Koɗo men hannde

Madagascar wonii leydi araniri e nder Afrique ndi sukaaɓe Gen Z, sukaaɓe ɓe duuɓi mumen toowaali saabii liɓal laamu. Caggal jonte ɗiɗi seppo ɓee sukaaɓe, konu Madagascar liɓii laamu Andry Rajoelina. Wurin oo hooreejo leydi kiɗɗo dogii yalti Madagascar. Ko colonel Mikael Randrianirina (Rand-ja-nirin) ardii nguu konu ciwliingu laamu nguu. Ko holno ɗii seppooji fuɗɗoriiɗi e ƴamal nguurɗam moƴƴam sakkitori e liɓugol laamu ? Tawi si/mbele ɓee konunkooɓe ƴettuɓe laamu waaway waɗande ɓee sukaaɓe faale maɓɓe ? Mbele ɓee konunkooɓe jonnitay nguu laamu siwilɓe ? Koɗo men hannde ko Alpha Ousmane Diallo, jaŋnginoowo taariika Afrique. Himo jaaboo lamnde Ibrahima Timbi Bah

En waawi waɗude ko aduna on fow sikkunoo waawa laataade. Ko ɗii konnguɗi hooreejo Amerik holliri weltaare makko hankin saaho nde sarti Jam hakkunde Hamas e Israël siifete. Mawɓe leyɗe Moyent Orient fow weltori ngal kawral. Wano ardiiɗo Egypten Abdel Fattah al-Sissi nantini wonnde ko Donald Trump tan waawi tabintinnde jam e nder ngal diiwal . Wona e ngol laawol ɗoo Donald Trump fuɗɗii ñippude lurre e nduu adunaaru. O darinoke haa kawral heɓaama hakkunde RD Congo e Rwanda, caggal nde o artiri jam hakkunde Inde e Pakistan. Hol saabi oo mawɗo Dawlaaji Ndentuɗi Amerik hino ñippude ɗii kareeli? Ko holɗum o saati heɓude? Ko noone hommbo e diplomasi o woni e gollirde? Koɗo men hannde ko Dr Abdu Bah, hertorɗo jokkondire hakkunde leyɗe. Himo jaaboo lamnde Ibrahima Timbi Bah.

Kawral jam hakkunde Israël e Hamas siifaama Hankin. Nden siifannde waɗii yeso Donald Trump. Oo hooreejo Dawlaaji Ndentuɗi Amerik nantinii wonndema nagl kawral artiran jam duumiiɗo e ngal diiwal. Hamas accitii Israyelnaaɓe wuuruɓe 20 ɓe ɓe ciwliino. Israël kañun kadi yoppitii Palestinaaɓe ɓadiima ujune ɗiɗi. Egguɓe e diiwal Bande de Gaza ujune ujune
artii e galleeji maɓɓe, ɗi konu Israël bonni. Taw si ngal Kawral tabintinay jam hakkunde Israël e Hamas? Ko holɗum ngal battinta e nder Moyen Orient? Ko holɗum wonata janngo fedde Hamas, haanunde ɓorteede kaɓirɗe riiwe si en tuugike e sarti eɓɓaaɗo oo? Koɗo men hannde ko Anta Barry hertorɗo dawro. Himo jaaboo lamnde Ibrahima Timbi Bah.

Suɓngooji lefol laamu Côte d’Ivoire, ko ɓe kanndidaaɓe njoyo kadi ɓe njogii ko jonte ɗiɗi ngam holnugol ɓiɓɓe leydi ndin suɓagol ɓe. Alassane Ouattara hooreejo leydi ndin, Jean Luis Billon, Henriette Lagou, Simone Ehivet e Ahoua Don-Mello fuɗɗike oorngal maɓɓe gila e lannoode ndee yontere faltiinde. Ɗii suɓngooji hooreyaaku ko ñande 25 nduu lewru waɗata. Laurent Gbabo, Tijjan Thiam e Guillaume Soro tawetaake e majji, sabu njuɓɓundiiji leydi ndin riwiinoɓe. Pellital ngal ɓe sali. Ko ɗum si ɓe noddude seppooji e nder leydi ndin waɗii jonte. Taw si ɓee lunndiiɓe laamu sakkitoray bammbugol kanndidaajo goɗɗo? Ko holno ngal oorngal saatii eƴƴirde? Ko toɓɓe honɗe ɓurte yeewteede e maggal? Koɗo men hannde ko Mamadou Mouctar Diallo, hertorɗo dawro. Himo jaaboo lamnde Ibrahima Timbi Bah.

