នៅក្នុងនាទីជីវិតជោគជ័យ​របស់វិទ្យុយើងនៅថ្ងៃនេះ សួង សុខភារី សូម​ណែនាំលោកអ្នក​នាងឱ្យ​ស្គាល់ពីដំណើរជីវិត​របស់លោក ស៊ន អេលីត អតីត​កីឡាករ​ជម្រើសជាតិផ្នែក​ប្រដាល់ តៃក្វាន់ដូរ និងវូវីណាមរបស់កម្ពុជា។ ក្រោយ​ចូលនិវត្តន៍ពីអាជីពជាកីឡាករ លោក​អេលីត បច្ចុប្បន្ន​ជាគ្រូបង្វឹក​នៅក្លឹប​ប្រដាល់​នាយកដ្ឋានអង្គរក្ស ហើយ​លោក​ក៏ជាមន្ត្រី​រាជការទទួល​បន្ទុក​ជាអង្គរក្សការពារ​ថ្នាក់​ដឹកនាំជាន់ខ្ពស់ ជាពិសេសគឺគណៈប្រតិភូ​បរទេសធំៗ ដែលមក​បំពេញទស្សនកិច្ចក្នុងប្រទេសកម្ពុជា។ ទម្រាំមានជីវិត​ដូចពេលនេះ លោក​ស៊ន អេលីត ដែលជាបងប្រុស​បង្កើតរបស់​វីរកីឡាការនី ស៊ន សៀវម៉ី និងស៊ន​ ដាវីន ផង ធ្លាប់​ប្រឡូក​ក្នុងដំណើរជីវិត​ជូរចត់​ជាច្រើន។