Koɗo men hannde

Sénégal e FMI, suudu winndere ñawlooru kaalisi, haa hannde heɓaali kawral faatiingal e ñamaande ɓurtunde nde ndii leydi ñawlii. Hannde, nden ñamaande ɓamaande saaha laamu faltiingu, hino timmi 132% faddudu Sénégal. Guwerneman kiɗɗo mo Ousmane Sonko ardino, jaɓaano waylude noone no ndee ñamaande yoɓirte. Gila e tenin faltiiɗo, FMI no immini
karallooɓe mun Dakar ngam jokkitagol ɗeen njewte. Mbele oo guwerneman keso mo Amadou Al Amine Lo, fagguduyanke, ardii jaɓan eɓɓooje FMI ? Mbele ɓe heɓan kawral e ɗee balɗe arooje ɗoo ? Koɗo men hannde ko Dr Abdourahmane Ba, hertorɗo faggudu. Himo jaaboo laamnde Ibrahima Timbi Bah.

Succès Masra, oo lunndiyankeejo Caadnaajo, hino haana acciteede, ɗii ko konnguɗi Saleh Kebzabo. Oo dawroyankeejo mawɗo Tchad, suɓaaɗo e oo sahaa diiseteeɗo Dawla leydi ndii nantinii wonndema jaggugol dawroyankooɓe artirtaa jam e nder leydi. Ko Saleh Kebzabo woni koɗo men hannde. O yeewtidii e Ibrahima Niang. O holli yiyannde makko e toɓɓe keewɗe pawiiɗe e alhaali renndo Tchad

Koɗo men hannde ko Ousmane Sonko. Oo ardiiɗo suudu mbatu mawngu Sénégal, holli yi’annde mun e toɓɓe heewɗe: Ceerngal makko e Bassirou Diomaye Faye, alhaali ñamaande Sénégal, sariya haɓirɗo luutiyankaagal haa hewti golle ɗe o aadi waɗude to parleman, ala toɓɓere nde o acci. Heɗoɗen ndee yewtere nde Léa-Lisa westerhoff mo rfi faransiire e Marc
Pelerman mo F24, waɗi.

Deesewal fuku-koyngal adunaaru fuɗɗoto hannde. Ko yerondiral hakkunde ɗiɗɗal Mexique e Afrique du Sud, udditata ngal kawrital e yamnde 19H, hannde kiikiiɗe. Ko kippuuji 48 tawa e maggal e ɗiin 10 ko kippuuji Afrik. Ko e nder leyɗe tati ngal deesewal wona e fijeede, ɗeen ko Mexique, Etats Unis e Canada. Ngam taskagol fartanŋe kippuuji tawaaɗi e ngal deesewal,
faamina sartiiji kesi ɗii FIFA ɓami, hiɗen jáɓɓii Aboubacry Ba, jaayndeyankeejo hertorɗo coftal ɓalli. Himo jaaboo laamnde Ibrahima Timbi Bah.

Guinée, waɗii balɗe ko hulol woni e nder leegal Nongo e nder Conakry, laamorgo ndii leydi. Pecci mawɗi hino yaltude e maadiiji cuuɗi wonndude e laawi ndeen nokkuure. E ɗee balɗe faltiiɗe, woodi koore walla suudu uniindu caggal feccagol maadi mayru. E nder ciimtol, guwerneman on maadinii wonndema ko asugol foorasiiji e nder ngal leegal saabii feccagol ɗii cuuɗi. Huunde hulɓiniinde. Ngam taskagol oo alhaali hiɗen jaɓɓii hannde Ibrahima Sory Idrissa Diallo, géologjo, jogiiɗo anndal leydi. Himo jaaboo laamnde Ibrahima Timbi Bah...

