Koɗo men hannde

Guinée, gila Général Mamadi Doumbouya ari e laamu yimɓe 35 ciwlaama mutina. Ko ɗum holli kawtal, Tournons la Page e nder winndannde yaltinaande e ndee asewere faltiinde . E b’ol waɗuɓe ngoon wiɗto ko hooreeɓe Guinée woni e ciwlaade ɓee yimɓe lunndiiɓe laamu. Ciwlanɗe ɗe acca hay gooto : Hay mawɓe e sukaaɓe no difteede. Ngam taskagol ngol
ciimtol, hiɗen jaɓɓii Alseyni Farinta Camara, Tournons la Page Guinée. Himo jaɓɓoo laamnde Ibrahima Timbi Bah…

Guinée, hooreeɓe leydi ndin yaltinii golle, gollanooɓe laamu timmuɓe 6 678. Ɓeen ko gollooɓe maayɓe, gollooɓe accituɓe golle, gollooɓe wonuɓe e salaade yahude ka golle maɓɓe. Ko ɗum guwerneman Guinée holli. Ngal pellital wona ŋalɗinngal. Guyaale kaalisi rewnaaɗe e gollooɓe ɓe wooda, hino mawni e leydi Guinée, ko ɗum holli Profeseer Alpha Amadou Bano Barry, iniwersiteerjo wiɗtotooɗo, jaagoorɗo Guinée kiɗɗo. O yaltinii deftere ko ɓooyaali fawiinde e ndee toɓɓere. E bi’ol makko si ngoo wiɗto jokkitaama gollooɓe ɓe wooda heewɓe yiitete e doggol gollooɓe laamu Guinée. Ko kanko woni koɗo men hannde. Himo jaaboo laamnde Ibrahima Timbi Bah

Nigeria, Kuliyankooɓe diftike janngooɓe 37 e nder janndirde maɓɓe banŋe rewro nayaade fuɗnaange leydi ndin. Siwlagol sukaaɓe janngooɓe no ɗuuɗi ko waɗata Nigeria. Gila hitaande 2014, ko ɓuri 2 400 sukaaɓe janngooɓe ciwlaama e nder ndii leydi. Ko pelle jogiiɗe kaɓirɗe e baale kuliyankooje woni caggal ɗee ciwlanɗe. Hol saabii ɗee diftanɗe ? Hol saabi ko e nder
ɗii lekolji ɗe ciwlanɗe ɓurte waɗeede ? Ko holɗum ɗum battinta e jannde leydi ndin ? Koɗo men hannde ko Dr Kabirou Ɗanladi Lawanti, hertorɗo deenaagu. Himo jaaboo laamnde Ibrahima Timbi Bah.

Afrique du Sud, ko ujune ujune yimɓe seppi hankin e nder ca’e ɗuuɗuɗe e nder ndii leydi.
Ngoon seppo ko ngam raɗagol Afriknaaɓe wonuɓe e ndin leydi tawa ɓe jogaaki kaydi . Waɗi
lebbi pelle sosiyete siwil Afrique du Sud hino dari ngam raɗagol ɓeen ɗanniiɓe . Sabu ngol
kulol e fitinaaji wanaaɗi e faweede e maɓɓe, timmuɓe ujune 25 iwdi Ghana, Nigeria, Malawi e
Zimbabwe, hootiino e leyɗe maɓɓe. Ngam taskagol ngurndam Afriknaaɓe jooɗiiɓe Afrique du
Sud, hiɗen jaɓɓii Aboubacar Sidighi Bah, iwdi Guinée jooɗiiɗo Johannesburg ko ɓadii duuɓi
sappo. E bi’ol makko koko hulɓini woni e waɗude Afrique du Sud. Heɗoɗen mo e faandu
haala Ibrahima Timbi Bah...

Burkina Faso, dartini gollidal hakkune maɓɓe e France ko faati e diplomasi. Konunkooɓe ardiiɓe Burkina Faso holli ɓe waawa hankadi gollidude e France sabu ardiiɓe ndiin leydi hino dari bonongol nafooje maɓɓe. Konnguɗi ɗi Paris nantini ala ko fawi. Ɓooyi gollidal hakkunde France e Burkina Faso hino ŋakki. Kono ko holɗum saabi ngal ceerngal e o saaha ɗoo? Hol
firti dartingol gollidal hakkune leyɗe ɗiɗi e banŋe diplomasi? Ko holɗum ɗum battinta e ɓiɓɓe ɗee leyɗe ɗiɗi? Ngam taskagol ngal lurral hiɗen jáɓɓi hannde Hamoussoulé Diallo, hertorɗo dawro. Himo jaaboo laamnde Ibrahima Timbi Bah

Gila ñannde 18 lewru 6ɓuru hitaande 2027, haray Niger tawaaka e nder Suudu Ñaawirdu Winndere CPI. Konunkooɓe ardiiɓe Niger mbaɗani Dental Adunaaru ONU winndannde ngam maandingol ndeen eɓɓoore. Ko saabi ngal pellital e bi’ol maɓɓe ko waasde CPI waɗugol golle moƴƴe e huutorgol nduu suudu.

