ថ្ងៃទី​២៣​តុលា កាន់តែខិតចូលមកដល់ ការប្រកូកប្រកាស​ធ្វើ​បាតុកម្មដើម្បី​រំលឹកខួប​កិច្ចព្រមព្រៀង​សន្តិភាព​ក្រុង​ប៉ារីសដែល​ចុះកាលពី​ថ្ងៃទី ២៣​តុលា ឆ្នាំ ១៩៩១ ក៏មានកាន់តែច្រើន។ នៅប្រទេស​បារាំង នៅ​ក្នុង​ឱកាស​ខួប​លើកទី​៣១​នៃ​កិច្ចព្រមព្រៀង​សន្តិភាពកម្ពុជា ក្រុង​ប៉ារីស សហគមន៍ខ្មែរ និង​អតីតគណបក្ស​ប្រឆាំង ដូចទម្លាប់រាល់ឆ្នាំ នឹងរៀបចំបាតុកម្ម​ចំនួន ២ថ្ងៃជាប់គ្នា​នៅចុងសប្តាហ៍នេះ នៅទីក្រុង​ប៉ារីស។ នៅពេលអតីត​គណបក្ស​សង្រ្គោះជាតិ​នៅ​ប្រទេសបារាំង អំពាវនាវ​ឲ្យមានការចូលរួម​ធ្វើបាតុកម្មទ្រង់ទ្រាយធំនៅ​ទីលាន​រ៉េពុយប្លីក នៅថ្ងៃសៅរ៍​ទី ២២​តុលាស្អែក ​ក្រុមសមាគមខ្មែរ ដែលមាន​ឈ្មោះថា ២៣​តុលា ឯណោះវិញ​នឹង​រៀបចំ​បាតុកម្ម​ នៅទីលាន​ត្រូកាដេរ៉ូ មុខអគារតួអេហ្វែល នៅថ្ងៃ​អាទិត្យ ទី​២៣​តុលា ។