Koɗo men hannde

Guinée, goongi général Mamadi Doumbouya laatoto kandidaajo e suɓngooji saatiiɗi ñannde
28 lewru 12ɓuru. Oo konunkoojo liɓuɗo laamu Alpha Condé e hitaande 2021, laatinaali
foodoore makko jonnitugol siwilɓe laamu caggal laamu faddewu. Wano dawroyankooɓe
mawɓe Guinée, ɗum ko Cellou Dalein Diallo, Alpha Condé e Sidya Touré wuuruɓe caggal
leydi, ɓe tawetaake e ɗii suɓngooji. Hol saabi général Mamadi Doumbouya teddinaali ngol
konngol makko ? Taw si ɓee lunndiiɓe laamu makko yaltuɓe e ɗii suɓngooji waaway mo
dartaade ? Koɗo men hannde ko Alpha Mamadou Diallo, jannginoowo to Iniwersite Sonfonya
Conakry. Himo jaaboo lamnde Ibrahima Timbi Bah.

Koɗo men hannde ko hooreejo CIO Ngoomu winndereyankowu Olempik. KIRSTY COVENTRY ɓii Zimbabwe arii Dakar e ndee yontere faltiinde. Tawi ko duuɓol heddii ɗoo e ɗii fijooji Olempik sukaaɓe hitaande 2026 fuɗɗo Senegal. Oo atletjo kiɗɗo sifike no fewnugol mahanteeriiji jaɓɓotooɗi ɗii fijooji fewndori. Hino timmi sukaaɓe atletɓe 2000 habbaaɓe e ɗii fijooji e ɗee hitaande aroore. Kirsty COVENTRY hino e faandu haala Christophe DIREMSZIAN, mo rfi faransiire.

L'invité de la matinale de RFI est aujourd'hui la présidente du CIO, le Comité International Olympique. La Zimbabwéenne KIRSTY COVENTRY était de passage à Dakar à 1 an du lancement des Jeux Olympique de la jeunesse en novembre 2026. Elle même ancienne championne de natation la patronne du mouvement olympique est venue faire le point sur l'avancée des préparatifs. Plus de 2000 jeunes athlètes sont attendus au Sénégal pour 2 semaines de compétition. Au micro de Christophe DIREMSZIAN Kirsty COVENTRY dit sa satisfaction au lancement du compte à rebours de la dernière année avant le début des Jeux.

Ɓurii lewru golle ɗuuɗuɗe hino dartiin ɗum no hay Bamako laamorgo ngoo. Ko ŋakkere kuɓɓam nde fedde kuliyankoore JNIM saabii woni caggal ngal dartal. Ndee ŋakkere kuɓɓam saabike caɗeele heewɗe tenŋtinii e fannu faggudu. Haa hannde laamu Mali ronku heɓude feere ettirnde ndee ɗeɗɗannde JNIM. E bi’ol Falilou Diallo, fagguduyanke, si oo alhaali waylaaki faggudu ngenndi Mali hawra e caɗeele tiiɗɗe. Ko kanko woni koɗo men hannde. Himo Jaaboo lamnde Ibrahima Timbi Bah.

E suɓngooji hooreyaaku saatiiɗi e hitaande aroore, fedde politik Les Democrates tawetaake. Suudu sariya Dosngal leydi ndin yilti piilol kandidaajo ndee walde sabu waasgol mo bammbooɓe timmuɓe. Ko fedde laamuyankoore nden e fedde wootere lunndiyankoore tawete e ɗii suɓngooji. Ko holɗum ngal pellital battinta e domokarasi Benin ?

Mbele juuɗe tawaaka e jiltugol oo kandidaajo ndee fedde Les Democrates ? Taw si laawol gonngol no woodi fii oo tawe e ɗii suɓngooji ? Koɗo men hannde ko Mouley Ismaël Diallo, hertorɗo sariya e politik. 

Cote d’Ivoire, ko Alassane Ouattara fooli e ɗii suɓngooji faltiiɗi. Oo hooreeji leyd kiɗɗo heɓii daaɗe 90%. Hay si tawii dartiiɓe mo e ɗii suɓngooji hollii wonndema ellaaji waɗii e majji, ɓe salaaki nguu polgu Alassane Ouattara. Kono lunndiiɓe laamu toowuɓe Côte d’Ivoire wano Tidjane Thiam e Laurent Gbagbo tawanooka e ɗee wote. Ko hummpanoo e majje ko limoore wotooɓe ɓee. Ɓeen, ko ɓe 50%. Taw si hello fitinaaji waɗuɗi saaha orngal ɗee wote acciraama ɓaawo ? Hol haani wonnde golle Alassane Ouattara e ɗii duuɓi arooji ? Koɗo men hannde ko Dr Abdourahmane Barry hertorɗo dawro. Himo jaaboo lamnde Ibrahima Timbi Bah.

