Fríar skólamáltíðir hafa verið pólitískt bitbein í áraraðir en urðu til þess að koma á friði í Karphúsinu á dögunum. Þóra Tómasdóttir ræddi fríar skólamáltíðir við sveitarstjórnarfólk og heyrði hvernig fyrirkomulagið hefur reynst í Þingeyjarsveit og Svalbarðsstrandahreppi.

Bára Baldursdóttir sagnfræðingur segir frá fordæmalausum frelsissviptingum ungra stúlkna sem fram fóru af hálfu hins opinbera hér á landi í seinni heimsstyrjöldinni. Lögreglan stundaði umfangsmiklar njósnir á stúlkum sem grunaðar voru um að hafa áhuga á hermönnum úr setuliðinu. Bára sá sig knúna til að skrifa bók um þessa atburði eftir að hafa komist í skjöl sem haldið var frá almenningi í áraraðir. Þóra Tómasdóttir ræðir við Báru.

Þáttur dagsins fjallar um það sem við vitum flest, en förum samt fæst eftir. Hvað er gott fyrir okkur, hvað eigum við að gera til að líða sem best. Hann fjallar líka aðeins um það sem við ættum að forðast, en gerum fæst. Það er nefninlega svo gott að gera okkur ekki gott, segir læknirinn. Sunna Valgerðardóttir ræðir við Michael Clausen, barna- og ofnæmislækni, sem segir Hippókrates hafa hitt naglann á höfuðið fyrir 2.500 árum: Við eigum að borða grænmeti og fisk, drekka vatn, hreyfa okkur, tengjast náttúrunni, sofa nóg og njóta lífsins lystisemda.

Tveir bandarískir bræður á fertugsaldri voru handteknir í Búkarest, höfuðborg Rúmeníu, á mánudag og leiddir fyrir dómara í gær. Bresk yfirvöld höfðu þá gefið út handtökuskipun sem rúmenska lögreglan fylgdi eftir. Bræðurnir heita Andrew og Tristan Tate og það er sá fyrri sem hefur hvað helst unnið sér ýmislegt misfallegt til frægðar. Hann verður framseldur til Bretlands þegar málaferlum hans lýkur í Rúmeníu. Sakarefnin: Kynferðisbrot og mansal. Sunna Valgerðardóttir skoðar feril Andrew Tate.

Díana Ósk Óskarsdóttir er prestur á Landspítala, faglegur handleiðari og fer fyrir stuðningsteymi starfsfólks spítalans. Það er hennar helsta baráttumál að fagfólk sem vinnur við að hjálpa öðrum, fái sjálft faglega hjálp og handleiðslu til að styrkja sig í starfi. Ekki bara hefur hún upplifað mikilvægi þess í starfi sínu, heldur átti hún sjálf erfið unglingsár, var á götunni frá ellefu ára aldri og þurfti heldur betur að reiða sig á faglega aðstoð til að rata inn á gæfulegri braut í lífinu. Þóra Tómasdóttir talaði við hana.

Fíknsjúkdómur er einn algengasti og alvarlegasti geðsjúkdómur samtímans. Með tilkomu ópíóíðanna er þetta sá sjúkdómur sem veldur dauða flestra á aldrinum 15 ára til fertugs. Samkvæmt nýlegum íslenskum eru um það bil 22 prósent líkur fyrir íslenska karla að verða fíklar einhvern tímann á ævinni og um tíu prósent líkur fyrir konur. Inga Sæland, formaður Flokks fólksins, er málshefjandi sérstakrar umræðu á Alþingi í dag um fíknsjúkdóminn og stöðu þeirra sem af honum þjást. Hún gagnrýnir forgangsröðun stjórnvalda þegar kemur að fjármagni og segir yfirvöld ekki taka sjúkdóminn nægilega alvarlega.

Anna Marsibil Clausen leitar svara við ráðgátunni um hvarf Jóns Þrastar Jónssonar hér heima á Íslandi en ekki í Dublin þar sem hann hvarf fyrir fimm árum. Hún sagði Þóru Tómasdóttur frá því hvers vegna þræðirnir liggja til Íslands.

Fimm mánuðir eru liðnir frá því að stríðið á milli Hamas og Ísrael hófst. Meira en 25000 palestínsk börn og konur hafa verið myrt síðan 7. október, milljónir eru á flótta við ólýsanlega hræðilegar aðstæður og samninganefndirnar neita að hittast. Gíslar eru í haldi á báðum vígstöðvum. Takmarkið? Óljóst. Uppræting Hamassamtakanna, segir forsætisráðherra Ísraels. Og að koma í veg fyrir að Gaza geti ógnað öryggi landsins. Sunna Valgerðardóttir ræðir við Magnús Þorkel Bernharðsson, prófessor í miðausturlandafræðum, sem er svartsýnn á framhaldið. Gaza er nú þegar orðið að helvíti á jörð og það á eftir að versna enn frekar á næstu vikum og mánuðum, segir hann.

Oktavía Hrund Guðrúnar Jóns er ráðgjafi í net- og upplýsingaöryggi og segir frá algengum vopnum sem hernaðarríki beita í stafrænum heimi. Hán hefur meðal annars nýtt þekkingu sína til að berjast gegn njósnum og ritskoðun á netinu. Þóra Tómasdóttir talaði við hán.

Saga Miðflokksins spannar ekki einu sinni sjö ár, þó að rætur hans liggi miklu dýpra. Flokkurinn hefur verið að bæta við sig svo miklu fylgi í könnunum undanfarið að hann er kominn í sömu tölu og hann fékk í fyrstu Alþingiskosningunum sínum. Hvað er Miðflokksfólkið að gera sem skýrir þessa breytingu? Sunna Valgerðardóttir ræðir við Eirík Bergmann stjórnmálafræðiprófessor um merkissögu þessa unga flokks og rýmið sem orðræðan hans hefur fengið nýverið í íslensku samfélagi.