តាំង​ពី​ប៉ុន្មាន​ឆ្នាំ​កន្លង​ទៅ ប្រទេស​តួកគី​បាន​បង្វែរ​ទិស​ឧស្សាហកម្ម​អាវុធ​របស់​ខ្លួន​ឆ្ពោះ​ទៅ​ផលិត​ដ្រូន​ប្រយុទ្ធ​គ្មាន​អ្នក​បើកបរ​មាន​ឈ្មោះ Bayraktar TB2។ ក្រៅ​ពី​ប្រើប្រាស់​ក្នុង​ស្រុក ដ្រូន TB2 ត្រូវ​បាន​តួកគី​លក់​ទៅ​ឲ្យ​ប្រទេស​ជា​ច្រើន និង​កំពុង​បន្ត​ទាក់ទាញ​ប្រទេស​មួយ​ចំនួន​ទៀត។ ប្រធានាធិបតី​តួកគី​លោក​អ៊ែរដូហ្កាន​បាន​ថ្លែង​ដោយ​សាទរ​ថា តួកគី​ស្ថិត​ក្នុង​ចំណោម​៣ ប្រទេស ឬ​៤ ប្រទេស​ដែល​មាន​ជំនាញ​ផលិត​ដ្រូន។ ចំណែក​លោក​អ៊ីស៊្មែល ដេមៀរ ប្រធាន​ទីភ្នាក់ងារ​រដ្ឋាភិបាល​ទទួល​បន្ទុក​គ្រប់គ្រង​ឧស្សាហកម្ម​ការពារជាតិ​បាន​ថ្លែង​ដោយ​អួតអាង​ថា ដ្រូន​តួកគី​ល្អ​ជាង​គេ និង​មាន​តម្លៃ​ថោក​ជាង​គេ។