Konnguɗi ɗi Boussouriou Diallo, daraniiɗo hakkeeji neɗɗanke yeddi. E bi’ol oo ƴettoowo konngol fedde Guinée daraniinde CPI, ko saabi yo ɓee konunkooɓe ardiiɓe Niger yaltu CPI ko fii wota ñaawooje waɗe e dow boneeji maɓɓe. Ko kanko woni koɗo men hannde, himo jaaboo laamnde Ibrahima Timbi Bah...

Guinée toŋi yaltingol kanŋe ɗe honcinaaka walla waylaaka e nder leydi ndin. Ko ɗum Mamadi Doumbouya, hooreejo Guinée nantini e ndee yontere faltiinde. E bi’ol makko, ɓe moƴƴini mbaaylari honcinirndi kanŋe. Ko Nimba Gold Refinery woni innde mayri, ndi udditete e ɗee jonte arooje. Faandaare makko, ko yo oo miliyon 2 e 240 onces kanŋe aseteeɗo Guinée,
honcine e nder ndii leydi, ngam ɓamtaare faggudu mayri. Ko holɗum e nafoore ngal pellital jogani leydi Guinée ? Mbele hingal waawi laataade ? Koɗo men hannde ko Amadou Bah, hertorɗo oogirɗe. Ko kanko ardii fedde nde wona laamuyankoore, Action Mines Guinée. Amadou Bah, hino jaaboo lamnde Ibrahima Timbi Bah...

RD Congo, yimɓe laamu hino e laawol waylugol doosngal leydi ndin. E bi’ol maɓɓe, ɗum ko ngam semmbingol juɓɓule dawla RDC. Huunde nde yimɓe sosiyete siwil e lunndiyankooɓe njeddi. Kamɓe hiɓe holli wonndema yidde ardiiɓe leydi ndii, ko wallugol Félix Tshisekedi, heɓugol mannda tataɓo.

Ngal yeddondiral waɗii sahaa mo RD Congo, jogii caɗeele mawɗe, pawiiɗe e piyanɗe murtuɓe M23 e rafi Ebola. Fedde renndinnde mawɓe Nasaarankooɓe Congo, CENCO, noddi ardiiɓe leydi ndii dartingol ndee eɓɓoore maɓɓe waylirnde ngal doosngal. Mbele guwernaman on jaɓan nduu noddaandu? Mbele seppooji sosiyete siwil e lunndiiɓe laamu haɗay waylugol ngal doosngal leydi? Koɗo men hannde ko Dr Fabilou heertorɗo dawro, jannginoowo to iniwersite N’Gaoundéré, Cameroun. Himo jaaboo laamnde Ibrahima Timbi Bah.

Etats Unis e Iran ciifi kawral artirnayngal jam hakkunde ɗee leyɗe ɗiɗi e lannoode ndee yontere faltiinde. E toɓɓe jeyaaɗe e ngal kawral no tawa : dartingol hare ndee e baŋŋe o fow, udditugol laawol ormuz, ɓamtugol yagginanɗe fawaaɗe e hoore Iran, kañun e accitugol Téhéran moƴƴingol kaɓirɗe nucléaire. Ñinnugol ngal kawral wona ko weeɓata, e bi’ol Anta Barry, heertorɗo jokkondiral hakkunde leyɗe. Ko kanko woni koɗo men hannde. Heɗoɗen

taskaare makko e faandu Ibrahima Timbi Bah

Lebbi 3 caggal Dental Adunaaru ONU wotude sarti waɗuɗo maccangaaku bone ɓurɗo mawnude e taariika Bani Adama, Ghana waɗii eɓɓoore ngam yo leyɗe Afrik heɓtu hakkeeji maɓɓe. E nder ɗuuɓi 400 ɓiɓɓe Afrik maccinaaɓe, woɓɓe waraa, woɓɓe difta naɓa gollina e gese, jawle Afrik iriiɗe jatta naɓa leyɗe porto. Ko sabu ɗii boneeji fow Ghana aadi daroto haa
leyɗe Afrik jonnite joɓtaari walla ndaamordi. Gila hanki horeeɓe Ghana hino renndini, ardiiɓe leyɗe, jaagorɓe e karralooɓe ngam taskagol ko laawol honngol haana reweede ngam laatingol ndee eɓɓoore. Hol saabi ndee darnde Ghana ? Ko Holno Afrik heɓtirta ndii njoɓtaarei ? Sindi heɓtike, ko e banŋe honɗe ndi haana naadeede ? Koɗo men hannde ko Alpha Ousmane Diallo, taarrikayanke, hertorɗo duunde Afrik. Himo jaaboo laamnde Ibrahima Timbi Bah...