ እንጦንዮስ ብህይወት ኣብ ማሕዩር ኣብዘለዉሉ ብምዃኑ፡ ብዙሓት መራሕቲን ምእመናን ቤተ ክርስትያን ኦርቶዶክስ ኤርትራ ተቓዉሞኦም የስምዑ ኣለዉ። ብዛዕባዚ ጉዳይ ምስ ሊቀ ካህናት ቀሺ ተክለማርያም መርካጽዮንን ሊቀ ህሩያን ቀሺ ተኽለ ተፈሪን ዝገበርናዮ ዘተ ካልኣይን ናይ መወዳእታን  ኣብዚ ቀሪቡ ኣሎ።

ቀንዲ ነጥቢታት ዜና፡

** ኣብ መንጎ ኣውስትራልያን ኒው ዚላንድን እተገብረ ካብ ውሸባ ናጻ ዝዀነ ጕዕዞ ፡ ንኽልቲአን ሃገራት ከም ዘርብሕ ተገሊጹ።

** ኣብ ከተማ ኣዲስ አበባ ናይ ቦምብ መጥቃዕቲ ተፈጺሙ ክልተ ሰብ ቀቲሎም።

** ኣባል ባይቶ ሕቡራት መንግስታት ክሪስ ኮንስ  ናይ ኢትዮጵያ ቀዳማይ ሚንስትር ኣብይ ኣሕመድ ቃል ዝኣተዎ ብዘይምግባሩ ከምዝጎሃየ ገሊጹ።

ህንዲ ፡ ብብዝሒ መልከፍቲ  ኮሮና ቫይረስ  ብዙሕ ዝርጋሐ ዘለዋ ሃገር ኮይና ዘላ ኮይና ፣  ፍልይ ዝበለ "ብድርብ ዝቕየር" ዓልየት ቫይረስውን ተወሪራ ዘላ ሃገር እያ።

ሰብ መዚ ጥዕና ብሪጣንያ ነዚ ሓድሽ ዓልየት ቫይረስ ይመርምሩ ኣለዉ ፣ ኰይኑ ግና ፡ ብዛዕባ እዚ ጕዳይ እዚ ገና ብዙሕ ዘተሓሳስብ መርትዖ ከም ዘየለ ይዛረቡ እዮም ።....................... 

ብተወሳኺ፡ ምንቅስቓስ ብሄረ ኣምሓራ ኣብ ልዕሊ ተወለድቲ ኣምሓራ ዝፍጸም ዘሎ መቕተልቲ ብፍቓድ መንግስቲ ኢትዮጵያ እዩ ኢሉ ከም ዝኣምን ገሊጹ ዝብሉ ሓጸርቲ ጸብጻባት ቀሪቡ ኣሎ።

ሰሙናዊ መደብ ስፖርት (19/04/2021)

* ሃገራዊት ጋንታ ኩዕሶ እግሪ ደቀንስትዮ ኢትዮጵያ ኣንጻር ደቡብ ሱዳናውያን መዛኑአን ክልተ ግዜ ገጢመን ብገፊሕ ተዓዊተን፡

* ኤርትራዊ ተቐዳዳማይ ብሽግለታ መርሃዊ ቅዱስ ኣብ ዙር ቱርኪ ዝነኣድ ሓምሻይ ተርታ ወጺኡ፡

* ኣብ ነዘርላንድስ ኣብ ዝተኻየደ ውድድር ጉያ እግሪ ማራቶን ኤርትራዊ ጎይትኦም ክፍለ ሳልሳይ ብምውጻእ ነሓስ መዳልያ ተሰሊሙ፡

* መርበብ ሓበሬታ ጋንታ ቅድድም ብሽግለታ ትሬክ-ሴጋፍሬዶ ንኣባል ጋንትኣ ዝኾነ ኤርትራዊ ተቐዳዳማይ ኣማኑኤል ገ/ሄር ካብ ኤርትራ ናብ ኤውሮጳ ዝብል ዓምዲ ሂባ ንኣመጻጽእኡን በጺሕዎ ዘለዎ ደረጃን ዝድህስስ ዛንታ ኣብ ገጻታ ኣስፊራ፡

ናይቲ ካብ በረኻታት ትግራይ ምስ ፈደራል መንግስቲ ኢትዮጵያን ሰራዊት ኤርትራን ሚልሺያ ኣምሓራን ዝዋጋእ ዘሎ መንግስቲ ክልል ትግራይ መራሒ ዶ/ር ደብረጽዮን ሎሚ ብተሌፎን ምስ ትግራይ መድያ ሃውስ ቃለ መሕትት ጌሩ ኣሎ። ንሱ  ህዝቢ ትግራይ “ንጸላእትኻ ደምሲስካ መሰል ዓርሰ ዉሳኔኻ ንምትግባር ታሪኽ ዓዲሉካ ኣሎ።” ብምባል ነቲ ዘይተርፍ ዓወት ዝበሎ ቃልሲ ትግራይ ንኽዕወት ዓቕሚ ዘለዎ ኩሉ ክኸትትን ዘየድሊ ሓበሬታ ከይዝርጋሕን ጸዊዑ።

ሰራዊት ኤርትራ ክወጽእ እየ እንተበለኳ ከም ብሓድሽ ንወረራ ይዳሎ ከምዘሎ ብምግላጽ ዶ/ር ደብረጽዮን “እቲ ኣብ ትግራይ ዝረግፍ ዘሎ ሰራዊት ኤርትራ ንኸንቱ ዕላማ ምዃኑ ተረዲኡ፡ ንዳግማይ በደል ከይዳሎን ህዝቢን መንግስቲን ትግራይ ናብ ዝደለዮ ክሰዶ ከምዝኽእል” ብምፍላጥ ኢዱ ክህብ ጻዊዒት ኣቕሪቡ ኣሎ። እዚ ጸብጻብ ኣብ ትግራይ መዲያ ሃውስ ካብ ዝቐረበ ትሕዝቶ ከምዝኾነ ክንገልጽ ንፈቱ።