សាលារាជធានីភ្នំពេញបានចាប់ផ្ដើមរៀបចំតុបតែងសង្រ្កាន្តវត្តភ្នំដើម្បីត្រៀមអបអរពិធីបុណ្យចូលឆ្នាំថ្មីប្រពៃណីជាតិខ្មែរនៅប៉ុន្មានថ្ងៃខាងមុខ។ ការរៀបចំតុបតែងនេះមានការធ្វើប៉ាណូខ្លោងទ្វា ការរៀបចំដាក់គោមអមដោយភ្លើងពណ៌ផ្សេងៗ ព្រមទាំងការដាក់តាំងម្កុដអប្សរាដ៏ធំមួយជាដើម។ លោកស្រី ណម ណារីន ប្រធានមន្ទីរវប្បធម៌រាជធានីភ្នំពេញបានបញ្ជាក់ថា សង្រ្កាន្តវត្តភ្នំឆ្នាំនេះ គឺផ្តោតសំខាន់លើវប្បធម៌ប្រពៃណីខ្មែរជាមួយនឹងការសម្តែងទស្សនីយភាពផ្សេងៗ។ ទន្ទឹមគ្នានេះ អាជ្ញាធរក៏បានត្រៀមកម្លាំងដើម្បីការពារសុវត្ថិភាពជូនភ្ញៀវទេសចរដែរ។