វិបត្តិ​ជំងឺកូវីដ-១៩​នៅតែបង្អាក់​ដំណើរការ​ដល់​សិប្បកម្ម​កែឆ្នៃ​សម្ភារៈ​ប្រើប្រាស់​ពីផ្លែដូង​មួយ​កន្លែង​ក្នុង​ខេត្តតាកែវ។​ សិប្បកម្ម​ដែលមនុស្ស​មួយចំនួន​ធ្លាប់ដឹងលឺ​ថា​បាន​ផលិតសម្ភារៈ​ប្រើប្រាស់​ និង​អាហារ​ចេញ​ពីផ្លែដូង​ និង​បានផ្តល់​ការងារ​ជូនប្រជាពលរដ្ឋ​ក្នុង​តំបន់​ឱ្យ​មានការងារ​ធ្វើជាង​៤០នាក់​ ក៏ដូចជា​បាន​ផ្តល់នូវ​ប្រាក់​ចំណូល​ដោយផ្ទាល់​ និង​ប្រយោល​ផងដែរ។​ ជាក់ស្តែង​បច្ចុប្បន្ន​ សិប្បកម្ម​ដូងតាកែវ​នៅតែបន្ត​ជួបបញ្ហា​បាត់បង់​តម្រូវ​ការ​ពីអតិថិជន​ ក្រោយវត្តមាន​ភ្ញៀវទេសចរ​បរទេស​ត្រូវបានកាត់ផ្តាច់​ស្ទើតែទាំង​ស្រុង​ក្នុងរយៈពេល​ជិត២ឆ្នាំ​មកនេះ។​ បើតាម​ លោកសាត ភារម្យ ​ប្រធាន​គ្រប់គ្រង​ទូទៅ​សិប្បកម្ម​ដូងតាកែវ​បានលើក​ឡើងថា​ បញ្ហាខ្វះ​តម្រូវ​ការ​ផ្គត់ផ្គង់​នៅលើទីផ្សារ​ ត្រូវបាន​បន្ត​អូស​បន្លាយ​បន្ថែម​ទៀត​ ខណៈបញ្ហា​ចោទនេះ​ ក៏បាន​បង្អាក់​មហិច្ឆិតា​ចង់នាំចេញ​ផលិតកម្ម​ពីផ្លែដូង​ទៅកាន់​ទីផ្សារ​អន្តរជាតិ​នាពេល​ខាងមុខ​ផងដែរ។​