Koɗo men hannde

Mali, haa hannde alhaali on jaaɓi. Balɗe tati caggal fiyanɗe mawɗe ɗe meeɗaaka yi'eede e nder ndii leydi, lamnde heewɗe heɓaali jaabawol. Ko yimɓe njelo waraa hen ? Ko njelo gaañaa ? Mbele konu Mali waawan heddaade caggal ɗee piyanɗe, ɗe kuliyankooɓe JNIM e murtuɓe FLA waɗi ? E bi’ol Fedde CFR nde Imam Mahmoud Dicko ardii, yonti nde konu ardiingu Mali rowtiroto laamu. Ko Etienne Fakaba Sissoko woni koɗo men hannde. Ko kanko woni ƴettoowo konngol ndee fedde. Heɗoɗen mo, himo jaaboo lamnde Ibrahima Timbi Bah

Ko piyanɗe mawɗe waɗi e ndee aseweere to Mali. Hooreeɓe laamu toowɓe waraama walla gaañaama. Sadio Camara, Jaagorɗo halfinaaɗo ndeenaagu waraama. Jeneral Modibo Koné, toppitiiɗo kumpite laamu wonndude e Oumar Diarra ardiiɗo état-major leydi ndin gaañaama. Ko kuliyankooɓe JNIM e murtuɓe FLA waɗi ɗee piyanɗe. Piyanɗe meemuɗe nokkeeli semmbuɗi e nder leydi ndin :

Gila e Kati, daaka konu jaɓɓiika galle Assimi Goita, hooreejo Mali, haa hewti Gao, Kidal, Mopti e Sevaré. Ɓee kuliyankooɓe JNIM e murtuɓe FLA, waɗii boneeji mawɗi. Taw si konunkooɓe Mali heddoto e laamu caggal ɗee piyanɗe ? Holko saabi gollidal hakkunde ɓee kuliyankooɓe e ɓee murtuɓe ? Ko holɗum ɗee fiyanɗe battinta e konu Mali ?  Koɗo men hannde ko Dr Mamadou Gaani Sow, hertorɗo ndeenaagu, jannginoowo to iniwersite Nouakchott. Himo jaaboo lamnde Ibrahima Timbi Bah...  

Koɗo men hannde ko Ali Sileymane LY. Omo yaltini deftere wi’eteende “Diambars, Une ecole de la vie”. Ndee deftere ina haala e nguurndam makko, gila to woni almuudo omo yelo haa ɗo woni karallo e informatik woni karalle kese ɗe. Kono hade o yettaade e ɗee golle, oo yiɗno ko wonde pettoowo balon woni footballeur. E nder yeewtere men e makko, o artanat en jooni e gol-wole makko, caɗeele ɗee oo hawri, winndannde nguurndam makko haa e yimɓe duusɓe mo haa o waawi yettaade ɗoo o yetti ɗoo jooni.

Ɓee kandidaaɓe 4 faalaaɓe lomtaade Antonio Guterres, e hoore Dental Adunaaru ONU gayni hanki hollude eɓɓooje maɓɓe siɓe suɓaama ardagol ndee fedde. Ɓeen ko Michelle Bachelet, Rafael Grossi, Rebeca Grynspan e hooreejo kiɗɗo Senegal Macky Sall. Mo kala e maɓɓe holli miijo mun e nder yamɗe 3. Ko holno ngoo suɓo yaarata? E ɓee 4, ko hombo ɓuri
yogaade ɗaminaare laatagol koolaaɗo kuuɓal ndee fedde? Hol woni fartanŋe Macky Sall, hooreejo kiɗɗo Sénégal ? Koɗo men hannde ko Elhadj Amadou Oury Diallo , golloowo calɗi ONU fowtiiɗo. Himo jaaboo lamnde Ibrahima Timbi Bah.

Senegal, mbatu winndereyankowu faatungu e jam e ndeenaagu joofi hankin. E nder balɗe ɗiɗi, jooma ganndeeɓe toowɓe hollii miijooji maɓɓe ngam tabintingol jam e ɓamtaare duumiinde e nder Afrik. Ndee jonnde waɗii sahaa mo tawata, diiwe Afrik heewɗe hino wuuri rafi ndeenaagu:

Kuliyankaaku hino layude e leyɗe hirnaange Afrik, fitinaaji no ɓeydo tan Soudan, kareeli uytaaki e diiwal Grand Lac. Ko haana waɗeede kon no mawni. Afriknaaɓe wuurɓe e leyɗe njanane tawtoraama e nder ndee jonnde. E ɓeen no tawo Dr Djibril Diallo, ardiiɗo fedde wurnitirnde Afrique e ɓiɓɓe Afrik yaltuɓe. E bi’ol makko, Afriknaaɓe hino haana jogondirde ngam dañugol ɓamtaare. Ko kanko woni koɗo men hannde. Himo jaaboo lamnde Ibrahima Timbi Bah.

