Íslendingar hafa náð einstökum árangri í því ala upp nýja kynslóð nikótínneytenda þó fáum þyki það fagnaðarefni. Við heimsækjum eina af verslunum Svens og ræðum við ungt fólk sem neytir nikótíns. Við heyrum líka hvað Lára G. Sigurðardóttir, læknir og lýðheilsufræðingur, telur að ungt fólk verði að vita um áhrif nikotíns.

Það eru fleiri þrælar í heiminum í dag en á öllu þrælatímabilinu hér á öldum áður. Talið er að um 50 til 60 milljónir séu í dag gerð út í þrældóm hverskonar um allan heim, meðal annars hér á Íslandi. Það kom talskonu Stígamóta á óvart hversu umfangsmikil mansalsmálin voru í kerfi stofnunarinnar þegar hún tók við fyrir ári síðan, en allt kapp er lagt á að uppræta vændi og mansal hér, þó að það reynist oft þrautin þyngri. Sunna Valgerðardóttir ræðir við Drífu Snædal, sem varð talskona Stígamóta fyrir ári síðan, í þætti dagsins.

Ragnar Jónsson hefur starfað í íslensku lögreglunni í meira en þrjá áratugi. Undanfarin 23 ár hefur hann þó sérhæft sig í tilteknum kima lögreglustarfsins: blóði. Hann er blóðferlafræðingur hjá tæknideild lögreglunnar á höfuðborgarsvæðinu. Hann skoðar hvernig blóð hagar sér og skilur söguna sem það skilur eftir sig. Nýverið tók hann við stöðu forseta Evrópudeildar alþjóðasamtaka blóðferlafræðinga, sem telur um 600 sérfræðinga, og segir tengslin, samtalið og leitina að sannleikanum gera það að verkum að hann er enn með stjörnur í augunum þegar hann lýsir því sem hann vinnur við. Sunna Valgerðardóttir talar við Ragnar um blóð, glæpi og vísindi í þætti dagsins.

Ráðgátan um undrabarnið Adam hefur bókstaflega heltekið Norðmenn á undanförnum vikum. Hún hverfist um tékkneskan unglingsdreng sem hóf skólagöngu í Marienlyst gagnfræðiskólanum í vesturhluta Oslóar, árið 2007. Málið er með furðulegri sakamálum sem upp hefur komið í Noregi og það teygir anga sína út fyrir landamærin, til Norðurlanda og sunnar í Evrópu. Þóra Tómasdóttir ræddi við Trude Lorenzen höfund hlaðvarpsþáttanna Ráðgátan Adam.

Síðdegis á fimmtudag nýliðinnar viku kviknaði eldur í blokkaríbúð í borginni fögru, Valencia, höfuðborg samnefnds héraðs á Spáni. Byggingaverkfræðingur fullyrðir að þetta sé fyrsti bruni sinnar tegundar þar í landi. Klæðningin á húsinu, sem er tiltölulega nýtt, fuðraði upp eins og hún væri hönnuð til þess. Og það vekur upp óþægileg hugrenningatengsl við annars bruna. Það tók eldtungurnar í Valencia um það bil hálftíma að breiðast um alla blokkina frá einum biluðum, gömlum ísskáp í íbúð á fjórðu hæð blokkarinnar. Tíu létu lífið. Þetta er mannskæðasti eldsvoði í Valencia í 600 ár. Hvernig gat þetta gerst? Sunna Valgerðardóttir skoðar banvænar klæðningar evrópskra fjölbýlishúsa.

Þegar norsku hjónin Robert og Trude Steen misstu son sinn Mats úr vöðvarýrnunarsjúkdómi fyrir tíu árum héldu þau að sonur þeirra hefði kvatt einmanna og sveltur á félagsleg tengsl. Fátt benti til þess að sagan hans Mats ætti eftir að hreyfa við milljónum manna um allan heim. Hvað þá enda sem ævintýri á hvíta tjaldinu. Robert Steen sagði Þóru Tómasdóttur sögu sonar síns sem nú er orðin að kvikmyndinni Ibelin.

Áhrifavaldar þessa heims eru alls konar. Misgagnlegir og misskaðlegir. Svolítið eins og trúar- og lífsskoðunarhópar. Nú í vikunni mætti bandarísk sex barna móðir fyrir dómstól og játaði á sig næstum ólýsanlega glæpi gegn börnum sínum, sem hún hafði dásamað klukkustundum saman á netinu nokkrum árum fyrr. Hún var með milljónir áskrifenda og milljarða áhorf. En það er fleira sem þessi kona og skaðlegir sértrúarsöfnuðir eiga sameiginlegt. Hún var eiginlega í tveimur og drottnaði yfir þeim þriðja, fjölskyldunni sinni. Sunna Valgerðardóttir fjallar um ofurmömmuna í Utah sem á nú yfir höfði sér nokkurra ára, eða áratuga, fangelsi.

Á undanförnum mánuðum hefur gustað um greiðslumiðlunarfyrirtækið Rapyd. Hópur fólks hefur kallað eftir því að neytendur á Íslandi sniðgangi Rapyd og þrýsta á verslanir að slíta samstarfi við fyrirtækið. Þóra Tómasdóttir ræddi við Björn Brynúlf Björnsson sem hvetur til sniðgöngu Rapyd og Garðar Stefánsson forstjóra fyrirtækisins sem segir reiðinni beint í ranga átt.

Það er dýrt að búa á Íslandi og það er dýrt að ferðast um Ísland. Sérstaklega í loftinu. Það er dýrara að fljúga á milli Akureyrar og Reykjavíkur en til flestra stórborga í nær-Evrópu. Af hverju? Sunna Valgerðardóttir skoðar dýrt innanlandsflug í þætti dagsins og tekur nýlegt dæmi af fjölskyldu einhverfs drengs sem þarf nú að greiða fullorðinsfargjald fyrir hann til stuðningsfjölskyldunnar vegna þess að hann er orðinn 12 ára.

Samheldin fjölskylda stofnaði fyrirtækið Fischer til að geta ræktað listsköpun í sameiningu. Fyrirtækið hefur þróast úr því að vera lítil tilraunagerð í kjallara yfir í framleiðslufyrirtæki með vörur markaði í Bretlandi, Bandaríkjunum og Asíu. Ingibjörg, Lilja og Sigurrós Birgisdætur, Sindri Már Sigfússon og Kjartan Hólm ræddu við Þóru Tómasdóttur um ævintýri Fischer.