Koɗo men hannde

To France, gardiiɗo jaagorɗe keso joƴƴinaama ñande alarba 10 lewru 9ɓuru, caggal nde François Bayrou ndartini golle makko hanki. Saabi ɗum ko depiteeɓe ɓee liɓi guwermama makko. Ngol toɗɗagol waɗi ko e sahaa waktuuji seeɗa caggal nde Bayrou dartinii golle makko. Ko Sébastien Lecornu toɗaama liɓugol guwernamaaji ɗiɗi. Toɗɗagol makko waɗi ko e ñalawma mo France woni e dille keewɗe sabu seppooji fedde « Bloquons tout ». Hol golle ɓurɗe teeŋtude ɗe gardiiɗo jaagorɗe keso oo jogori waɗde ? Mbele Sebastien Lecornu ina jogii feere ngam waɗde ɗuum ko Michel Barnier e François Bayrou ndonkunoo waɗde ? Mbele guwernama makko oo ina waawi daɗde? Mamadou Dème, karallo ko faati e dawrugol e jokkondiral hakkunde leyɗeele jooɗiiɗo to leydi Farayse, ina yeewtida heen e Abdoulaye Diallo. Ko kanko woni koɗo men

Koddiwaar kanndidaaji jogorɗi ƴamde gardogol leydi maɓɓe e wooteeji gardotooɗi e lewru 10ɓuru, hannde nganndaama. Suudu dosgal mawndu jaɓii kanndidaaji joy, hono Alassane Ouattara, e nder capanɗe jeegom (60) townuɓe hondu maɓɓe ngam taweede e subngooji ɗii. Kono tan, gonnooɗo hooreejo leydi ndii, Laurent Gbagbo e Tidiane Thiam, ɓee lunndiiɓe ɗiɗo njaltinaaɓe ka doggol wooteeji ɗii, kollitaama jaɓaaka. Won e taskotooɓe ina njiytoo tawo jokkondire hakkunde pelle dawro lundiiɗe. E wiyde ganndo politik wiyeteeɗo Abdourahmane Barry, luulndiiɓe ɓe tawaaka e ɗii subngooji ngalaa feere so wonaa hawrude caggal kanndidaa luulndo so ɓe njiɗii daɗde e peccitagol daaɗe woote. Kono e wiyde makko, alaa ko holliti wonde ɓe njogii ko yiɗde waɗde ɗum. Abdourahmane barry yewtidii e abdoulaye diallo. Ko kanko woni koɗo men. Heɗoɗee mo

Farnce, François Bayrou waasi e woote hoolaare ; guwerneman makko liɓaama ka suudu sardiyankooru hanki. Kadi ko ngol woni go’o e nder taariika leydi joyaɓiri, laamu nguu yani e battane "woote hoolaare". O jonnay hannde ɗerewol hooreejo leydi ndii ngam dartinde golle makko ka hooreejo jaagorɗe. Ko ɗum waɗi gite fof ngoni hannde ko e Emmanel Macron, hay so tawii o wiyi o jaɓɓii ngal pellital. Himo foti toɗɗaade hooreejo jaagorɗe keso. Ko holno o jogori safrude ɗee caɗeele politique? Ko holɓe e peeje politik kanko hooreejo Faransi jogii hannde? Jaabawol koɗo men biyeteeɗo Amadou Tidiane Diallo kanko woni koɗomen hannde. Ko hertorɗo to banŋe sariya e politik  Faransi. O yewtidii e Abdoulaye Diallo. Heɗoɗen ɓe.

To Mali: ñande aset nde, fedde Jnim, jokkondirnde e Al Kaydaa, waɗii njanngu e komisariya poliis mo Mopti. Ko famɗi fof yimɓe ɗiɗo maayi e oon kikiiɗe. Ɓeen kuliyaŋkooɓe ina njokki hadɗe yah-ngarta to Kayes e to Nioro du Sahel, ɗo woɗɗaani keeri Senegaal e Moritani. Ɓe kolliino wonnde yiɗde maɓɓe ko haɗde naatgol petrol e nder leydi Mali. Yanti heen, ina wiyee wonde kamiyoŋaaji cumaama to Sikasso, fuɗnaange-worgo Mali. Senegalnaaɓe gognooɓe kamiyoŋaaji njeegomo, ɓe Jnim nanngunoo, ngaccitaama. Holno mbaawirten faamde e faamninde ndee feere hesere nde fedde Jnim waɗi? Holko ɗee peeje kese ɗe kuliyaŋkooɓe ɓee ƴetti waawi battinde e faggudu leydi Mali? Holko foti wonde darnde ardiiɓe Mali ngam haɓaade ɓee waɗboniyaŋkooɓe ? Ngam jaabaade ɗee naamnde Abdoulaye Diallo bismiima Mammadu Umaar Lih, Muritaninaajo keertoriiɗo ko faati e kisal e nder Sahel.

Eɓɓaande doosgal durngol ina jokki addude luural, hara laamu nguu ina jokki yuɓɓinde diisnondiral diiwanuuji gila ñalnde 1 nduu lewru ngam « ƴeewtaade » ndee winndannde nde 2014, nde meeɗaa baƴƴineede. Ardiiɓe katolikiiɓe en gure joy mawɗe to bannge worgo leydi ndi njaɓaani ndee eɓɓaande, ɓe mbiyi yo nde ittee. E nder ɗuum, ɓe ngoni ko e ƴettude kuule ɗiɗi ceertuɗe : doosgal durngol e doosagl ndema.

