Koɗo men hannde

Sénégal, Bassirou Diomaye Faye, ƴami wonndiiɓe makko semmbingol kawtital makko Diomaye président. Oo hooreejo leydi yamiri yo ngal waɗane calɗi e nder leydi ndin fow. Ko e ngal kawtital o rewruno ngam laatagol hooreejo leydi e hitaande 2024, sabu e on sahaa fedde politik makko PASTEF hino radaa.

Ɗii konnguɗi teskoraama wa pooɗondiral hakkunde Bassirou Diomaye Faye e hooreejo jaagorɗo makko Ousmane Sonko, aadiiɗo taweede e suɓngooji hooreyaaku arooji. Hino hasi ko ɓee dawroyankooɓe ɗiɗo serta. Sabu ngal lurral

maɓɓe hino faati e suɓngooji saatiiɗi e hitaande 2029. Mo bee maɓɓe no faale wonnde kanndidaajo. Ɗii ko konnguɗi Mariama Selly Kane, jaayndeyankeejo taskotooɗo politik. Ko kanko woni koɗo men hannde. Himo Jaaboo lamnde Ibrahima Timbi BAH.

Ñinnugol pellitte suudu ñaawirdu CEDEAO hino ŋakki. Ko jamirooje mayru 20% leyɗe hirnaange Afrik woni e teddinnde. Ɗum no laatani nduu suudu wonndude e pelle daraniiɗe hakkeeji neɗɗanke annde mawnde. Ko yimɓe ɓe wullitanɗe mun nootaaka e ñaawirɗe leyɗe maɓɓe woni e wullitaade e nduu suudu CEDEAO.

Waasere mayru wallugol ɓeen, ɓe heɓta hakkeeji maɓɓe ko annde mawnde. Ko ɗum holli meeter Halimatou Camara, awokaajo. E bi’ol makko, oo alhaali hino haana ndarteede. Ko kanko woni koɗo men hannde. Himo jaaboo lamnde Ibrahima Timbi Bah...

Macky Sall laatoto kandidaajo ngam dañugol hooreyaaku Dental Adunaaru ONU. Oo hooreejo

Senegal kiɗɗo wallini piilol makko. Évariste Ndayishimiye, hooreejo Burundi e Dental Leyɗe Afrik UA hino tammbi ngol piilol Macky Sall. Haa hannde hooreeɓe Sénégal alaa ko nantini ko faati e ndee toɓɓere. Holko saabi ndee deƴƴere maɓɓe ?

Tawsi Macky Sall hino jogii darnde ngam ardagol ONU, e o sahaa mo jiiɓuru e fitinaaji jaali e oo aduna? Mbele himo jogii fartaŋŋe laatagol hooreejo Dental Adunaaru ONU? Koɗo men hannde ko Mamadou Albert Sy, senegalnaajo hertorɗo dawro. Himo jaaboo lamnde Ibrahima Timbi Bah.

Konu Guinee nangi ko fawi e konunkooɓe e polisiiɓe 15 sierra-leonaaɓe e ndee yontere faltiinde. Ɓe jogiiɓe balɗe ɗiɗi si ɓe accitiɓe. Ko saabi nangugolɓeen ko lurral hakkunde Guinee e Sierra Leone faatiingal e keerol hakkunde ɗee leyɗe ɗiɗi. E nder duunde Afrik lurre fawiiɗe e keeri hakkunde leyɗe hino heewi. Holko saabii ɗen ? Ko holɗum saabii ardiiɓe
Afrik ronku ñippugol ɗe ? Ko holɗum haana waɗeede ngam tabintingol keeri hakkunde leyɗe Afrik ? Koɗo men hannde ko Alpha Ousmane Diallo, hertorɗo taariika Afrik. Himo jaaboo lamnde Ibrahima Timbi Bah.

Hare hakkunde Iran e Etats-Unis hino ɓeydoo tan tiiɗude. Ndee meemi leyɗe kawtalje Iran, wano Emirats Arabes Unies, Qatar walla Arabie Saoudite. Ɗeen leyɗe fow hino jaɓɓii daakorɗe Dawlaaji Ndentuɗi Amerik. Gila nde fuɗɗi yimɓe teemeɗɗe maayii. Holko saabii lurral hakkunde Iran e ɗee leyɗe hirnaangeyankooje ? Holko saabi jokkondiral hakkunde Iran e leyɗe kawtalje mun hino ŋakki ? Ngam taskagol oo alhaali hiɗen jaɓɓii Mamadou Racine Ly, jannginoowo to Iniwersite Gaston Berger Saint Louis. Himo jaaboo lamnde Ibrahima Timbi Bah...

