Koɗo men hannde

Cameroun, Maurice Kamto tawetaake e suɓngooji hooreeyaaku saatiiɗi ñande 12 lewru 10ɓuru. Oo luulndiiɗo laamu Paul Biya riwaama e ɗii suɓngooji sabu ko yimɓe ɗiɗo fedde mavve politik MANIDEM addi. Maurice Kamto e yimɓe mum ñiŋii ngal pellital. E bi’ol maɓɓe saabi laamu nguu o tawee e ɗii suɓngooji ko omo jogii fartanŋe  suɓeede hooreejo leydi e ɗii suɓngooji. Holko Maurice Kamto saatii waɗude caggal nde o riwaa e ɗii suɓngooji ? Mbele o bamban kandidaajo goɗɗo ? Koɗo men hannde ko Halidou Demba hertorɗo dawro Cameroun. Himo jaabo e laamnde Ibraahiima Timmbi Bah.

Japon, waɗii hannde duuɓi 80 gila Etats-Unis liɓi bommbu atomik e hoore saare Hiroshima. Ɗum ko subaka 6 lewru 8ɓuru hitaande 1945, saaha hare adunayankoore ɗiɗaɓere. Nden bommbuure saabinooma ko ɓuri  maayɓe 80 000 e nder hojomaaji ɗaɓɓi. Balɗe tati caggal ɗum, Etats-Unis weddii kadi bommbo goɗɗo e hoore saare Nagasaki. Ɗee bommbooje ɗiɗi mbaɗii maayɓe yimɓe fawɓe/sukaaɓe 200 000, e jukkuɓe ɗuuɗuɓe. Haa hannde Japonaaɓe njaltaali e tallalleke oo bone. Ko holno oo alhaali feƴƴiri oon sahaa ? Holko saabinoo Dawlaaji Ndentuɗi Amerik liɓi ɗee bommbuuje e hoore Japon ? Mbele peeje ɓamaaɗe sifa oo fitina hino saati waɗitude e nduu adunaaru ? Koɗo men hannde ko Dr Abdourahmane Hayatou taariikayanke. Himo jaaboo laamnde Ibraahiima Timmbi Bah.

Mbele maaje Guinée laatike immorde ɗannootooɓe leyɗe hirnaange Afrique ngam yottagol Europe ? E ɗee jonte faltiiɗe ɗoo, ko timmi laaɗe maayo 4 ummoriima Kamsar, saare wonnde to rewo leydi ndii. Ko kilomeetruji 280 woni hakkunde ndee saare e Conakry. Ɓeen ɗannotooɓe ko Ginenaaɓe, Senegalnaaɓe e Gananaaɓe. Si woɓɓe e maɓɓe waawi yottaade leyɗe Europe, woodii ɓe laaɗe mum nannga Mauritanie. Laawol hakkunde Guinée e Europe no fawi e 2 000 km. Hingol ɓuri ɗii laawi heddiiɗi woɗɗude. Holko saabii ɓee ɗannotooɓe mbatti rewde jooni Guinée ngam yahde Europe ? Hol caɗeele ɓe saatii hawrude ? Mbele Guinée no joogii feere dartingol o bone ? Ko e oo alhaali njeewtitten, hannde, e Elhadj Mohamed Diallo, hooreejo fedde Guinée haɓoore e ɗalle ɗe rewaani sariya. Himo jaaboo laamnde Ibraahima Timbi Bah.

Sahel, aynooɓe ɓee ina tawaa e ɓurɓe loreede e nder ɗii fitinaaji. Pelle jogiiɗe kaɓorɗe e pelle kuliyaŋkooje hino yana e maɓɓe wujja walla ƴetta jawle maɓɓe. Ko ɗum holli ciimtol pelle ɗe ngonaa laamiyaŋkooje tati caggal witto. Wano Burkina Faso ko yimɓe VDP e fedde kuliyankoore JNIM woni e ƴettude daabaaji ɓee durooɓe. E nder gollidal e yimɓe bonɓe woɗɓe, ɓe njeeyat ɗii daabaaji gujjaaɗi to leyɗe Côte-d’Ivoire e Ghana. Ko holno oo alhaali woni e laatorde ? Holɓeen yimɓe mballtaɓe yeeyde ɗiin dabaaji gujjaaɗi? Hiɗen jaɓɓii hannde Mouhamadou Kane, tawaaɗo e waɗuɓe ngoo witto. Himo jaaboo lamnde Ibraahiima Timmbi Bah

Côte d’Ivoire, Alassane Ouattara laatoto kandidaajo e suɓngooji hooreyaaku saatiiɗi ñannde 25 lewru 10ɓuru. Oo hooreejo leydi holli ko mbawka makko e golle moƴƴe ɗe o waɗi e ɗii mandaaji makko saabii yo o ɗaɓɓitu laamu laawol nayaɓol. Konnguɗi ɗi lunndiiɓe laamu makko jaɓaali. E bi’ol wano Laurent Gbagbo e Tidjan Thiam riiwaaɓe e ɗii suɓngooji sariya
yaanana Alassane Ouattara ɗammugol laamu laawol nayaɓol. Ngam taskagol alhaali ɗii suɓngooji koɗo men hannde ko Mamadou Mouctar Diallo, hertorɗo dawro. Himo jaaboo lamnde Ibrahima Timbi Bah….

