trufm Current Affairs

Iziko iMandela Bay Theatre Complex libambisene nomdlali weqonga uZukiswa Cakucaku, bamema bonke abathandi bemidlalo yeqonga abakwingingqi ye Nelson Mandela Bay, eMpuma Koloni, ukuba bazekubukela umdlalo weqonga  i- Sizwe Banzi is Dead, nongumdlalo ochaza ngobomi phantsi korhulumente wengcinezelo. Lomdlalo weqonga nowabhalwa nguAthol Fugard, uJohn Kani noWinston Ntshona, ulandela ibali lika Sizwe Banzi ojongene nobunzima phantsi korhulumente wengcinezelo. Ukusabela banzi, emnxebeni sibambe umqulunqi welibali uZukiswa Cakucaku...

Ikomiti yomgaqo nkqubo wezimali kwibhanka enguvimba, ivumelene ngamxhelo-mnye ukuba ilicuthe nge 25 basis points iqondo lenzala kwimali mboleko, nto leyo ithetha ukuba ngoku limi kwinto engaphezulwana nje kwisixhenxe ekhulwini, 7-point-75 Percent. Irhuluneli yebhanka enguvimba uLesetja Kganyago, ithi lo gama ithande ukuphucuka inkangeleko yoMzantsi Afrika kodwa isengumngeni leyo yehlabathi. Ukusabela ngokuthethwa koku, emnxebeni ngoku sinaye umhlalutyi wemiba yoqoqosho ozimeleyo uGqirha Bonke Dumisa...

Ungeniswe kumqulu wezaziso zikarhulumente umthetho woomasipala oyilwayo ozakusebenza ngokufanayo ngokuphathelene kuqoqosho lwasezilokishini. Lo mthetho woomasipala uyilwayo nongeniswe  kulo mqulu ngumphathiswa wolawulo ngokubambisana nemicimbi yemveli, u Velenkosini Hlabisa, ujolise ekudaleni iimeko ezivumayo zoshishino kumashishini amancinane asezilokishini, unike inkxaso kuye wonke ubani ofuna ukushishina, uvelise imisebenzi, ze uxhobise nabahlali ngezakhono zoshishino. Ukanti ke oku kuzakuvuselela ze kuhlaziye uqoqosho lweelokishi. Ukusabela banzi ngalo mthetho, sithe masikrwece umphathiswa worhulumente ngobambiswano nemicimbi yemveli u Velenkosini Hlabisa...

Igunyabantu elilawula iinkcukacha iInformation Regulator, liyalele isebe lemfundo esi siseko ukuba limilisele inkqubo apho umzali ezakunikeza imvume kwisebe ukuba lipapashe iziphumo zomntwana zebanga leshumi. Ngaphambili, amagama abafundi, iifani kwakunye neziphumo, zazipapashwa kumaphephandaba. Kodwa ekuhambeni kwexesha isebe laye lapapasha iinombolo zabafundi zokubhala kuphela. Eli gunyabantu lithi ukupapashwa kwezi ziphumo kukungawuthobeli umthetho ogxile ekupapasheni iinkcukacha zomntu. Ukusabela banzi, u-Ayabonga Kekana uthethe nophuma kwigunyabantu elilawula iinkcukacha, i-Information Regulator ngolwasemzini, uNomzamo Zondi...

Abanini bezikroxo eGqeberha eMpuma Koloni, sele beqalile nenkqubo yokubhalisa amashishini abo ukuqinisekisa ukuba bathobela imiqathango eqinisekisa ukhuselo lwezempilo. Ngethuba ethetha nesizwe ngomhla weshumi elinesihlanu kule nyanga, umongameli uCyril Ramaphosa unike abanini bezivenkile iintsuku ezingamashumi amane ananye ukuba babhalise koomasipala babo, okanye azakuvalwa amashishini abo. Susela kwinyanga yoMsintsi, kuchazwe iziganeko ezingamakhulu asibhozo anamashumi alithoba zezigulo ezibangelwa kukutya okunetyhefu kuzwelonke, nalapho iGauteng kunye neKwaZulu Natal ingawona maphondo achaphazeleke kakhulu. Abanikazi bezivenkile bakhalazile ngokuba ezintsuku bazinikiweyo ukuba babhalise, zimfutshane kakhulu. USinethemba Witi usenzele le ngxelo

