Tanong 59. Ngunit anong tulong ang maidudulot nito sa iyo ngayong pinanampalatayanan mo ang lahat ng ito? Kay Cristo ako ay matuwid sa harapan ng Diyos at tagapagmana ng buhay na walang hanggan.

Tanong 60. Paano ka naging matuwid sa harapan ng Diyos? Sa pamamagitan lamang ng tunay na pananampalataya kay Jesu-Cristo. Kahit na ako’y sinusumbatan ng aking budhi na ako’y lubhang nagkasala laban sa lahat ng kautusan ng Diyos, na hindi ko sinunod ang alin man sa mga ito, at na ako’y nakakiling pa rin sa lahat ng kasamaan, ngunit ang Diyos, kahit wala akong angking kabutihan, mula sa biyaya lamang, ay inilagak sa akin ang ganap na kasiyahan, katuwiran at kabanalan ni Cristo. Ipinagkaloob Niya ang mga ito sa akin na parang hindi ako nagkasala ni minsan o nagkaroon man ng anumang kasalanan at parang ako mismo ang gumanap ng lahat ng pagsunod na siyang ginawa ni Cristo para sa akin, kung aking tatanggapin lamang ang kaloob na ito nang may pusong nananampalataya.

Tanong 61. Bakit mo sinasabing ikaw ay matuwid sa pamamagitan lamang ng pananampalataya? Hindi dahil sa ako’y naging katanggap-tanggap sa Diyos bunga ng pagiging karapat-dapat ng aking sariling pananampalataya, sapagkat tanging ang kasiyahan, katuwiran, at kabanalan lamang ni Cristo ang aking katuwiran sa harapan ng Diyos. Maaari kong tanggapin ang katuwirang ito at gawing sariling akin sa pamamagitan lamang ng pananampalataya.

Tanong 57. Anong kaaliwan ang idinudulot sa iyo ng muling pagkabuhay ng katawan? Hindi lamang ang aking kaluluwa matapos ng buhay na ito ang dadalhin kaagad kay Cristo, na siyang aking Ulo, kundi pati itong aking katawan, binuhay sa pamamagitan ng kapangyarihan ni Cristo, ay muling pagsasamahin sa aking kaluluwa at gagawing katulad ng niluwalhating katawan ni Cristo.

Tanong 58. Anong kaaliwan ang iyong natatanggap sa artikulong tungkol sa buhay na walang hanggan? Dahil sa ngayon pa lamang ay nadarama ko na sa aking puso ang panimula ng kagalakang walang hanggan, aking tatamasahin matapos ng buhay na ito ang ganap na kaligayahan na wala pang matang nakakita, o ng taingang nakarinig o nalirip ng puso ninuman—isang kaligayahang magpupuri sa Diyos magpakailanman.

Tanong 54. Ano ang iyong pinaniniwalaan tungkol sa banal na iglesyang laganap? Nananampalataya ako na ang Anak ng Diyos, mula sa kabuuhan ng lahi ng sangkatauhan, mula sa pasimula ng sanlibutan hanggang sa katapusan nito, ay tinitipon, ipinagsasanggalang at iniingatan para sa Kanyang sarili, sa pamamagitan ng Kanyang Espiritu at Salita, sa pagkakaisa ng tunay na pananampalataya, ang iglesyang itinalaga sa buhay na walang hanggan. At ako’y nananampalataya na ako ngayon at magpakailanman ay mamamalaging buhay na kaanib nito.

Tanong 55. Ano ang iyong pagkaunawa sa kapulungan ng mga banal? Una, na ang mga mananampalataya, ang lahat at ang bawat isa, bilang mga kaanib kay Cristo ay may kaugnayan sa Kanya at nakikibahagi sa lahat ng Kanyang kayamanan at mga kaloob. Pangalawa, na ang bawat isa ay may tungkuling gamitin ang kanyang mga kaloob nang walang pag-alinlangan at may kagalakan para sa pakinabang ng iba pang mga kaanib.

Tanong 56. Ano ang iyong pinaniniwalaan tungkol sa kapatawaran ng kasalanan? Nananampalataya ako na ang Diyos, bunga ng pagtubos na ginawa ni Cristo, ay hindi na aalalahanin pa ang aking mga kasalanan, pati na ang pagkamakasalanan ko na siyang kinakailangan kong labanan sa buong buhay ko, sa halip mabiyaya niyang ipinagkakaloob sa akin ang katuwiran ni Cristo nang hindi na ako mahatulan pang maparusahan. Previous studies here - https://bit.ly/HCYouTubePlaylist

Tanong 53. Ano ang iyong pinaniniwalaan tungkol sa Banal na Espiritu? Una, na Siya, kasama ng Ama at ng Anak, ay tunay at walang-pasimula at walang-hanggang Diyos. Pangalawa, Siya ay ibinigay din sa akin, upang sa pamamagitan ng tunay na pananampalataya ako ay makibahagi kay Cristo at sa lahat ng Kaniyang pakinabang, upang aliwin ako, at upang makasama ko magpakailanman.

