Koɗo men hannde

Côte d’Ivoire heɓii ɓunndu kuɓɓam hewru. Ko ɗum holli ardiiɓe leydi ndii. Nduun ɓunndu ndu ɓe noddiri « CALAO South », no jogii ko timmi barilɗe miliyaar gooto. Ko ngol ɗoo woni laawol 4ɓol Côte d’Ivoire hino yiita ɓulli karbiran e nder ɗii duuɓi 5 sakkitiiɗi. Faale hooreeɓe Côte d’Ivoire ko semmbingol darnde ndii leydi ko faati asugol gaz e karburan, oogirɗe ɗe ɓe woni e asude waɗii duuɓi seeɗaaji. Ko holɗum nduu ɓunndu hewru ɗoo addanta Côte d’Ivoire ? Tawsi ndu ɓamtan faggudu ndii leydi ? Hannde tawsi Côte d’Ivoire no jogii bawka waylugol ɗee orgiɗe e nder ndii leydi maɓɓe ? Koɗo men hannde Mamadou Falilou Diallo, fagguduyanke jannginoowo iniwersite. Himo jaaboo lamnde Ibrahima Timbi Bah.

Hooreejo Niger, general Abdourahamane TIANI timminii, altine jawtuɗo, njillu balɗe ɗiɗi to Alger, lamorngo Algerie. Oo waɗi ngol dawol ko e noddaango gardiiɗo Algerie Abdelmadjid Tebboune. Hooreeɓe leyɗe ɗiɗi ɗe ciifi nanondire keewɗe ngam ɓeydude gollidal hakkunde leyɗe maɓɓe ɗiɗi ɗee. Ardiiɗo Niger oo waɗi nguu njillu ko balɗe seeɗa caggal njillu ardiiɓe Algerie to Burkina Faso. Ɗum fof waɗi ko hitaande caggal luural hakkunde leyɗeele AES tati ɗee e Algerie, caggal ko Mali tuumi Algerie liɓde drone mum. Holno mbaawirten faamirde nguu njillu mawndu general Abdourahamane Tiani to Algerie? Mbele nguu njillu maa woot ko wayli e jokkondiral hakkunde Mali e Algerie, e oo sahaa mo Mali jokki e tuumde Algerie wallude kuliyankooɓe ?

Hannde, eɗen njaaɓi Hamassoulé DIALLO, hertoriiɗo Politik. Omo jaabo e naamɗe Minati DIALLO

Dental Leyɗe Afrik, UA holli annuye dartinan rewgol e ciwlo laamu ngam ƴaɓɓagol e hooreyaaku leydi wonndude e dartingol kareeli e nder Afrik. Ngam laatingol ɗum, mawɓe leyɗe Afrik nantini ɓeydanan ngoomuuji daraniiɗi jam cemmbe. Ko e nguu mbatu waɗungu e ndee lannoode yontere Addis Abeba, ɓe waɗi ngol hollitol. Tawsi Dental Leyɗe Afrik, UA no waawi waɗude ɗee golle walla ɗum haaɗay e haala tan ? Ngam jaabagol ngal lamndal, Ibrahima Timbi Bah, hino jaɓɓii Professeur Mamadou Youry Sall jannginoowo to iniwersite Gaston Berger mo Saint Louis. Ɓee ɗiɗo taskike kadi toɓɓere faatiinde e eɓɓoore Ghana waɗde wullitannde ONU ngam yo maccangaaku faade e Afrik laato bone ɓurɗo mawnude e taariika nduu adunaaru. Heɗoɗen

Etats-Unis hino jokki ɓiƴugol hooreeɓe Nigeria e pelle sosiyete siwil goɗɗe. E bi’ol ardiiɓe Amerik, ɓeen hino waɗude fitinaaji e hoore nasaarankooɓe. Ko ɗum saabi yo Washington naɓu konunkooɓe, waɗa piyanɗe e nder ndii leydi. Ko ɓeydii hen, depiteeɓe Etats-Unis ɗiɗo moƴƴini eɓɓoore sariya fawirnde jukkooje e hoore pelle sosiyete siwil e yimɓe woɓɓe sabu tuumugol ɓe saabagol ɗii fitinaaji fewtuɗi nasaarankooɓe.

Tuume ɗe ardiiɓe ɗeen pelle fulɓe yeddi. E bi’ol Bello Aliyu Gotomo, ardiiɗo fedde Miyettii Allah, ɓee Ameriknaaɓe anndaa ko

fewndii Nigeria. Ko kanko woni koɗo men hannde. Bello Aliyu Gotomo hino jaaboo lamnde Ibrahima Timbi Bah.

