Fréttir:

Mál þar sem tekist er á um hæfi fjögurra dómara við Landsrétt fær flýtimeðferð hjá Mannréttindadómstól Evrópu.

Bandaríska alríkislögreglan hefur handtekið einn mann í tengslum við rannsókn á fjölda bréfasprengja sem sendar hafa verið pólitískum andstæðingum Bandaríkjaforseta síðustu daga.

Umboðsmaður Alþingis telur sveitarstjórnir hafa rétt til að ráða sér framkvæmdastjóra á pólitískum forsendum. Heimilt geti verið að líta til sjónarmiða sem almennt teljist ekki málefnaleg.

Konur í félagslega erfiðri stöðu sem óska eftir þungunarrofi milli sextándu og tuttugustu og annarrar viku meðgöngu hafa til þessa þurft að leita til útlanda eftir þjónustunni. Þetta mun breytast verði nýtt frumvarp heilbrigðisráðherra að lögum.

Lengri umfjallanir:

Ný forysta hefur tekið við stjórn Alþýðusambandsins og kona gegnir í fyrsta sinn embætti forseta ASÍ. Fyrsti varaforseti segir að fyrir ári síðan hefði verið óhugsandi að hann yrði kjörinn í embættið. Arnar Páll Hauksson segir frá.

Ákvörðun dómara um fréttabann meðan á skýrslutökum stendur í réttarhöldunum yfir Thomas Möller Olsen felur í sér meðalhóf, segir Sigríður Árnadóttir, fyrrverandi fréttastjóri og núverandi aðstoðarsaksóknari. Fjölmiðlar fái að afla sér frétta en birting sé aðeins tafin fram yfir þann tíma sem hún gæti skaðað málið. Brynjólfur Þór Guðmundsson.

Framkvæmdastjórn Evrópusambandsins hefur útnefnt Ósló Umhverfisvæna borg Evrópu 2019. Á sama tíma og Ósló verður græn, er Noregur olíuútflutningsríki. Ásrún Brynja Ingvarsdóttir segir frá.