TANONG 50: Bakit idinugtong ang katagang, “at Siya’y naluklok sa kanang kamay ng Diyos”? Si Cristo’y umakyat sa langit upang doo’y mahayag na Siya ang ulo ng kaniyang iglesiya, na sa pamamagitan Niya ay pinamamahalaan ng Ama ang lahat ng bagay.

TANONG 51: Paanong ang kaluwalhatian ni Cristo na ating Ulo ay nagiging pakinabang sa atin? Una, sa pamamagitan ng Banal na Espiritu ay ibinubuhos Niya ang mga kaloob na mula sa langit sa atin na mga bahagi ng Kanyang katawan. Pangalawa, sa pamamagitan ng Kanyang kapangyarihan ay ipinagtatanggol at iniingatan Niya tayo laban sa lahat ng kaaway.

TANONG 52: Anong kaaliwan ang idinudulot sa iyo na “muling babalik si Cristo upang hatulan ang mga buhay at ang mga patay”? Sa lahat ng aking kapighatian at kahirapan ay tumitingala ako at may pananabik akong naghihintay sa Hukom na mula sa langit na siya rin namang nagpasa-ilalim sa kahatulan ng Diyos alang-alang sa akin, at nag-alis ang lahat ng sumpa mula sa akin. Itatapon Niya ang lahat ng Kanyang kaaway at aking kaaway sa walang hanggang kaparusahan, ngunit ako at ang lahat ng Kanyang hinirang ay daldalhin Niya sa Kanyang presensiya sa kagalakan at kaluwalhatian ng langit.

Question 46. Ano ang iyong ipinapahayag kapag sinasabi mong umakyat siya sa langit? Na si Cristo, sa harapan mismo ng kanyang mga alagad, ay itinaas mula lupa patungo sa langit, at siya’y mananatili doon para sa ating kapakinabangan hanggang sa kanyang muling pagbabalik upang hatulan ang mga buhay at ang mga patay.

Question 47. Kung gayon, ibig bang sabihin nito na hindi natin kasama ngayon si Cristo hanggang sa katapusan ng mundo tulad ng ipinangako niya? Si Cristo ay tunay na tao at tunay na Diyos. Sa kanyang kalikasang tao, si Cristo ay wala ngayon sa mundo, ngunit sa kanyang pagka-Diyos, karingalan, biyaya, at Espiritu siya ay hindi nawawala sa atin.

Question 48. Ngunit hindi ba nahihiwalay sa isa’t-isa ang dalawang kalikasan ni Cristo kung ang kanyang kalikasang tao ay hindi nakakasama ng kanyang pagka-Diyos saan man ito maparoon? Tunay na hindi, sapagkat ang kanyang pagka-Diyos ay walang hangganan at sumasalahat ng dako. Samakatuwid ang Kanyang pagka-Diyos ay mas nakahihigit pa kay sa Kanyang kalikasang tao. Gayun pa man ang Kanyang pagka-Diyos ay nananatiling kasama at kaisa ng Kanyang kalikasang tao.

Question 49. Paano tayo nakikinabang sa pag-akyat ni Cristo sa langit? Una, siya ang ating Tagapagtanggol sa harap ng Kaniyang Ama sa langit. Pangalawa, ang ating katawan ay nasa langit bilang garantiya na Siya, na ating Pinuno, ay dadalhin tayo, na Kaniyang mga kasapi, sa Kaniyang sarili. Pangatlo, sinugo Niya ang Kaniyang Espiritu sa atin bilang isa pang garantiya na sa pamamagitan ng tulong Niya ay palagi nating pagtutuunan ng pansin ang mga bagay na makalangit, kung saan naroroon si Cristo na nakaluklok sa kanang kamay ng Diyos, at hindi ang mga makamundong bagay.

Question 45. Paano ba tayo makikinabang sa muling pagkabuhay ni Cristo? Una, sa pamamagitan ng kanyang muling pagkabuhay ay nagapi niya ang kamatayan, nang sa gayon ay magawa niya tayong makabahagi sa katuwiran na kanyang tinamo para sa atin sa pamamagitan ng kanyang kamatayan. Pangalawa, sa pamamagitan ng kanyang kapangyarihan tayo rin ay ibinangon sa isang bagong buhay. Pangatlo, ang muling pagkabuhay ni Cristo ay isang tiyak na pangako sa atin ng ating maluwalhating muling pagkabuhay.