Mauritanie, hooreeɓe leydi ndii ɓeydi coggu koɓɓam e nder ndee yontere faltiinde. Ko ngol ɗoo woni laawol 4ɓol, karbiran no ɓeyde e ndii leydi e nder ɗii lebbi 3 faltiiɗi. Ko ndee hare diiwal Moyen Orient saabi ngol ɓeydagol, e b’ol hooreeɓe Maurtanie. Hol saabi ndee hare Moyen Orient battini sanne e faggudu Mauritanie, leydi wonndi e yaltini gaz e karbiran ? Ko holɗum ngol ɓeydagol battinta e ngurndam ɓiɓɓe leydi ndin ? Koɗo men hannde ko Dr Abou Dieng, hertorɗo faggudu, jannginoowo to iniwersite Nouakchott. Himo jaaboo laamnde Ibrahima Timbi Bah...

Mali ɓami pellital toŋirngal naadugol, yeeyugol e rewnugol motooji e nder nokkeeli heewɗi e nder leydi ndin. Ko ca’e mawɗe ɗee tan woni tawaaka e ngal pellital. Yimɓe hoɗuɓe e ɗii dowriiji hino wonndi e annde mawnde caggal nde eɓɓoore ɓee hooreeɓe leydi. Ko ɗii motooji tan ɓe yiilorta. Mbele ngal pellital ustan rafi ndeenaagu e ɗii leydi? Mbele hooreeɓe ɓee hino jogii mbawka ñinnugol ngal ? Hol wonata battane maggal e ngurngam hoɗuɓe ka dowri?
Koɗo men hannde ko Jean-Hervé Jézéquel, hertorɗo ndeenaagu. Himo jaaboo laamnde Sory Ibrahim. Ko Ibrahima Timbi Bah e Moussa Oumar BARRY firti konnguɗi makko.

Oo hooreejo leydi kiɗɗo battini e ngurndam Sénégal gila ndii leydi heɓti ndimaagu mayri. O laatike lulndiiɗo
laamu ko ɓuri duuɓi 20, ado o suɓeede hooreejo Sénégal e hitaande 2000. O heddike e hooreyaaku Sénégal duuɓi 12. Ngam semmbingol ndee maanditaare, Bassirou Diomaye Faye, hooreejo leydi ndii, e sénégalnaaɓe heewɓe rennday hannde Dakar ɗo. Ngam yewtugol ndonu Abdoulaye WADE ko faati e demokarasi e ɓamtaare, koɗo men hannde Magate SY ardiiɗo yiilorde PDS toppitiinde suɓngooji. Himo jaaboo lamnde Ibrahima Timbi Bah...

Senegal, Bassirou Diomaye Faye darni guwerneman makko arano caggal ceergal makko e Ousmane Sonko, oo hooreejo jaagorɓe kiɗɗo. Oo kippu keso hino jogii jaagorɓe 30 jilluɓe. Woɓɓe e maɓɓe ko dawroyankooɓe, woɓɓe ko harralleeɓe. Hay si tawii Ousmane Sonko holli fedde makko politik PASTEF tawaaka, woodi jaagorɓe jeyaaɓe e ndee walde jaɓuɓe taweede e oo guwerneman. E bi’ol Dr Mansour Ly hertorɗo dawro, Bassirou Diomaye feññini
e suɓagol mo oo kippu keso wonndema ko ñawndugol caɗeele fakkudu Sénégal woni golle makko ɓurɗe himmude hannde. Ko kanko woni koɗo men hannde. Himo jaaboo laamnde Ibrahima Timbi Bah…

Gila ɓee yimɓe sosiyete siwil ɗiɗo siwlaa ñannde 9 lewru 7ɓuru hitaande 2024, hay gooto heɓaali kabaaru maɓɓe. Ko ɗum saabi yo pelle FNDC e Tournons la Page fuɗɗo orngal gila hankin ngam yo ɓee ɗiɗo accite. E b’iol Alseny Farinta Camara mo walde Tournons La Page, Foniké Mengué e Billo Bah haanaaka yijjiteede. Laamu Guinée hino haana ñoƴƴeede fii no goonga
yaltira e alhaali nanngugol ɓe ɗiɗo. Ko kanko woni koɗo men hannde. Himo Jaaboo lamnde Ibrahima Timbi Bah...