Sch'el avess surpiglià l'affar dal bab, fiss el oz pur, siemià ha el dentant da daventar skiunz, studegià ha el lura architectura, uss è el artist. 

Patrick Salutt (29 onns) ans piglia cun sai en viadi tras sia biografia da Susch, a Mals, a Vienna, a Bahrain, a Hamburg e puspè enavos en Engiadina, entamez sia exposiziun actuala en la galaria «The Stable» a S-chanf. «Daventar artist è per mai l'unica opziun che fa senn en il mund d'ozendi», di Patrick Salutt. L'art cun sias disciplinas saja in champ uschè vast e liber, che na daventa mai lungurus. Quai era numnadamain il problem tant tar l'ir cun ils skis sco era en l'architectura – memia svelt, memia lungurus. «Sche jau enconusch gia la resposta, perda immediat l'interess.» En quest «Profil» raquinta Patrick Salutt da ses experiments cun colur industriala, pertge ch'el ha prendì cumià da l'architectura e da ses envierns sco magister da skis.