Suid-Afrika is op die randjie om die oorlog teen renosterstropery te verloor. Dit is die mening van Lente Roode, die eienaar van die Hoedspruit Bedreigde Spesies sentrum. Roode het met Spektrum gepraat oor die vrylating van twee renosters, Gertjie en Matimba, wat wees gelaat is sewe jaar terug toe hulle ma's vir hulle horings gestroop is. Roode sê dit was 'n moeilike besluit om die diere weer in die wild vry te laat, wetende dat daar mense is wat hulle wil doodmaak vir hulle horings.

Die Openbare Beskermer, Busisiwe Mkhwebane, sê sy sal die Konstitusionele Hofbeslissing teen haar bestudeer voordat sy volledig daarop reageer. Die Hooggeregshof in Pretoria het vroeër haar verslag oor die Reserwebank en Absa ter syde gestel en haar persoonlik aanspreeklik gehou vir die regskostes. Sy het teen die beslissing geappelleer, maar die Konstitusionele Hof het die hooggeregshof se beslissing gehandhaaf. Mkhwebane sal na raming sowat 900-duisend rand uit haar eie sak moet opdok. Die strafregkenner aan die Universiteit van Pretoria, Llewellyn Curlewis, sê die Konstitusionele Hof se kritiek en oordeel teen Mkhwebane is ernstig van aard.

Die Distrik Ses-werkskomitee het duisende handtekeninge ingesamel in hulle poging om Keizergrachtstraat in Zonnebloem terug na Hanoverstraat te verander. Die voorsitter van die komitee, Shahied Ajam, sê hulle is opgewonde by die vooruitsig en verduidelik dat Hanoverstraat 'n spesiale betekenis het onder mense van die Ses. Annelene Moses berig.

Die vakverbond Fedusa en die United National Transport Union, kortweg UNTU, vra dat president Cyril Ramaphosa die weermag moet ontplooi om die land se spoorinfrastruktuur te beskerm. Fedusa en UNTU hou volgende Vrydag 'n landwye protesakie, om Metrorail se treindienste tot 'n stilstand te bring. UNTU se woordvoerder, Sonja Carstens, sê hulle wil ook hê die president moet die passasierspoordiens as 'n nasionale ramp verklaar.

Die gemeenskap van Platfontein in die Noord-Kaap is ongelukkig oor gesondheidsdienste, en versoek dat daar 'n ambulans by die kliniek moet wees, om in 'n noodgeval te help. Hulle kla ook dat die kliniek vroeër op werksdae sluit. Die meeste van die mense op Platfontein is werkloos en maak staat op staattoelaes. Die !Xun en Khwe gemeenskap sê hoewel Kimberley net 15 kilometer ver is, kan die meeste mense nie vervoergeld bekostig nie. Bert Katjorro berig.

Die Suid-Afrikaanse Vroue Federasie het 'n plasing op sosiale media, wat mense vra om twee jong seuns wat in 'n kinderhuis is, in hulle sorg te neem, veroordeel. Marieta Kemp van die SAVF sê nie net is dit teen die wet om kinders so bloot te stel nie, maar ook onsensitief om kinders soos troeteldiere te probeer weggee.

Die gemeenskap van Centurion, het hande geneem met die nie-regeringsorganisasie FRESH en besighede in die gebied om vir hulle 67 minute vir Mandela Dag die Hennopsrivier skoonmaak projek verder te voer. Sowat 200 mense sal vandag 'n groot gedeelte in en om die rivier in Centurion skoonmaak. Maar hoe help die skoonmaak van die rivier jou medemens? Anton Bailey van BluSwirl verduidelik dat daar plastiek eilande in die rivier dryf wat die drinkwater van mense tot sover as Brits in Noordwes besoedel. Die projek poog om vir hulle skoon drinkwater te verseker.

Die Suid-Afrikaanse Nasionale Weermag is op die rand van 'n ineenstorting weens sy benarde finansiele posisie. Dit was die boodskap van die minister van verdediging, Nosiviwe Mapisa-Nqakula tydens haar begrotingsrede in die parlement. Die militere kenner, Helmut Romer Heitman sê sy is doodreg met haar opsomming en die ergste van alles is, dat haar departement lankal reeds waarsku oor die toedrag van sake.

Die klag van rampokkery teen oudgeneraal Johan Booysen, word teruggetrek, sewe jaar nadat 24 lede van die Valke in Durban gearresteer is. Dit volg na die direkteur van die nasionale vervolgingsgesag, Shamila Batohi, besluit het om nie verder in die saak te vervolg nie. Intussen sluit Booysen 'n stryd van sewe jaar af waarin hy en sy familie soms erg getraumatiseer is. Sy vrou, Letitia, wat meestal in die agtergrond was, gaan die hofsaak bywoon. Sy het in 'n eksklusiewe onderhoud aan Izak du Plessis vertel wat die afgelope sewe jaar aan hulle gesin gedoen het.

Die DA verwelkom die ontplooiing van die Weermag op die Kaapse Vlakte, maar wil weet wat die riglyne hiervoor is. Die DA skaduminister van polisie, Andrew Whitfield sê die parlement moet ingelig word oor die doel van die ontplooiing.