Cameroun, ɓiɓɓe leydi ndii suɓoto hooreejo keso e oo alet, 12 lewru 10 ɓuru. Kanndidaaɓe e ɗii suɓngooji jokkan oorngal maɓɓe haa ñande jamma aljuma 10 lewru 10ɓuru. Heewɓe e maɓɓe woɗɗinii yiilagol e nder laral leydi ndin. Wano Paul Biya hooreejo Cameroun gila duuɓi 43, mo heewaaka yi’eede, ko Maroua tan e yahi e ndee talataare. O fodii sukaaɓe ngal diiwal o jokkay golle makko ɓamtooje leydi ndin. Taw si ɓee sukaaɓe jaɓii ɗii konnguɗi Paul Biya ? Holko wonata darnde Bello Bouba Maigari e Issa Tchiroma jeyaaɓe e ngal diiwal e ɗii suɓngooji ? Luulndiiɓe laamu nguu waawaali fottude ɓaawo kanndidaajo go’oto, mbele ngal luural maɓɓe ɓeydanay Paul Biya cemmbe, o foola ngoo suɓngo? Koɗo men hannde ko Dr Mouhamadou Ahmadou jannginoowo e nder duɗe jaaɓi-haaɗtirdi. Himo jaaboo e laamnde Ibraahiima Timmbi Bah

‘‘Senegal ko leydi ndi jam tabiti e mun. Leydi hertaniindi wiltinooɓe jawdi’’, ɗii ko konnguɗi Abdourahmane Sarr, jaagorɗo Senegaal halfinaaɗo faggudu. Ko kanko woni koɗo men hannde. E bi’ol makko assugol oogirɗe fawiiɗe e kuɓɓam ɓeyday ɓamtaare faggudu leydi ndin. O nantinii ɗii konnguɗi e sahaa mbatu fagguduyankeewu, Forum Invest In Senegal, woni e waɗude to Diamniadio. Abdourahmane Sarr no jaaboo e lamnde Bruno Faure

Laatagol hooreejo jaagorɓe France woni huunde sattunde. Ardiiɗo jaagorɓe leydi ndii jonnitii walla rootiima laamu mum, hanki. Ko saabi Sebatien Lecornu ɓami ngal pellital ko luure ɗe suɓagol jaagorɓe makko jibini. Hay so tawi Emmanuel Macron, hooreejo leydi ndin jaɓii ngal pellital, o ñaagike Sebatien Lecornu yeewtidugol e cenɗeɗee fow ngam heddagol e jullere makko. Huunde nde weeɓa heɓugol, e bi’ol Mamadou Deme, renndoyanke, taskotooɗo politik. Ko kanko woni koɗo men hannde. E faandu haala Ibrahima Timbi Bah, o holli yi’annde makko e ko saabii ngal luural hakkunde dawroyankooɓe France.

Madagascar, waɗi balɗe hannde ko sukaaɓe ujune hino waɗude seppooji ngam ƴamugol nguurdam moƴƴam. Wano ɗen murte hino waɗude Maroc. Kono ɗii seppooji ko Sri Lanka, Philippines e Népal ɗi fuɗɗori. Toon, ɗi liɓii laamuuji ɗuuɗuɗi. Ɓee sukaaɓe wonuɓe caggal majji koɓe duuɓi mun toowaali jibinaaɓe e hitaande 1995, mawnidɓe e karalle kese ɗee woni internet, eɓe mbiye Generation Z. Holko woni mbaadi ɓee sukaaɓe walla holno ɓe cifortee ? Holko woni ƴamal maɓɓe ? Taw si ɗii seppooji saaboto liɓe laam ? Koɗo men hannde ko porofeseer Alpha Amadou Bano Barry, renndoyankeejo, toowa ganndaljo. Himo jaabo e lamnde Ibrahima Timbi Bah

Senegal, ñawu wi'eteengu fièvre de la vallée du Rift saabike mayde yimɓe 8 gila ñannde 13 lewru 9ɓuru. Ko ɓuri heewde, ko daabaaji ɗii raaɓinta nguu ñaw caggal nde ɓoyɗi fiɗiɗi.  Ko Diiwal Saint-Louis e Louga ndee nawnaare ɓuri jaalaade. Nde raaɓi ko timmi yimɓe 40. Ko holɗum woni maale fièvre de la vallée du Rift ? Taw si hinde jogii lekki ? Ko holno nde dannditorte ? Koɗo men hannde ko Dr Mamoudou Bocoum, toppitiiɗo cellal e nder Diiwal Podor. Himo jaaboo lamnde Ibrahima Timbi Bah.  

Guinee, Suɓngooji hooreyaaku waɗan ñannde 28 lewru 12ɓuru. Ko ɗum dekere mo Général Mamadi Doumbouyan ardiiɗo laamu faddewu ƴetti holli. Ɗee wote waɗan caggal nde Ginenaaɓe suɓii sariya mawɗo keso leydi ndin e nduu lewru faltiindu. Si ɗee wote laatike ɗe rawnoto laamu faddewu ɓooyungu gila htaande 2021, saaha nde Général Mamadi
Doumbouyan liɓunoo laamu Alpha Condé. Hay si tawi ardiiɗo nguu laamu faddewu anndinaali si o tawete e ɗee wote, ɗimmooɓe makko woɓɓe nantini o laatoto kanndidaajo e ɗii suɓngooji. Taw si Guinée no jogii karallaagal fewnugol ɗii suɓngooji no laaɓiri ? Mbele Cellou Dalein Diallo, Alpha Condé e Sidya Touré, dawroyankooɓe mawɓe, doguɓe fattii caggal leydi waawan taweeede e ɗii suɓngooji ? Koɗo men hannde ko Ibrahima Balayah Diallo, ƴettoowo konngol
forces sociales de Guinée, fedde sosieyete siwil. Himo jaboo lamnde Ibrahima Timbi Bah.