glichzitig

moinmoin a alli fellow grätscher*inne. die folg loht sech i eim wort zämefasse: sorreyyyyyy. d milena het leider zerst kei stimm und denn kei internet gha - eher schlechti vorussetzige för en podcast. drom die unerwarteti pause. und au die folg wird chorz well d eva esse in plastiksäck abfölle und es buech öber fischfang lese muess 🎣 .ab nöchst woche gohts denn aber weder in normaler regelmässigkeit und längi witer. usser d eva esch vomne bär gfresse worde oder het sich för immer im wald verlaufe (2x wohrschinlechkeit ca. bi 90%, bitte alli 1x holz alenge). vorschläg för neui podcast-partner*inne förd milena send willkomme. bis nöchst woche, mer send weder dooooo und freuet eus. 💜

welcome back 👋🏻 mol wieder e neui folg vo euchem lieblingspodcast. es goht 2 minute bis d milena checked dasses afoht, 10 minute bis d eva euch seit dass iehr offiziell nüm müend verhüete (joke, julia, es ist ein joke), 40 minute bis mer zu de afangsfrog chömed und am schluss wartet denn au no en riesige, intensive, schöne rant uf euch 😍 usserdem erfahret iehr vo de eva werum mer meh über HPV settet rede, werum d milena sich nur all 3 jahr en neue bh chauft und werum mer für weniger schluuchbööter uf gsichter sind 🚤 mier hoffet iehr hend viell spass bim lose. en liebe gruess a alli, ussert a die, wo nei stimmet bi de „ehe für alle“. danke, viele dank. 💜

alles gucci? bi eus scho. bi de eva irem frauearzt au, wenner i die tüüfste tüüfene vo irere vagina luegt 🕵🏼 de moment isch do. es isch sowiit. mer merket langsam, dass mer alli piinleche sexstories scho uspackt hend (grund gnueg für euch, zum eus neui schicke 😉). drum redemer komischerwiis über dildos us iis, truurigerwiis über die immerno viell z höche chöste für untersuechige bi fraueärzt*inne, spannenderwiis über d entwicklig vo gschlechterspezifische abtriibige und logischerwiis au susch no über ganz viell gugus 🥰. zuesätzlich gits au wieder en verlosig, juhuuuuu. drom schnellschnell: folg lose zum gratis kondom über eihörner zstülpe. oder so. ok, weird. 🦄 zum schluss vo de folg blibt uf jede fall denn eigentlich nur no ein einzigi frog offe: ikann sie wieder laufe oder ned?! we need to know. 🤔

gehnd eus liebi, likes und kommentär (oder es patreon-abo hust). es würde uns sehr freuen. eva und milena.💜

halloooo. wir grätschen euch wieder mal einisch mehr in eure ohren rein iehr herzige.👂🏼 es goht zum 50. mol ums 1. mol. es goht um fingerschmöckendi geronimos uf basketballfelder. um riiiiiiesigi aber netti ex-fröndinne. um en ungrechti filmwelt. um de sexistischi mushu vo mulan 🐉, um de bechdel-test und um ganz vell meh. met neue kategrie (nei do fehlt keis o, julia) brengemer die neui staffle zum laufe. und achtung: mier hend eus dasmol sogar mindistens 5 minute vorbereitet und trinket kei alkohol - new staffle, new us 💁🏼‍♀️. fine - nöchst woche semmer weder betrunke. hihi. adee merciiiiii. 💜

instagram: @glichzitig

patreon: www.patreon.ch/glichzitig

we are baaaaaaaaaack! 🥳 mier sind zrug us de summerpause und am meiste über das freuet sich wohrschinlich d'nonne in rom, well d milena denn kei schabernack in ihrne heilige halle meh triibt. A dere stell nomol es beschämt-belustigts „scusi“ 🙈. während d milena also wieder i de schwiiz isch, hets d eva endlich uf kanada gschafft. sie het somit wieder sex und neu au augebraue. 👸 mier freuet eus zum euch wieder volllabere, iehr guete! es esch de start vo glichzitig staffel 2 - wieder mit tusig gschichte, leider au mit viell weltschmerz, und natürlich trotzdem mit ganz viel liebi und feminismus ✨💜

time tooo say .... goodbye. 😱

spaaass, lol!😌 aber bitzli ebe glich: mier machend 3 wuche summerpause, demit mer beidi eifach mol ferie mache könnt und ahschlüssend gaaanz viel neue gspröchsstoff hend. defür wirds hüt nomol richtig guet; es wird wiedermol gäg karens granted und über d'gen z philosophiert. d'eva begit sich bir milena in e therapiestund und das alles ended damit dass mr wiedermol liecht beschwippst drüber redend, wieso en goldhamster eifach lukrativste huustier überhaupt isch. (macht denn ales sinn, versproche!).

schöne summer ier tolle grätscher*inne – love you much!

mier sind wieder umeeeeeee und auf trab!🥳 d milena hets komplett gnoh, d eva isch gstresst des todes. uuuund ihr coole hend eus nasty, lustigi, intimi und mängisch chli erschreckendi assumptions über eus gschickt. mier hend druf trunke, zum sie chönne verarbeite. d eva betriibt menschehandel und isch gar ned feministisch? d milena fluecht zviel und isch beziehigsunfähig? was denket ihr schusch no so vo eus? erfahrets i dere folg,👀 ihr heisse fäger!🔥 mier hend seeehr viel spass gha und hoffet, ihr hend bim lose mendistens halb so vill!😅 muchos lovos. 💜

p.s: sorry für bitzli glockelüüte zwüschedrin, lol!

en liste mit sache wo mer bim podcaste ned sett mache:

1. sich vorher während 2 stund imne instensivi gspröch scho allllles verzelle

2. absolut fest extrem krass tusig übermüedet si

3. en liste vorlese

4. sich nullllll vorbereite

5. gschichte verzelle wo mer scho mol im podcast verzellt het

fazit: check bi 5/5 ✅ bewertig drum so 4/10 🥲 joaaaa… was wemmer sege? wär cool wenners glich irgendwie wördet lose. so im hintergrund während em choche. bi luutstärchi 2. deal? deal! 🤝

bonjour. do simmer wieder mit gelaber par excellence. mier hend 45-minute und fülled sie mit verwirrende froge und emne traumatisierende trinkspiel. wo söllemer afo? also erstens het die kanadischi botschaft es viel zu intims fotialbum vo de eva und sie chauft sich drum vilicht es kanu. zweitens darf d milena kei akrobatik im club meh mache, damit ihre vater in rueh chan wandere. drittens frogemer eus, warum coronalügner*inne gern erdbeeri esset, wtf eigentlich paypal isch und öb mer gnueg socke und wc-rollene diheim hend oder in knast müend. ach internet - es isch und blibt en hassliebi mit dir. sorry für die verstörendi folg. schuld sind aber ned mier sondern de freakjulius94 und co. trotzdem viel spass bim lose und viel liebi 💜

whatup. glichzitig in ze house. mier sind on fire (literally, wil omg es isch heiss!🥵) und de rose prosecco eisgekühlt. Besti vorussetzige für so zimlech alles. und sicher au für e neui podcast-folg. mier chömed sogar is philosophiere: vergangni fehler, verpassti entschuldigunge, brochnigi herze, schlaflosi nächt, gurke, judgy vögel, sexistischi tornados. Ja okay, eventuell schweifemer irgendwenn mol chli vom philosophiere ab. aber s sind au 50 grad, fritig abig & sowieso – PHILOSOPHIER DOCH SELBER, JULIA!

cheers, blibend so toll und ganz viel spass mit glichzitig!