Question 40. Bakit kinakailangang magpakumbaba pa si Cristo hanggang kamatayan? Sapagkat ito ang hinihingi ng katarungan at katotohanan ng Diyos. Ang bayad-pinsala para sa ating mga kasalanan ay hindi magagawa sa ibang paraan maliban sa kamatayan ng Anak ng Diyos.

Question 41. Bakit Siya inilibing? Ang paglilibing sa kanya ay patunay na siya nga ay namatay.

Question 42. Kung si Cristo ay namatay na para sa atin, bakit kinakailangan pang tayo’y mamatay? Ang ating kamatayan ay hindi bayad para sa ating mga kasalanan, sa halip tinatapos nito ang ating pagkakasala at siyang daan patungo sa buhay na walang hanggan.

Question 43. Ano pang pakinabang ang natatanggap natin mula sa pagpapakasakit at kamatayan ni Cristo sa krus? Sa pamamagitan ng kamatayan ni Cristo ang ating lumang pagkatao ay napako sa krus, namatay at nailibing na kasama niya, upang ang mga masasamang hilig natin ay ay hindi na maghari sa atin, kundi maiaalay na natin ang ating mga sarili sa kanya bilang isang handog ng pasasalamat.

Question 44. Bakit idinagdag ang katagang, "nanaog siya sa impiyerno?" Upang sa gitna ng aking matinding pighati at mga tuksong hinaharap, ako ay makatiyak at maaliw sa katotohanang ang aking Panginoong Jesu-Cristo, sa pamamagitan ng Kanyang hindi maisalarawang hapis, sakit, takot, at paghihirap na kanyang tiniis sa lahat ng kanyang pagdurusa at mas higit pa noong siya ay nasa krus, ay iniligtas na niya ako mula sa hapis at pagdurusa ng impiyerno.

Question 37: Ano ang iyong ipinapahayag kapag sinasabi mong Siya ay nagdusa? Sa lahat ng panahong namuhay Siya sa daigdig, at mas lalo na noong bandang huli, pinagtiisan ni Cristo sa Kanyang katawan at kaluluwa ang pagkapoot ng Diyos laban sa kasalanan ng buong sanlibutan. Kung kaya sa pamamagitan ng kanyang pagdurusa bilang tanging handog na pantubos, tinubos Niya ang ating katawan at kaluluwa mula sa walang hanggang kapahamakan, at natamo Niya para sa atin ang biyaya ng Diyos, katuwiran at buhay na walang hanggan.

Question 38: Bakit Siya nagdusa sa ilalim ng paglilitis ni Poncio Pilato bilang hukom? Bagama’t walang-sala, si Cristo ay hinatulan ng isang hukom na tao, at sa gayong paraan ay pinalaya Niya tayo mula sa mabigat na kahatulan ng Diyos na ipapataw sana sa atin.

Question 39: Mayroon bang mahalagang kahulugan ang pagkapako ni Cristo sa krus sa halip na mamatay Siya sa ibang pamaraan? Oo. Sa gayong pamaraan ako ay nakatitiyak na inako Niya sa Kanyang sarili ang sumpang nararapat para sa akin, sapagkat sinumpa ng Diyos ang sinumang ipinako sa krus upang mamamtay.

Question 35: Ano ang iyong ipinapahayag kapag sinasabi mong: Siya ay ipinaglihi sa kapangyarihan ng Banal na Espiritu at ipinanganak ng Birheng si Maria? Ang walang pasimula at walang hanggang Anak ng Diyos, na Siya rin naman at nananatiling tunay na Diyos na walang pasimula at walang hanggan, ay nag-ako sa Kanyang sarili ng tunay na kalikasang tao mula sa laman at dugo ng birheng si Maria, sa pamamagitan ng pagkilos ng Banal na Espiritu. Kung kaya’t Siya rin ang tunay na binhi ni David, at katulad ng Kanyang mga kapatid sa lahat ng bagay ngunit walang kasalanan.

Question 36: Anong pakinabang ang iyong matatanggap mula sa banal na pagkakalihi at pagkapanganak ni Cristo? Siya ang ating Tagapamagitan, at sa pamamagitan ng Kanyang kawalang-sala at ganap na kabanalan ay tinatakpan Niya mula sa paningin ng Diyos ang aking minanang kasalanan kung saan ako ay ipinaglihi at ipinanganak.