Koɗo men hannde

Koolol kaan noddirteengol Festival de Cannes hino waɗde France gila e ndee talataare faltiinde. Ngol, hino tummbondiri yimɓe ɗuuɗuɓe dillooɓe e fannu sinema. Faandaare ngal kawrital ko tottugol mbuuñaaji mawɗi yimɓe fewnooɓe walla moƴƴinooɓe filmuuji. Hitaande kala hingol waɗa.

Kono hikka, hay film afriknaajo gooto tawaaka e foolotiro ɓurngo mawnude e ngol koolol. Hol ko saabi ɗum? Hannde, ko holno sinema afrik fewndori? Mbele sinema Afrik no e laawol ɓamtaare? Koɗo men hannde ko Moussa Diallo, jannginoowo, moƴƴina, fewna filmuuji. Himo jaaboo laamnde Ibrahima Timbi Bah..

Tchad, ko timmi konunkooɓe 26 waraama e fuɗɗoode nduu lewru. Ko fedde kuliyankoore humiinde e Boko Haram saabi ndee fiyannde hulɓiniinde. Ngam huɓindagol oo bone, laamu Tchad mooɓondiri konu mun e nder prowins du Lac gila ñannde 7 nduu lewru. Gila ndeen, konu Tchad hino jokki haɓugol Boko Haram. Hol ko saabii ndee fedde waawi warude ɓee konunkooɓe e keewal? Mbele cemmbe mayre hino ɓeydi?

Mbele konu Tchad tan hino waawi haɓude Boko Haram, walde jooɗiinde e leyɗe diiwal suriire Tchad fow? Koɗo men hannde ko Dr Kabirou Ɗanlaadi Lawanti, hertorɗo ndeenaagu. Himo jaaboo laamnde Ibrahima Timbi Bah..

Africa forward, pottital Afrik /France gasan hannde Nairobi, Kenya. Ko ngol woni laawol aranol ko ndee jonnde ene waɗa e nder leydi gollirayndi ɗemngal Angele. Hannde, ko hooreeɓe leyɗe Afrik e ardiiɗo France waɗata jonnde fawiinde e kisal e ngalu. Hankin, ko fagguduyankooɓe heewɓe tummbondiri e ndee jonnde. Huunde hesere e taarika jonnde Afrik/France.

Hol ko saabi ngal baylal? Mbele France hino waawa tammbaade darnde maɓɓe ɗuytiinde doole e nder Afrik? Koɗo men hannde ko Alpha Ousmane Diallo, hertorɗo taarika Afrik. Himo jaaboo laamnde Ibrahima Timbi Bah.

Hannde eɗen njaɓɓi koɗo mo konnguɗi mun weeɓa heɓude. Oo neɗɗo nanngaaɗo waɗa kaso Burkina Faso e leegal Ouaga 2000. E ndee nokkuure, pelle daraniiɗe hakkeeji neɗɗanke anndinii wonndema lunndiiɓe laamu Burkina Faso Faso, no ndummbe leepte, fawe fitinaaji mawɗi.

Oo koɗo men hannde mo cuuɗɗen innde mun sabu kisal makko, naaddaama e ngoo kaso, leeptaama ko juuti. Caggal yaltugol makko en njewtidi e makko. Keɗo-ɗen mo o sifanoo en leepte waɗeteeɗe e nder ɗii kasooji ɗi hooreeɓe Burkina Faso moƴƴini e nder legal Ouaga 2000....

Yimɓe tato maayi, heewɓe woɓɓe ene ngonndi e nguu ñawu hantavirus. Ɓee yimɓe ko dawdunooɓe laana ndiyam faade CAP VERT. Nguu ñawu ko ɓooygu kaa ngu anndaaka sanne. Hantavirus na raɓta yimɓe ummaade e doomi tawraaɗi ɓii ngu ñawu. Ko paameten e Hantavirus? No ngu ñawu raaɓirta? No reenortoɗen e nguu ñawu. Pr Mamadou SOW, cawroowo to Guinée, hertorɗo ñawuuji raaɓooji yeewtidi ɗum e Rama DIALLO

Sénégal, pooɗondiral hakkunde Bassirou Diomaye Faye e Ousmane Sonko ɓeydike e ndee yontere. Hooreejo leydi ndin folli ƴettoowo konngol suudu laamordu nduu. Ousseynou Ly, oon follaaɗo ko neɗɗo ɓadiiɗo, Ousmane Sonko, oo hooreejo jaagorɓe. E ɗee balɗe sakkitiiɗe ɗoo, piiji heewɗi holluɗi faayondiral hakkunde Bassirou Diomaye Faye e Ousmane Sonko weeɓitaama e ɗii mejaaji.

