Code For Girls ជាក្លឹបសរសេរកូដតាមប្រព័ន្ធអនឡាញមួយសម្រាប់យុវតី កម្រិតថ្នាក់​វិទ្យាល័យ​ ក្នុង​ការបង្កើតហ្គេម និងវីដេអូខ្លីមានចលនាផ្សេងៗ។ មានអាយុ​១៩ឆ្នាំ​ ស្ថាបនិក​ក្លឹប Code For Girls កញ្ញា​​ រិទ្ធ សុវណ្ណដាលីន យល់ថា វត្តមានស្ត្រីនៅក្នុងវិស័យ​ឌីជីថលនៅមានកម្រិតតិចតួច​នៅឡើយ ខណៈ​ជំនាញនេះក៏នៅតែបន្ត​ទទួលបាននូវផ្នត់គំនិតអវិជ្ជមានពីសង្គម។ បើតាមកញ្ញា​ ​​ រិទ្ធ សុវណ្ណដាលីន ក្លឹបសរសេរកូដនេះ​​នឹងចូលរួមលើកកម្ពស់សមភាពយេនឌ័រក្នុងវិស័យឌីជីថលនៅកម្ពុជាឱ្យ​កាន់តែប្រសើរឡើង​។