Koɗo men hannde

Mali holli ñannde 15 nduu lewru wonndema konunkooɓe maɓɓe ɗiɗo waawi laawaade kuliyankooɓe joginooɓe ɓe e nder daakorde mooliiɓe e nder Mauritanie. Hollitol ngol ardiiɓe

Nouakchott yeddi. E bi’ol maɓɓe ɗee, ko tuume hoynooje ɗe alaa daliilu. Kono gila ɗeen, lurral no ɓeydoo tan hakkunde ɗee leyɗe ɗiɗi.

Mauritanie hajike durooɓe mun naatugol Mali, leydi ndin ardiiɓe mun nantini uddii ngol keerol waɗii lebbi. E ɗee jonte faltiiɗe ɗoo, konu Mali tuumaama warugol siwilɓe ɗuuɗuɓe. Woɓɓe e ɓeen waraaɓe ko Mauritaninaaɓe. Holko saabii ngal lurral? Ko holto ngol saatii tolnaade? Koɗo men hannde ko Amadou Samba Seck, mawɗo jaayndeyanke Mauritanie. Himo jaaboo lamnde Ibrahima Timbi Bah...

Guinée, kuliyankooɓe walla jihaadiyankooɓe ɗuuɗuɓe hino njooɗi e oogirɗe kaŋŋe gonɗe e nder perefektir Siguiri. Ko ɗum holli Dr Aliou Barry hertorɗo ndeenaagu, caggal nde ardiiɓe Guinée nantini nanngugol yimɓe 11 tuumaaɓe taweede e pelle kuliyankooje daakiiɓe Mali e Burkina Faso.

E bi’ol Dr Aliou Barry, ɓee kuliyankooɓe fuɗɗike irude peɗa e nder gure Guinée gonɗe keerol Mali. Himo jeertini ardiiɓe leydi ndii ɓamugol peeje baawɗe falaade oo bone. Ko kanko woni koɗo men hannde. Himo jaaboo lamnde Ibrahima Timbi Bah.

Mali, laamu leydi ndii accitii walla woppitii kuliyankooɓe timmuɓe 200 e ndee yontere saaliinde. Ɗum, ko ngam dartingol uddere nde kuliyankooɓe JNIM waɗi e hoore Mali. Uddere haɗunde ndii leydi e lebbi faltiiɗi heɓugol kuɓɓam walla karbiran. Huunde saabiinde caɗeele mawɗe e nder Mali.

Kono ngol yoppitugol ɓee kuliyankooɓe laatinike woɓɓe ŋalaw sabu hooreeɓe Mali no holli siifidataa sarti e pelle kuliyankooje. Holko saabi konunkooɓe Bamako ngoppiti ɓee kuliyankooɓe ? Mbele uddere kuɓɓam laatanike ɗee pelle kuliyankooje kaɓirgal hooreeɓe Mali ? Koɗo men hannde ko Dr Mamadou Sow, hertorɗo ndeenaagu, jannginoowo to iniwersite Nouakchott. Himo jaaboo e lamnde Ibrahima Timbi Bah....

Mauritanie, yimɓe IRA 7, daraniiɓe haɓugol maccungaaku hino soka waɗii jonte. E ɓeen debbo sowiiɗo gooto hino tawa. Ko caggal hollugolɓe wonndema cukalel deyel ngel duuɓi 11 hino maccina e nder Nouakchott, ɓe jagga. Suudu ñaawirdu laamorgo ngoo, hino tuumiiɓe huutorgol fenaande e tooñe, sabu e wiide mayru ngel cukalel deyel maccinaaka.

Ngal pellital hino metti daraniiɓe hakkeeji neɗɗanke ɗuuɗuɓe. Wano Kadjata Ba, depiteejo kiɗɗo, tawaaɗo e fedde IRA, holluɗo wonndema faandaare laamu Mauritanie ko deƴƴingol kala neɗɗo haɓoowo maccungaaku. Ko kanko woni koɗo men hannde. Himo jaaboo lamnde

Ibrahima Timbi Bah

Sénégal hollii waɗan wullitannde to TAS, suudu ñaawirdu Coftal-Ɓalli mawndu. Ɗum ko caggal nde suudu ñaawitirndu CAF, ƴetti pellital ŋalɗinngal. Ngal, ko ƴettugol deesewal CAN hitaande 2025 ittaa e juuɗe Senegal, jonna Maroc. Ngal pellital saabike tikkere e ŋalaw e nder leyɗe heewɗe e nder Afrik. Kanfory Lappé Bangoura, eeltuɗo ɗiɗɗal Guinée fuku koyngal,
kiɗɗo no tawaa e ɓee yimɓe ɓe ngal pellital ŋalɗini. Ko kanko woni koɗo men hannde. E bi’ol makko ɗum ɗoo hino waawi tunninde innde duunde Afrik ndee fow. Heɗoɗen mo e faandu haala Ibrahima Timbi Bah