Hol ko saabi ɗee pooɗondire ? Mbele ɓee ɗiɗo sakkitoran seedugol? Koɗo men hannde ko Ibrahima Anne, jaayndeyanke, taskotooɗo kabaaruuji. Himo jaaboo laamnde Ibrahima Timbi Bah

Yeeyeteeɗi Afrik naɓeteeɗi Chine accaama yoɓaneede sagalle gila fuɗɗoode nduu lewru 5ɓuru. Ko saabi ngal pellital Pékin, ko semmbingol gollidal ko faati e ngeygu hakkunde Chine e leyɗe 53 Afrik. Ka fewndi hannde ɗoo ko Chine ngal jokkondiral woni ɓurɗe nafude. Taw si ngal pellital waylan oo alhaali ? Ɗum wonaa ko weeɓi e bi’ol Safayiou Diallo, hertorɗo faggudu. E yiyannde makko ko Chine ɓurta nafitorde ɗee sagalle ittaaɗe. Heɗoɗen taskaare makko e faandu haala Ibrahima Timbi Bah

Hakkeeji e wellitaare gollooɓe teddinaaka e nder leyɗe ɗuuɗuɗe Afrik. Ko ɗum holli Hadja Mariama Penda DIALLO, sindikalistjo mawɗo ndee duunde Afrik. Woni ko njoɓdi maɓɓe, cellal maɓɓe e teddingol ndimaagu maɓɓe... hakkeeji ɓee gollooɓe heewɗi hino yeebeede, e bi’ol oo jaagorɗo kiɗɗo Guinée, toppitiiɗo golle. Ko rewɓe ɓeen ɓura lorraade.

Heewɓe e maɓɓe, njoɓdi mun hino famɗi, hiɓe cukkeede kadi e golle maɓɓe. Laamuuji Afrik hino haani ƴettude peeje ngam hiwgol ɓee gollooɓe, ko ɗum woni waaju Hadja Mariama Penda DIALLO. Ko kanko woni koɗo men hannde. Himo jaaboo laamnde Ibrahima Timbi Bah...

Mali, Jeneral Assimi Goita yaltii e deƴƴere mun e ndee talaataare kiikiiɗe. E nder yewtere ka telewisiyon, oo hooreejo nguu laamu faddewu, hollitii wonndema ɗee fiyanɗe waɗuɗe e nder ndii leydi huɓindaama. O waɗii ɗii konnguɗi caggal nde nanantiiji faatiiji e mbawka makko heddagol e laamu, jaalii. Mbele, ndee yewtere artiri hoolaare e laamu makko, caggal ɗee fiyanɗe saabiiɗe mayde jaagorɗo makko toppitiiɗo ndeenaagu? Mbele haa hannde juuɗe Assimi Goita hino huuɓiti nguu laamu? Ko holno o dartorta ndee hare ɓee murtuɓe heɓtuɓe Kidal, wunndude e kuliyankooɓe waɗuɓe uddere e hoore Bamako? Ngam jaabagol ɗee lamnde Ibrahima Timbi Bah hino jáɓɓii Boubacar Sanso Barry jaayndeyankooɓe, taskotooɗo kabaaruuji. Keɗoɗen.

France, Gila e hitaande aroore ndee cuggu jannde iniwersite ɓeydanaama etudiyanɓe janamɓe. Nguun coggu sowindiraama ko ɓuri laabi sappo. Wano Licence ko yoɓetenoochitaande kala 175 €, wattaama 2 895 euro. Jannde master yoɓantenoode 250 € hitaande,cjooni ko 3 941 € nde yoɓante. Ndee ɓeydannde addanan etudiyanɓe Afrkinaaɓe wonuɓe France caɗeele tiiɗe. Ko ɗum holli Mamadou Ly, cukko hooreejo fedde Senegalnaaɓe janngooɓe France. Ko kanko woni koɗo men hannde. Himo jaaboo lamnde Ibrahima Timbi Bah