ជាមួយ​នឹងភាពរីកចម្រើន ហ៊ឺហារទាន់សម័យ សម្ភារៈនិយម របស់មនុស្សយើងនាពេលបច្ចុប្បន្ននេះ សម្លៀកបំពាក់សំបូរបែប គ្រប់ម៉ូដគ្រប់ម៉ាក បានក្លាយ​ជាមធ្យោបាយ​ដើម្បីបង្អួត សំញ៉ែញគ្នា​ ឬដើម្បីអាចចូលចុះ ក្នុង​ចំណោម​មនុស្ស​ក្នុង​សង្គម​មនុស្ស​។ ឧស្សាហកម្ម​ផលិត​សម្លៀកបំពាក់ បានឆក់យក​ឱកាស​នេះ ដើម្បី​ផលិត​សម្លៀកបំពាក់ ដូរម៉ូដកាន់តែញឹក តម្លៃកាន់តែថោក តែគ្មានគុណភាព និង​ឆាប់ប្រើការលែងកើត។ អង្គការបរិស្ថាន ក៏ដូចជាអ្នកប្រើប្រាស់មួយចំនួន ភាគច្រើន​នៅតាមបណ្តាប្រទេសអឺរ៉ុប បានចាប់ផ្តើមទាញសញ្ញាអាសន្ន រំលឹកអំពី​ផលអវិជ្ជមាន​ដ៏គ្រោះថ្នាក់ បណ្តាលមកពី​​ផលិត​សំលៀកបំពាក់ លើសពីតម្រូវការ​ ដើម្បីប្រមូលប្រាក់ចំណេញ ដោយ​គ្មានការទទួលខុសត្រូវ ចំពោះ​បរិស្ថាន ធនធានធម្មជាតិ និងសុខមាលភាព​របស់មនុស្ស។