Hol ko waɗi ndee eɓɓaande doosgal durngol ina addana luural mawngal ? Mbele ndee eɓɓande doosgal durngol no moƴƴani durooɓe haa bonnana remooɓe ? Hol kuutorgal ngam yuɓɓinde e haɗde luural hakkunde remooɓe e durooɓe nder Caad ? Dokteer Yamingueye Bettebaye woni koɗo men. Omo jaaɓo lamnde Abdoulaye Diallo, Keɗoɗee.

Oorngal wooteeji ngam yuɓɓinde woote eey walla alaa dosgal leydi kesal ñannde 21 nduu lewru. Kawtal pelle ngal wonaa laamuyankoore wi'eteengal "Forum des Forces Sociales de Guinée" renndingal pelle ɓurɗe cappanɗe nayi, noddii yo ginenaaɓe ɓee ta wootu oo sariya keso. E nder ɗum, won lanndaaji luulndo jokkuɗi golle mun'en e dow leydi ndii.

Fedde "Bloc liberal" kañum riwtii ndee eɓɓaande doosgal leydi kesal. Hanki min yewtuduno e gooto tawaaɗo e laamu nguu, hannde en njaɓɓoto koɗo men Ibraahiima Mbemba Bah, ƴettoowo konngol fedde dawro "Bloc Libéral", ballitoowo woote "alaa". O yeewtidii e Abdoulaye Diallo.

Gine: orngal wooteeji ngam yuɓɓin'de woote eey walla alaa ñalnde 21nduu lewru ina jokki. Kono haa joonkeeweende yimve teskaaka tawo e ñalngu ɗiɗaɓuru orngal ngal. Laamu nguu walla lanndaaji luulndo ngoo mbaɗaani tumbondiral maɓɓe ngam noddude woote eey walla alaa. Banŋeeji ɗiɗi fof ina njogii jonte tati ngam waawde faminde wootooɓe ɓee yo cuɓo eey walla alaa doosgal leydi kesal. Ngal orngal no waɗa e saha mo luural teskaa hakkunde laamu
ngu e pelle dawro lundo ngoo ɗe golle mun dartinaa e nder leɓɓi tati. Hannde en kaaldat e kawtal pelle dawro wondude e laamu ngu, noduɓe wootude eey. Ko Boubacar Sidigui Diallo hooreejo fedde politik wiyeteende Union pour un mouvement populaire, lannda UMP woni koɗɗo men hannde. O yewtidii e Abdoulaye Diallo.

Laana ndiyam njolnuka fotde yimɓe 160, ummoriika Gambie yooli e nder maayo leydi Mauritanie ñalnde alarba ɓennuɗo oo. Ko yimɓe 17 tan ndañi soweede heen. Yimɓe cappanɗe e maɓɓe majjii. Oo musiiba artiri haala alhaali ɗanle ɗe ndewaani sariya. Holko waɗi oo mussiba ina ɓeydoo heewde hitaande kala e hirnaange Afrik ? Mbele peeje ngam haɓaade ɗum kaanaani teeŋtineede ? Koɗo men ngam yeewtude e ndee toɓɓere, ko Elhadj Mouhamadou diallo. O jaabotoo ko e naamne Abdoulaye diallo

To Cameroun, jonte seeɗa woote gardagol leydi baɗooje e lewru 10 ɓuru, dental annduɓe ɗaɓɓii ngootaagu ngenndi e mahngo leydi ndii. E nder winndande bayyinaande ñande altine 25 nduu ɗoo lewru, nde tiitoonde mum woni « Noddaango taarika », ngal dental denndingal ko ɓuri yimɓe cappanɗe njoyo tawa ina e maɓɓe jaŋnginooɓe to duɗe jaaɓe haaɗtirɗe, jeyaaɓe e pelle jaambureeje, yimɓe heertoriiɓe sariya, ina wonni e naalaŋkooɓe, fof noddii yo luulndo ngoo faamondir ngam sosde fedde wootere waawnde addude waylo-waylo politik. Ɓeen siifɓe ndee winndande mettinii kadi no ɓee kandidaaɓe cuɓira ngam taweede e woote hooreyaaku leydi garooji ɗii. Koɗo men wi’etee ko Yerima Hallilou gooto e siifɓe ndee winndande. O yeewtidii e Abdullaay Jallo. Keɗoɗee

To Senegal, caggal jeddondiral, jiiɓru politik e ñaawoore juutnde ngam heɓtude meeri Dakaar dañii gardiiɗo keso. Ko jaagorɗo kalfinaaɗo golle woni Abass Fall toɗɗaa caggal poolgu makko e dow  kanndida mo Khalifa Sall suɓinoo. O lomtii ko Barthélémy Diaz, ittanooɗo e gardugol komin Dakar. E oon sahaa go’oto, suudu ñaawirdu toowndu Dakar saliima wullitaango ngo Barthélémy Diaz waɗi, luulndiiɗo ɓoortugol wutte makko meer. Holno paamirten ngoo suɓngo Abasse Fall tawi lannda makko Pastef jogaaki keewal diisotooɓe e nder komin Dakar? Mbele gollondiral politik hakkunde Dias e Khalifa ko ɗoo haaɗi? Holko woni gaarojum politik Barthélémy, cosɗo jooni fedde makko dawro? Ngam jaabtaade e ɗee naamnde, en mbismiima Ibraahiima Aan garɗiiɗo jaaynde Walf Net kadi kumpitiiɗo geɗe dawrugol. Omo jaabo e naamnde Abdullaay Jallo Ko kanko woni koɗo men.