Skrifstofustjóri hjá borginni vill láta skoða hvort borgarfulltrúar hafi brotið ákvæði sveitastjórnarlaga og skyldu kjörinna fulltrúa, þegar þeir héldu því fram að hún hefði lagt undirmann sinn í einelti. Borgarfulltrúi Miðflokksins boðar ný gögn í málinu á morgun. Fjöldi hefur farist í flóðum á Suður-Indlandi, hundruð húsa hafa skemmst og ræktarlönd eru ónýt. Varað er við miklum rigningum næstu daga. Flugfargjöld hafa lækkað meira en flugfélögin þola, að mati Kristjáns Sigurjónssonar, ritstjóra túristi.is. Hann býst við að farmiðaverð hækki. Í Speglinum spáðum við í stöðu WOW air eftir að fregnir bárust af fyrirhuguðu skuldabréfaútboði flugfélagsins. Guðmundur Ingi Guðbrandsson, umhverfis- og auðlindaráðherra segir að tilgangur með frumvarpi um nýja stofnun, sem á að hafa umsjón með umsýslu allra þjóðgarða og friðlýstra svæða, sé að færa málaflokkinn undir eina stjórn. Frumvarpið verður lagt fram í nóvember eða desember. Það myndi kosta hálfa milljón króna að svara fyrirspurn þingmanns um andlát foreldra. Hagstofan segir að hægt sé að svara fyrirspurninni en það kalli á mikla vinnu. Flugfélagið WOW air, sem er í eigu Skúla Mogensen, ætlar í allt að 12 milljarða skuldabréfaútboð, til að brúa bil fram að hlutafjárútboði og skráningu á markað á næsta ári. Kristján Sigurjónsson ritstjóri ferðavefjarins turisti.is hefur fylgst vel með flugfélögum og flugrekstri undanfarin ár. Hann segir að fregnir um að WOW þurfi meira fé, komi ekki á óvart. Sigrún Davíðsdóttir fjallaði um málið. Ferðamenn lofsama The Diamond beach - Demantsströndina og The Black Sand Beach - Svörtu sandfjöruna. Færri Íslendingar þekkja þessi staðarheiti, þó staðirnir séu flestum kunnir enda vel þekktar náttúruperlur. Arnhildur Hálfdánardóttir fjallaði um málið og ræddi við Magnús Björn Ólafsson ritstjóra Guide to Iceland. Umsjónarmaður Spegilsins var Ragnhildur Thorlacius. Tæknimaður var Davíð Berndsen.