Ukusukela ngenyanga yoMsintsi ( September) zingaphezulu kwe-890 izehlo ezichaziweyo zokugula kwabantu ngenxa yokutya okutyhefekileyo eMzantsi Afrika. Umongameli uCyril Ramaphosa, uye wamemelela ukubhaliswa kwezi zikroxo zingekapheli iintsuku ezingamashumi amabini ananye. Kwiveki ephelileyo, usodolophu waseNelson Mandela ubambe ugqogqo nalapho ekhuphe umyalelo wokuba kuvalwe ezisibhozo kuba abanini bazo bengenazimpepha. Ukanti sele kuqaliwe ukubhaliswa kwezi zikroxo. Phulaphula udliwano-ndlebe phakathi ko-Ayabonga Kekana noceba kumasipala weNelson Mandela, uThembinkosi Mafana...

Iingcali zezopolitiko zilumkise ngelithi ingendela iyantlukwano phakathi kumbutho iEFF ngenxa yezityholo zokuthintelwa kwelungu lalo mbutho, ugqirha Mbuyiseni Ndlozi, ukuzimasa inkomfa yonyulo yalo mbutho ezayo. Iingxelo zithi uNdlozi uthintelwe ukuba abeyinxalenye yenkomfa kazwelonke, iNational People's Assembly ekulindeleke ukuba iqhube eNasrec eRhawutini kwinyanga yoMnga. Ngohlalutyo oluthe vetshe kulo mba, u-Ayabonga Kekana ubambe emnxebeni umhlalutyi wezoplitiko, uNjingalwazi Ntsikelelo Breakfast...

Umbutho wamakomanisi, iSACP, ukhwebe intlanganiso ekhethekileyo yamahlakani kanxantathu. Oku kulandela ukungaboni ngasonye kwalo mbutho ne-ANC, ngomba ongqamene norhulumente wobumbano, iGNU.  Kumaxa angaphambili, lo mbutho ubuye ubhengeze ukuba uza kuzigqatsela unyulo ngexa lonyulo, kodwa kunangoku, oko akukenzeki.  U-Ayabonga uncokole nentatheli yeli jelo, uNtebo Mokobo, ngale nyewe... 

Urhulumente woMzantsi Afrika ude walisabela ikhwelo lokuba uthathe amanyathelo ngakwiivenkile zasekuhlaleni ezingayithobeliyo imithetho yeli nemiqathango emayela nokuthengisa ukutya okufanelekileyo ukuba kungatyiwa ngabantu. Ngokuhlwa kwangoLwesihlanu kwiveki esiyishiyayo umongameli uCyril Ramaphosa uthethe nesizwe ngamanyathelo azakuthathwa ukuqubisana nokufunquka kwamanani abantu abathi bagule bambi besweleka ngenxa yokutya ukutya okutyhefekileyo. Kwezi nyanga zidlulileyo abantwana abaselula bathe bangamaxhoba okutya izimuncu-muncu ezingekho mpilweni nto leyo ikhokhelele ekubhubheni kwabangamashumi amabini anesibini ze kwaqhambuka neentshukumo zoqhankqalazo kwezinye iindawo. Eiminye yale miqathango ibhengezwe ngumongameli kukuba ezi venkile zibhalise koomaspala kwisithuba seentsuku ezingamashumi amabini ananye kwaye zizakuvalwa iivenkile ezifunyaniswa zingayithobeli imiqathango yezempilo. Ukusincedisa kule ncoko yethu namhlanje emnxebeni sinaye unobhala wecandelo lezophuliso lwamashishini kumbutho i South African Spaza and Tuckshop Association u Sibusiso Ngcobo... 

Ngomhla weshumi kweYenkanga kuphehlelelwe incwadi ebizwa ukuba 'Imfundiso kubhalo loncwadi Isixhosa' eKapa kwiphondo leMpuma Koloni.  Le ncwadi nebhalwe nguVuyani Nkunzi injongo yayo kukunika iingcebiso kwabo benza izifundo zolwimi lwesiXhosa. Ukusabela banzi emnxebeni, sibambe kanye lombhali uVuyani Nkunzi...