To leydi Mauritanie: ko hulhuli ngoni toon caggal maayde suka debbo gooto to Nouakchott.Gooski Faty Hamadou Ba yiytaama subaka Aset oo to leegal Dar Naïm, e nder Nouakchott. Oo debbo ko janaaɗo waɗaa bonanndeeji kulɓiniiɗi. Oo musiiba umminii kadi jeewte politik : ko faati e ɓamugol sariya hiwirɗo ɓee rewɓe. E bi’ol Aminata Diarra daraniiɗo hakkeeji
rewɓe, Moritaninaaɓe fow, hino haani immaade daro ngam háɓugol fitinaaji faweteeɗi e rewɓe. Ko kanko woni koɗo men hannde. E faandu haala Ibrahima Timbi Bah, o holli mettu ɓernde makko kadi eko yimɓe lunndiiɓe laamu wona e jaggeede e ner Mauritanie. Heɗoɗen

Soudan, hare hakkunde général Abdel Fattah al-Burhan ardiiɗo konu leydi ndin e général Mohamed Hamdan Dagolo ardiiɗo fedde FSR renndinnde militeereeɓe heeriiɓe naati e hitaande 4ɓere. Gila ndee hare fuɗɗi, fitinaaji mawɗi waɗii : miliyonji 14 yimɓe eggi, ujunaaje 11 majji, ko ɓadi rewɓe ujunaaje 4 ndoolaama.

Ndee, ko hare ɓurnde tiɗde e nduu adunaaru e bi’ol ONU. Hol ko saabi ñannde fof, boneeji mayre hino ɓeydaade? Fii honɗum mofte winndere ɓamaari peeje tiiɗe ngam dartingol ndee hare ? Koɗo men hannde ko Dr Sally Bakari, jannginoowo iniwersite, fiɗtotooɗo ko faatii e kareeli. Himo jaaboo lamnde Ibrahima Timbi Bah

E aseweere faltiinde, ɓiɓɓe Mauritanie tuumii konu Mali naatude e gure maɓɓe to keerol ɗee leyɗe ɗiɗi, e nder wuro BOYJEJIT-JEKDID tawaango e diiwal Hodh El Gharbi. Kono Lammu Mauritanie nantini wonndema ngoon Wuro ko Mali ngo jeyaa, hay so tawii yimɓe hoɗuɓe e maggo ɓee ko Moritaninaaɓe, ko Mauritanie kadi ɓe nootortoo. Sifa ɗum hino heewi ko yi’éte sera keerol Mauritanie e Mali e bi’ol Professeur Gourmo Abdoul Lo hertorɗo sariya , jannginoowo to iniwersite Nouakchott. Ko kanko woni koɗo men hannde. Himo jaaboo lamnde Ibrahima Timbi Bah

Benin, ko Romuald Wadagni fooli e ɗii suɓngooji hooreyaaku. Oo kandidaajo fedde laamuyankoore dañi 94% yeeso Paul Hounkpè heɓuɗo ko ɓaadi 6 %. Ko holli suudu toppitindu wote CENA, caggal limoore 90 % daaɗe wotuɓe. Romuald Wadagni lomtoto Patrice Talon caggal duuɓi 10 e hoore laamu. Hol saabi nguu polgu Romuald Wadagni ? Ko holɗum haani wonude golle makko arane ? Koɗo men hannde ko Mouley Isamel Diallo hertorɗo dawro. Himo jaaboo lamnde Ibrahima Timbi Bah.

Pape Léon XIV fuɗɗike hanki njillu ngu balɗe 11 e nder leyɗe 4 Afrique. Ko Algerie o fuɗɗori ngol dawol makko hankin. E nder Yewtere makko nde o waɗi Alger, Pape Léon XIV noddii yo jam tabitu e nduu adunaaru, konnaagu e ŋacce acca. Caggal Algerie, oo mawɗo nasaarankooɓe yahan Cameroun, Angola e Guinée Equatoriale. E ɗee leyɗe fow o yewtidano hooreeɓe dawla e diina. Faandaare ndee, ko tabintingol Jam e Ɓamtaare e nder Afrik, ko ɗum holli Abbé Léon Demba Boiro, preterjo Kolda e nder Sénégal. Himo Jaabo lamnde Ibrahima Timbi Bah...