Camerun, hooreejo leydi ndii, Paul Biya heɓii poolgu e woteeji ngaɗuɗe ñannde  sappo e ɗiɗi nduu lewru. O gorko mo duuɗi 92  waɗii duuɓi 43 laamu, ko ɗum ɗoo woni makko jeetataɓo. E bi'ol suudu mawndu sariya leydi ndii, oo heɓii daaɗe 53,66 e ley teemederewel. Ɗiɗaɓo e ngo suɓɓo ko Issa Tchiroma Bakary holliti njaɓaali ɗi jaabuli. Wakatuuji
seeɗa, caggal yaltugol, yimɓe hewɓe jinngonooɓe Issa Tchiroma yalti seppude, ɗun waɗan e diiwe kewɗe, gilla alam oo. Faa hotto ɗi seppooji mbawi haɗude ? holko haani waɗeede ngam sakkeede ɓeydagol ɗe caɗeele politik caggal wote ? Koɗo men beete hannde ko Dr Fabilou, jannginoowo uniwersité N’Gaoundéré, omo njaabo ɗe lamnde. Omo yewtida e Minati DIALLO, keɗoɗen ɓe. 

Hakkeeji gollooɓe sosiyete SOGUIPAH, moƴƴinoowo nebbam e poore, teddinaaka. Ko ɗum cimtol ngol fedde Anmesty yaltini hollli e lannoode ndee yontere. Njoɓdi ndi ɓee gollooɓe yoɓete no famɗi, cellal maɓɓe no ŋakki, ko ɗum maandini ndee winndannde. Souleymane Sow, hooreejo fedde Amnesty International Guinée no tawaa yaltinɓe ngol cimtol .
Ko kanko woni koɗo men hannde. Himo jaaboo lamnde Ibrahima Timbi Bah.

Ko miliyonji 900 kaalisi Guinée kala dawroyankeejo faalaaɗo taweede e suɓngooji arooji wallinta. Politiknaaɓe heewɓe hino holli wonndema ɗii mbuuɗi hino ɓuri feere maɓɓe nden. E bi’ol maɓɓe annuye konunkooɓe ardiiɓe Guinée hannde, ko haɗugol dawroyankooɓe woɓɓe tawegol e ɗii suɓngooji saatiiɗi ñannde 28 12ɓuru. Hay si tawi anndaaka taho si General Mamadi Doumbouya tawete e majji, tuugaade e kabaaruuji mejaaji goɗɗi, woodi meerɓe siifuɓe kaydi noddirndi oo konunkeejo laatagol kanndidaajo.

Ngam taskagol no ɗii suɓngooji wonaa e fewnireede, koɗo men hannde ko Mamadou Ciré Dioum, ardiiɗo fedde Sosiyete Siwil noddirteende DPEG, "Démocratie Paix Election et Développement Durable". Ɗum woni Demokrasi, Jam e suɓngo wonndude e ɓamtaare duumiinde. Himo jaaboo lamnde Ibrahiima Timmbi Bah.

Mali, ɓadike lewru, golle no uytii walla dartii e baŋŋe heewɗe e nder leydi ndin haa hewti Bamako. Ko ŋakkere kuɓɓam nde meeɗaaka yi'eede saabii ɗum. Ŋakkere fuɗɗiinde gila fedde kuliyankoore JNIM toŋi naatugol karbiran e nder ndii leydi. Ndee fedde yamiri kadi rewɓe yiilotooɓe e nder Mali tiggagol, suuma ko’e maɓɓe. Gila ɓee kuliyankooɓe ɓami ɗee pellitte, alaa ko ardiiɓe Bamako nantini. E bi’ol Mamadou Omar Ly, hertorɗo Diiwal Sahel, ɗee, ko maale holluɗe wonndema cemmbe kuliyankaaku hino ɓeydaade e nder ndii leydi. O ɓeydi, kulol no woodani Mali e nder dumunnaaji arooji si oo alhaali waylaaki. Ko kanko woni koɗo hannde. Himo jaaboo lamnde Ibrahima Timbi Bah

E on saaha, hino ɓadii konunkooɓe 30 waraaɓe caggal tuumeede liɓugol laamu. Gila ɗum, ɓeynguuli walla jom cuuɗi ɓeen konunkooɓe hino jokki ƴamugol hakkeeji maɓɓe. E kabaaruuji heɓaaɗi, laamu Mauritanie hino e laawol tottugol ɓe kaalisi. Kono woɓɓe e kooreeji ɓee konunkooɓe waraaɓe jaɓaa ndee eɓɓoore, no tawaa e ɓen Maïmouna Alpha Sy ardiiɗo fedde ɗin koreeji. E bi’ol makko njoɓtaari waawaaka jaɓeede caggal sariya. Ko kanko woni koɗo men hannde. Himo jaaboo lamnde Ibrahima Timbi Bah.