Koɗo men hannde

Gila ñannde 28 lewru faltiindu seppooji mawɗi hino jaali Iran. Ɗiin ko fuɗɗori ko hollugol mettu-ɓernde sabu satteendi ngurndam, si ɗi sakkitori laataade ŋiñirɗi laamu Iran. Seppooɓe teemeɗɗe walla ujune waraama si en tuugike e limoore pelle ɗe humondiraa e laamu. Kono kabaaruuji laaɓuɗi hino saɗti heɓude Iran hannde sabu hooreeɓe leydi ndin taƴi talifon e
internet. Ko holɗum woni caggal ɗii seppooji? Taw si ɗii waawan liɓude laamu Iran joɗiingu gila hitaande 1979? Holko wonata darnde Dawlaaji Ndentuɗi Amerik, caggal nde Donald Trump hajii laamu Teheran warugol ɓee seppooɓe ? Koɗo men hannde ko Anta Barry hertoɗo gollidal hakkunde leyɗe. Himo jaaboo lamnde Ibrahima Timbi Bah.

Moritani, rewɓe ina njokki haalde, kono haa jooni sariya oo reenaani ɓe no haanirta nii. Darnde daraniiɓe hakkeeji aadee fof e maantinde, eɓɓaande sariya ngam haɓaade bonanndeeji baɗeteeɗi e rewɓe ina heddii e uddaade. Holko waɗi waylude miijooji e sariyaaji ina saɗi? Hannde, eɗen njaɓɓii Aysé Sy. Ko o karallo jokkondiral, kadi daraniiɗo, omo hiña caɗeele kaɗooje ñaawoore ndee yahrude yeeso ngam kisal debbo. O hollitii no moƴƴiri wallitde rewɓe yanateeɓe e no sukaaɓe ɓee mbaawirtee fammineede ngam natta fawde rewɓe ɓee ko woodaani. Koɗo hannde ine jaɓɓii wootere e daaɗe daraniinde ndimaagu debbo saliinde deƴƴude, hono Ayse Sih o yeewtidi ko e Oumar Elhadj Thiam.

Guinée, ko famɗi wo yimɓe 528 woni ko maayi e nder asidanji e nder ndee hitaande faltiinde. Ndee limoore hino ɓeydori 33% si nde eɓɓindiraama e maayɓe e ɗii kasaaraaji e ndee hitannde 2024. Sabaabu on, ko dogdu ɓurtundu, welsindaaru soferɓe e yarugol maɓɓe ko bonnata hakkille. Ko ɗum holli nduu suudu halfinaandu kiwal e hoore laawi Guinée, no wi’e Agence Guinéenne de Sécurité Routière. Ko Amadou Diallo tawaaɗo e nduu suudu woni koɗo men hannde. Himo jaaboo lamnde Ibrahima Timbi Bah….

E nder ndee duunde Afrik liɓe laamu ɗiɗi wonndude e eɓɓannde fogunde wootere waɗii e ndee hitaande 2025. Ɗum ko Madagascar, Guinée Bissau e Benin. Huunde hollunde wonndema demokarasi hino yaarude caggal e nder Afrik. E ɗee kitaale sakkitiiɗe ɗoo, konunkooɓe wonuɓe e ciwlaade laamu ɓee ala e jáɓude jonnitude hooreeyaaku leyɗe ɗee siwilɓe.

Wurin woɓɓe e maɓɓe no waɗude suɓngooji heddinayɗi ɓe e laamu. Oo alhaali ɗoo hino aanini daraniiɓe laamu potal. E ɓeen no tawa Yaya Diallo, tawaaɗo e fedde socialiste winndere naayoriinde nano. Oo, neɗɗo kadi ɓadiiɗo François Hollande, hooreejo France kiɗɗo. Ko kanko woni koɗo men hannde. Himo jaaboo lamnde Ibrahima Timbi Bah…

Mali, hooreejo laamu faddewu nguu nantinii wonndema e nder ndee hitaande hikka, eɓɓoore sariya faatiiɗo e pelle politik ndartete. Ngol hollitol waɗii saaha nde pelle politik malinaaje fow fusaa gila lewru 5ɓuru saaliindu. Mbele ɗee jewte saatiiɗe wurnitan golle pelle politik walla ɗii konnguɗi ko ɗaynirɗi tan ? Ngam jaabagol ngal lamndal e lamnde goɗɗe koɗo men hannde ko Sekou Niamey Bathily dawroyankeejo tawanooɗo e fedde politik IBK hooreejo Mali kiɗɗo. Heɗoɗen mo e faandu haala Sory IBRAHIM

Dental leyɗe adunaaru ONU teddinirii ndee hitaande 2026 hikka, durooɓe, egga-hoɗaaɓe. Ɗum ko ngam hollugol nafoore maɓɓe faade e ngurndam nduu adunaaru wonndude e ɓanngingol caɗeele ɗe ɓe jogi. Ɗeen caɗeele hino ɓeydoo ñannde wo ñannde sabu mbayliigu weeyo. Ɗee caɗeele ko ɓuri lorriiɓe ko egga hoɗaaɓe diiwal Sahel. Hiɓe wuuri yooro, fitinaaji jogiiɓe kaɓirɗe e boneeji goɗɗi.