Ko ñalaw mawɗo... Koko meeɗa waɗde e taariika fuku koyngal. Deesewal CAN hitaande 2025 ittaama e juuɗe Senegal, jonnaama Maroc. Ko suudu ñaawitirndu CAF, ƴetti ngal pellital hankin. Ɗum ko caggal nde Maroc waɗi wullitannde ɗiɗiɓere to Fedde Afrik toppitiinde fuku koyngal. Ñannde timmal CAN feƴƴuɗo jiɓɓuru waɗuno hakkunde fijooɓe Senegal e Maroc. Kono ɗiin haɗaano timmal ngal joofude. Senegal foolirno Maroc loggol gootol ka wakati ɓeydaaɗo. Gila ndeen pooɗondiral dartaaki hakkunde ɗee leyɗe ɗiɗi e banŋe laton balon. Ngam taskugol ngal pellital, Ibrahima Timbi Bah hino jaɓɓii Yoro Mangara, jaayndeyanke coftal-ɓalli mawɗo. Heɗoɗen ɓe....

Guinée, waɗii lebbi kaaki kaalisi hino metti heɓude e nder leydi ndin. Hay jogiiɓe kaalisi ka bankuuji alaaɗi e heɓtude. Ka fewndiiɗoo, hay gooto waawa yaltinnde e banki kaaki kaalisi ɓurɗi miliyone Francs-guinéen, limoore fawnde e 100 euros. Ndee ŋakkere kaaki kaalisi hino saabani guinenaaɓe e sosiyeteeji heewɗi sonnja. Hol saabii ndee sakkere kaaki kaalisi ? Hol
saabi peeje ɗee laamu nguu ɓami ɗeen waawaali dartinnde ndee ŋakkere ? Ko holɗum haana waɗeede ? Koɗo men hannde ko Safayiou Diallo, hertorɗo faggudu. Himo jaaboo lamnde Ibrahima Timbi Bahh.

To Guinée, eɓɓoore Simandu ina battini no feewi e ɓesnguuli saraaji maayo ngo. Tuundi ndiyam, gese, e maaje keewɗe puɗɗiima bonde. Galleeji gonɗi e saraaji ɗii mbaɗii peri. Ko ndam nguurndam teskaa immoraade e Beyla, tuugnaade e ciimtol ngol ONG Action mines Guinee ɓayyinii, tawi ko tefoore nde ɓe mbaɗi e battane tariindi eɓɓoore simandou.

Nokkuuji keewɗi ɗo ɓesnguuli ɗii njogino ngartam wasaama. Ko ɗum yiyaa, to bannge worgo leydi ndii faade port minerai gonnɗo to Moribayah. Koɗo men hannde, ko Mamadou Lamarana Diallo, tammbiiɗo eɓɓooje ndee fedde Action Mine Guinee, ina fammina holno ndee eɓɓoore Simandu battiniri e ɓesnguuli gonɗi e ŋoral wonɓe saraaji ɗii. O yewtidii e Mamadou Adama Diallo.

Yarugol e yeeyugol kokayiin ɓeydike sanne e nder diiwal hirnaange Afrik. Ko ɗum holli ciimtol ngol fedde adunayankoore daraniinde haɓugol boneeji yaltini e ndee yontere. E bi’ol Gi- TOC 30% kokayiin naadaaɗo Erop ko e ngal diiwal rewi. Ko ɓeydii ɗon, ko timmi toonuuji kokayiin 30 nanngaama e nder leyɗe hirnaange Afrik e ndee hitaande faltiinde.

Holko saabii ɓeydagol Yarugol e yeeyugol kokayiin e nder diiwal hirnaange Afrik ? Ko yimɓe honɓe woni caggal oo bone? Mbele woɓɓe e ardiiɓe leyɗe ɗee hino tawa? Koɗo men hannde ko Mouhamadou Kane, gooto e yaltinɓe ngol ciimtol. Himo jaaboo lamnde Ibrahima Timbi Bah

Guinée, fusugol pelle politik, ko pellital teddingal sariya leydi ndin. Ko ɗum holli guwerneman Guinée ngam jaabagol ngullitaali caggal fusugol pelle politik taarikayankooje leydi ndin fow. Baale politik e sosiyete siwil nantini wonndema ngal pellital ko lunndiingal sariya, haɓirngal wellitaare.

Huunde nde Mori Sanda Kouyaté jaagorɗo toppitiiɗo jokkondire hakkunde Guinée e Leyɗe janane. E bi’ol makko ngal pellital sappaaki neɗɗo, ko fawiingal e sariyaaji Guinée. Ko holno ngal pellital faamirte ? Mbele ko fewnirngal alhaali politik walla ko haɗirngal dawroyankooɓe woɓɓe tawegol e suɓngooji arooji ? Koɗo men hannde ko Mouley Ismaël Diallo, hertorɗo dawro. Himo jaaboo lamnde Ibrahima Timbi Bah...