Hannde koɗo men ko Imam Mahmoud Dicko. Oo neɗɗo mawɗo malinaajo hino dogi leydi makko fattii Algerie sabu lurral makko e konu ardiingu Mali. O yewtidii e Abdoulaye Dicko Mauritanie e nder jonnde afrikyankoore fawiinde e Jam, wonnde e waɗude Nouakchott.  Ebi’ol Imam Mahmoud Dicko, ko kaaldal tan waawi dartinnde fitinaaji e nder Mali. Ko ɗum si o ñaagii ardiiɓe Mali waɗugol jonnde hakkunde ɓiɓɓe leyɗe ɓeen wota bone oo ɓurtu mawnude. Sabu kulol no woodani Mali hannde, e yi’annde Imam Mahmoud Dicko. Heɗoɗen yewtere makko e Abdoulaye Dicko

Senegal, waɗii balɗe fitinaaji hino waɗde e nder iniwersite Cheick Anta Diop. E altine feƴƴuɗo, etidiyanjo gooto waraama e nder jaggondiral hakkunde ɓee janngooɓe UCAD e daraniiɓe deenaagu. Ko saabii ɗii seppooji ɓee etidiyanɓe ko waasde henndagol bursuuji maɓɓe. Sifa ɗii fitinaaji hino heewi ko waɗata e nder iniwersiteeji Afrik. Hol saabii hooreeɓe ɗee leyɗe ronku waawude yoɓde ɓee etidiyanɓe saaha haanuɗo on ? Hol saabii fitinaaji hino heewi waɗde e ɗii iniwersiteeji ? Koɗo men hannde ko Profeseer Abdoulaye Doro Sow, renndoyanko jannginoowo iniwersite. Himo jaaboo lamnde Ibrahima Timbi Bah.

Starlink ko sosiyete jonnoowo internet immiiɗo e satellite. Ko Elon Musk miliyardeerjo Ameriknaajo jey starlink. Hannde oo sosiyete hino e ɓuri leyɗe 20 e nder Afrik. E ɗeen Senegal woni leydi sakkitiindi jaɓɓagol Starlink e nder Afrik. Faandaare oo sosiyete, ko naadugol internet e aduna on fow haa hewta e nokkeeli loñiiɗi, ɗi koneksiyon ala e nder duunde Afrik. Taw si Starlink waawan tabintinngol internet e nder Afrik ? Hol senndi starlink e sosiyeteeji heddiiɗi ɗii? Koɗo men hannde ko Samba Diop karallo Internet. Himo jaaboo lamnde Ibrahima Timbi Bah.

Imminaaɓe Guinée, RD Congo e Kenya jaɓɓaama hanki Dawlaaji Ndentuɗi Amerik. Ɓe tawdaama e jonnde fawiinde e oorgirɗe hittuɗe, nde Donald Trump noddi. Faandaare Washington, ko newinngol henndagol ɗee oogirɗe mettuɗe heɓude, ɗe Chine fawi junngo e mun e nder leyɗe hewɗe saabii yo Etats Unis giddan ɗee jawle iriiɗe Afriknaaje ? Taw si ɓe waawan ballaade Chine, joogiiɓe doole e ɗen baŋŋe ? Ko Abdallah Oumarou, wilintinoowo jawle woni koɗo men hannde. Lamndal aranal ngal Ibrahima Timbi Bah waɗani mo no faati e Fuɗɗitagol program AGOA, eɓɓoore yaanannde Afriknaaɓe naadugol yeeyeteeɗi e nder Etats Unis ɓaawo yoɓugol saggale. Heɗoɗen.

République Démocratique du Congo, ko ɓuri yimɓe 200 maayi caggal unagol/joortugol leydi e nder oogirde, e ndee yontere faltiinde. Sifa ɗee mayɗeele hino heewi ko waɗata e nder Afrik. Hitaande kala ko yimɓe cappanɗe walla ujune woni e maayude e nder ɗee oogirɗe. Peeje ɗe hooreeɓe leyɗe Afrik ɓami waawaali tawo dartinde ɗii musibaaji. Holko saabi ɗiin dabareeji battinaali ? Holko haana waɗeede ngam ustugol ɗee maayeele e ɗee oogirɗe ? Koɗo men hannde ko Cherif Sow, hertorɗo kisal e nder oogirɗe. Himo jaaboo lamnde Ibrahima Timbi Bah.

Ko lappannde mawnde waɗi Niger e nder jemma 28 no weetude 29 nduu lewru 1ɓuru faltiindu. Ko yimɓe jogiiɓe kaɓorɗe yani e boowal laaɗe diwooje (ayropoor) Niamey. Caggal hare tiiɗnde, waɗboniyankooɓe ɓee, saabino fitinaaji mawɗi. Laaɗe weeyo siwilje 3 fellano. Konunkooɓe ardiiɓe Niger hollii wonndema ko France, Benin e Côte-d’Ivoire woni caggal oo bone. E bi’ol maɓɓe konunkooɓe Niger 4 barmii, kuliyankooɓe 11 nanngaama, 20 waraama, e ɓeen Faransinaajo gooto, e wiide maɓɓe. Kono, fedde kuliyankoore "Etat Islamik" hollii ko kañun waɗi ndee fiyannde. Nde yaltinii nate e widiwooji ndee hippannde. Ngam taskagol ndee fiyannde hiɗen jaɓɓii e oo sabaka Dr Mamadou Sow, jannginoowo to duɗal toowngal Nouakchott. Himo jaaboo lamnde Ibrahima Timbi Bah...