Hanne alarte 30 lewru 7ɓuru ko ñallal hertanaangal haɓugol gollirgol neɗɗanke. Maccangaaku, gollirgol rewɓe e gollingol sukaaɓe, ɗii ko boneeji jaaliiɗi e leyɗe goɗɗe. Wano Mauritanie, ko leydi ndi maccangaaku ɓooyi. Fii kala oo bone hino haɓeede haa hannde himo heddii. Holko saabii haa hannde oo bone no jokki ? Holko haana waɗeede ngam dartingol mo ? Koɗo men hannde ko Kadjata Bah cukko hooreejo fedde IRA, haɓoore maccangaaku. Himo jaaboo lamnde Ibrahima Timbi Bah.

Niger, Konunkooɓe ardiiɓe leydi ndii timminii ɗuuɓi e ndee yontere feƴƴunde gila ɓe siwlii laamu. Nde ɓe liɓuno laamu Mouhamed Bazoum, ɓe foduno wonndema ɓe jonnitan siwilɓe hooreyaaku leydi ndin caggal laamu faddewu. Nden foodoore waasi laataade sabu Général Abdourahman Tiani e wonndiiɓe mun aadike ɓooyinnde laamu maɓɓe emmbere manda mo
duuɓi 5, waawaaɗo ɓeydeede. Ɓe dartini golle pelle politik e baale sosieye siwil. Hooreejo leydi kiɗɗo Mouhamed Bazoum e woddiiɓe mun woɓɓe haajooni hino sokaa. E nder hen, ŋakkere kisal e deenaagu hino ɓeydaade. Ngam taskagol ɗii ɗuuɓi ɗiɗi laamu konunkooɓe Niger, koɗo men hannde ko Dr Abdou Bah, hertorɗo jokkondire hakkunde leyɗe. Himo jaaboo
lamnde Ibrahima Timbi Bah.

France anndinii wonnde ɓe njaɓat goodal dawla Palestin e lewru 9ɓuru arooru. Ɓe lawɗinat ngal pellital mawngal to mbatu ONU e nduun lewru 9ɓuru. France laatoto leydi teemedere e cappanɗe e tatiɓiiri (143ɓiiri) jaɓndi goodal Leydi Palestine. So tawi leyɗe keewɗe mbeltoriima ndee eɓɓoore, Dawlaaɗi Dentuɗi Amerik e Israayel nantinii salaare e mettere maɓɓe. Holko saabii France ɓamii ngal pellital e oo saaha ɗoo? Ko holɗum ngal waylata? Mbele ngal newnat eɓɓoore faatunde e goodal leydi Palestine e leydi Israayel tijjaande tabintingol jam duumiiɗo e ngal Diiwal? Koɗo men hannde ko Mouhamadou Sanoussy Diallo, hertorɗo Leyɗe Arabeeɓe. Himo Jaaboo laamnde Ibraahiima Timmbi Bah….

Cameroun, ko dawroyaŋkeeɓe cappanɗe njeetato e ɗiɗo (82) kolli  yiɗde/faale maɓɓe wonde kandida e suɓngooji lefol laamu garooji. E ngol doggol, dawroyaŋkooɓe mawɓe leydi ndii fow ina tawa e maggol. Gila e hooreejo leydi ndii Paul Biya, haa e luulndiiɓe laamu makko Maurice Kampto e Cabral Libii. Jeese kese kadi ina tawe e ɓee kandidaaɓe wano Bello Bouba Maigari e Issa Tchiroma Bakary yaltuɓe e fedde politik laamuyaŋkoore. Holko saabii ngal keewal ɓee faalaaɓe ƴamde lefol laamu nguu? Mbele piile maɓɓe ɗee njaɓete ? Holko luural wonungal e nder RDPC, fedde politik laamuyankoore battinta ? Koɗo men hannde ko Ousmane Magadji, winndiyankeejo, himo jaaboo laamnde Ibrahima Timmbi Bah

Météorite e Faransiire, woni yiiwre e ɗemngal Fulfulde ko hayre ñaañaare immiinde e weeyo yani e hoore laral leydi. Ɓurnde mawnude ndee ko to Agadez e nder Niger yi’a. Juuteeri mayre ko sentimeeteruuji 40, tawo teddeendi ndii kilooji 24. Ndee hayre yeeyaama miliyonji joyi kaalis dolaar to Dawlaaɗi dentuɗi Amerik.  Coggu hollungu jiiwe hino hitti. Holko saabii hitteende majje ? Ko holto ɗe immotoo ? Ko holno ɗe sinndindirte/seerndirte e kaaƴe goɗɗe? Koɗo men hannde ko Hammadi Jah, kumpitiiɗo geɗe weeyo woni "astronaute". Himo jaabo e laamnde Ibraahiima Timmbi Bah