E bi’ol Mariama Sow, hertorɗo Duro, ngal pellital Dental Adunaaru ONU, no haana gollireede ngam heɓugol peeje hiwooje ɓee durooɓe, egga-hoɗaaɓe. Ko kanko woni koɗo men hannde. Himo jaaboo lamnde Ibrahima Timbi Bah

Donald Trump fooli Nicolas Maduro e nder ndee hare maɓɓe. Caggal konnguɗi muusɗi hakkunde oo hooreejo Etats-Unis e honoroojo mo Venezuela, konu Dawlaaji Ndentuɗi Amérik fawi junngo e hoore Nicolas Maduro. Gila e asewe hino mo e nder kaso New- York. Donald Trump no tuumimo wonugol e hoore ngoomu yeeyoowu doroogu.

Ngam faamugol no oo alhaali yaari, ko wonata battane makko e hoore Venezuela wonndude e nduu adunaaro, koɗo men hannde ko Dr Aboubacar Sidy Sow, jannginoowo to iniwersite Loyola, Chicago. Himo jaaboo laamɗe Ibrahima Timbi Bah.

Guinee, laamu faddewu nguu hino e laawol timmugol. Général Mamadi Doumbouya suɓaama hooreejo ndii leydi e ɗee woote ɗe lunndiiɓe laamu nguu, anndaaɓe ɓee fow tawaaka. So en tuugike e njaltuɗi ɗin, o heɓii ko fawi e daaɗe 86 e nder teemedere wel. E ɗii duuɓi 4 ɗi o laami Guinee, Général Mamadi Doumbouya holli eɓɓooje heewɗe ngam waylugol ngalu leydi ndin wonndude e alhaali politik mayri. Kono ko ɓuri teeŋtude e ɗii duuɓi 4 kadi ko ŋakkere teddingol hakkeeji neɗɗanke e fitinaaji faade e yimɓi sosiyete siwil e politik. Taw si o waylan no o laamori ndii leydi e ɗii 7 aroji ? Tuugaade e eɓɓoore makko fagguduyankoore Simandou, tawi Général Mamadi Doumbouya waawan waɗude Guinée e laawol ɓamtaare ?

Koɗo men hannde ko Lansana Camara, mawɗo jaayndeyanke Guinée. Himo jaaboo lamnde Ibrahima Timbi Bah.

Ko ɓuri ɗannatooɓe 3 000 immorɓe daande maayo Afrik maayi walla majji e nder ndee hitaande hikka. Ko ɗum holli fedde nde wona laamuyankoore wi’eteende Caminando Fronteras. Ko saabi mayde maɓɓe, ko anngal faabotooɓe e ŋakkeere ɗaɓɓitooɓe ɗannotooɓe ɓe laaɗe mun yooli ka nder maayo. Ko ɗum holli ndee fedde.  Nde ɓeydi wonndema, ɓee ɗanniyankooɓe hino ɗaɓɓude laawi kesi woɗɗuɗi ngam yahugol Europe. E ɗiin no tawa laawol immoragol Guinée. Laawol hakkunde Guinée e Europe no abbii e 2 000 km. Hingol ɓuri ɗii laawi heddiiɗi woɗɗude. Ngam taskagol ngol ciimtol caminando fronteras e alhaali ɗalle ɗe rewaani sariya, koɗo men hannde ko Elhadj Mohamed Diallo, hooreejo fedde Guinée haɓoore ɗee ɗalle ɗe rewaani sariya. Himo jaaboo lamnde Ibrahima Timbi Bah.

Senegal, ko famɗi fof rewɓe sappo e njoyo (15) mbaraama e nder dewle maɓɓe e ndee hitaande 2025. Ɗii warngooji keewɗi poti gasde haa laaɓa. Ko ɗum woni wulaango pelle sosiyete siwil keewɗe. E nder winndannde nde pelle keewɗe daraniiɗe hakkeeji rewɓe mbaɗi, ngam ɗii fitinaaji ndartoo, sariyaaji keewɗi ina poti wayleede. Eɓe ñaagii nde ardiiɓe leydi ndii e tugaale renndo ngoo ndaratoo ngam dartinde ɗii musibaaji baɗateeɗi e dow rewɓe. Ngam yeewtude e ndee toɓɓere, koɗo men hannde ko Aminata Diallo, debbo daraniiɗo hakkeeji rewɓe, jeyaaɗo e waɗɓe winndannde ngam dartinde ɗii fitinaaji ɗi rewɓe ɓee nguuri.

Omo jaaboo e naamɗe Ibraahiima Timmbi Bah