Hare mawɗe hino jokki hakkunde Iran e Etats-Unis wonnude e Iran gila e ndee aseweere. Pellanɗe Amerik saabike maayde hooreeɓe Iran ɗuuɗuɓe haa hewti Ali Khamenei, mawɗo dawla leydi ndin. Téhéran, fodii yoɓtagol. Ɓe waɗii pellanɗe e hoore Israël kañun e daakorɗe Dawlaaji Ndentuɗi Amerik wonuɗe e nder leyɗe seraaji Iran, wano Arabie Saoudite, Qatar e Eméritats Arabes Unies.

Ko holto ndee hare tolnoto ? Taw si nguu laamu Iran ko e ngol laawolɗo gasata? Taw si ndee hare layan e leyɗe kawtalje Iran? Koɗo men hannde ko Aboubacar Sidy Sow, jannginoowo to iniwersite Loyola, Chicago. Himo jaaboo lamnde Ibrahima Timbi Bah.   

Nigeria, siwlo yimɓe e fitinaaji wonuɗi e saabaade maayɗeeli no tiiɗi e nder ndii leydi. Ko timmi yimɓe 230 waraama e nder Nigeria e nder balɗe 20 arane nduu lewru ɗiɗaɓuru, e limoore fedde Amnesty. Ko pelle jogiiɗe kaɓirɗe woni caggal ɗii boneeji. Ɗeen pelle hino siwlo walla diftoo yimɓe sahaa kala, ƴama kaalisi ngam accitugolɓe. Jaaynde AFP, holli wonndema ko guwerneman Nigeria yoɓi miliyonji ɗuuɗuɗi dollars, ngam heɓtugol sukaaɓe 230 ɓe Boko Haram jogino. Haysi laamu Abuja yeddii oo kabaaru, hertorɓe deenaagu ɗuuɗɓe googinii wonndema ko kaalisiiji heɓiiɗi e nder diftanɗe okki ɗee pelle doole. Hol saabi fitinaaji e diftagol yimɓe no ɓeydo tan Nigeria ? ko feere honnde dartinta ɗum ? Koɗo men hannde ko Porofesoor Aboubacar Abba TAHIR jannginoowo to Prime University Abuja. Himo jaaboo lamnde Ibrahima Timbi Ba.

Enerji solaire, ɗum ko kuuran immiiɗo e naange hino gollireede sanne e nder Afrik. Oon kuuran immiiɗi e naange hino gollireede ka cuuɗi, a sosiyeteeji, ka ca’e e ka koɗooli. Gollirgol oon kuuran "solaire" ɓeydiima 54 e nder 100 kala e hitaande 2025, e nder duunde Afrik, e limoore Global Solar Council. Holko saabi ngol ɓeydagol ? Hol woni nafoore Energie solaire ? Tawsi Afrik hino waawi rewnade e ngee naange ngam ɓamtugol kuuran e ndee duunde? Koɗo men hannde Abdourahmane Sanogo, hertorɗo enerji solaire. Himo jaaboo lamnde Ibrahima Timbi Bah.

Hannde waɗii duuɓi 4 gila Russie yani e Ukraine. Ndee hare tiiɗnde saabiike maayeele ciwilɓe timmuɓe 15 000, e liimoore dental adunaaru ONU. Limoore lorriiɓe e mayre hino timmi miliyonji ɗiɗi. Haa hannde eɓɓooje Ameriknaaje dartinirɗe ndee hare waawaali battinnde. Faale Russie ko henndagol diiwe goɗɗe jeyaaɗe e nder Ukraine. Eɓɓoore nde
Kiev sali e dow ballal hooreeɓe Erop. Ko holno ngal lurral ñippirte ? Tawsi Russie waawana henndaade ɗeen diiwe ? Tawsi ndee hare hino waawa dartaade e ɗii dumunnaaji arooji ?

Koɗo men hannde ko Dr Aboubacar Demba Diaby, jaŋnginoowo e duɗal toowngal, kadi hertorɗo dawro. Himo jaaboo lamnde Ibrahima Timbi Bah..

Batu mawngu fawiindu e Hakkille Tafaaɗe waɗii e ndee yontere faltiinde to New Delhi, laarmorgo Inde. Google, OpenAI e Meta, ɗii sosiyeteeji mawɗi e oo bannge fow tawanooma ngal tummbondiral. Faandaare maggal ko newinngol keɓal e ɓamtal Hakkille Tafaaɗe e nder nduu adunaaru fow. Ka fewndi ɗeen ɗoo, ko Etats-Unis e Chine ɓuri jogaade doole e ngal gaalal. Ko honto Hakkille Tafaaɗe tolni walla fewndi e nder duunde Afrik ? Ko holno leyɗe Afriknaaje waawirta gollirde Hakkille Tafaaɗe ? Koɗo men hannde ko Mamadou Dian Diallo, hertorɗo Hakkille tafaaɗe. Himo jaaboo lamnde Ibrahima Timbi Bah.