Koɗo men hannde

To Guinée, lanndaaji dawro tati luulndo ngoo kaɗaama waɗde golle maɓɓe politik ɗoo e lebbi tati. Ngal pellital ƴettaama gila e aljuma jawtuɗo oo. Ɗeen pelle ko UFGD fedde nde Cellou Dalein Diallo ardii, RPG arc-en-ciel mo gonnooɗo hooreejo leydi ndii woniAlpha Condé, e lannda PRP mo Rafiou Sow. Jaagorɗo kalfinaaɗo njuɓɓudi laamu nguu tuumi ɗee pelle dawro ko waasde ɗooftaade jamirooje sariya, haa teeŋti noon e geɗe njuɓɓudi ko wayi no batu majje no wi’ee Congres e udditde konte banki. Holko mbaawirten famninde ngal pellital ƴettaangal tawa heddii ko  jonte seeɗa tan woote referendum ɗee? Holko waawi wonde battane mum ?

Koɗo men, Alpha Oumar Teliko BALDE jaŋnginoowo e wittiyaŋke ko faati e dawrugol to duɗal jaaɓi haaɗtirde Sonfonia. Omo jaabo naamnde Abdullaay Jallo

Guinée, yimɓe heewɓe maayi, ɓeya ngañiima, woɗɓe njiytaaka haa jooni. Ɗum ko caggal nde tule leydi njoorti e dow e dow koɗkiiji maɓɓe, jamma larba ina weeta alkamiisa jawtuɗo oo. Ko ina abbo e noogas cuuɗi maɓɓe ɗiin mahaaɗi les tule mawɗe ubbiima. Ɗiin galleeji ngoɗɗaani kadi to njaare e kaaƴe asetee. Ko nokkuure nde haananooka hoɗeede walla maheede, e bi’ol Alpha Ousmane Sow, kumpitiiɗo kala ko faati e geɗe leydi. Ko kanko woni koɗo men hannde. Omo jaabo e laamnde Ibraahiima Timmbi Bah

Sénégal, limoore nawnuɓe walla wonnduɓe e ñawu VIH/SIDA fuɗɗiima ɓeydaade. Ɗum noon, ko e sahaa nde Etats-Unis dartini balle maɓɓe bannge yaasi. Ɗeen balle ina mballatnoo haɓde e ndee nawnaare SIDA e nder adunaaru nduu. Ngol layugol oo rafi hino laatani ngoomu Sénégal haɓoowu e SIDA CNLS, annde. Dr Fatoumata Ly tawaaɗo e ardiiɓe ndee fedde eeriima nde senegalnaaɓe ɓee njokkata e teddinde peeje daɗɗaade ngam haɓde e SIDA. O ɓeydi heen, hay so tawii Sénégal ina tawee e leyɗeele ɓurɗe wakkilaade haɓugol SIDA, yimɓe ɓee haana welsindaade. Ko Dr Fatoumata Ly woni koɗo men hannde. Himo jaaboo laamnde Ibraahiima Timmbi Bah.

Mauritanie, ardiiɓe pelle politik e sosiyete siwil heewɓe nanngaama, naatna kaso e nder ɗee balɗe jawtuɗe. Ina tawa e ɓeen jaggaaɓe Ould Khouna, jaagorɗo kiiɗɗo, Abdoulaye Ba e Ali Bekar yimɓe sosiyete siwil. Heewɓe e ɓeen jaggaaɓe tuuma ko noddude faade ngañamtumaagu/haasidaagal hakkunde Moritaninaaɓe walla hoynude hooreejo leydi ndii. Kono e bi’ol Sonia Haïdara gardiiɗo fedde Rewɓe daraniiɓe hakkeeji neɗɗanke Mauritanie, ko e hoore tooñe ɓe yimɓe nannga. Faandaare ndee ko deƴƴinde kala ñiŋoowo laamu Mauritanie. Ko kanko woni koɗo men hannde. Sonia Haïdara ina jaaboo e naamnde Ibraahiima Timmbi Bah

Mali, waɗii duuɓi 5 gila konunkooɓe ngoni e laamu nguu. Ko Ibrahima Boubacar Keita ɓe liɓnoo laamu mum ñande 18 lewru 8ɓuru hitaande 2020, caggal jonte seppooji e nder leydi ndii. Assimi Goïta e konunkooɓe ɗimmooɓe mum kolluno wonnde ko jaalagol walla layugol kuliyankaaku e nder leydi ndii saabi ɓe liɓi nguu laamu. Duuɓi 5 caggal ɗum, ko holto kuliyankaaku tolni e ndii leydi hannde ? E bannge politik konunkooɓe ɓee aadike heddagol e laamu ko famɗi fof ɗuuɓi 5. Mbele faandaare maɓɓe wonaa heddaade e laamu haa pooma ? Ngam jaabagol ɗee lamnde Ibrahima Timbi Bah hino jaɓɓii Dr Mansour Ly, hertorɗo dawro. Lamndal gonngal ngal Timbi Bah waɗani koɗo makko hino faatii e nanngugol konunkooɓe e siwilɓe tuumaaɓe sammingol laamu.

Hooreejo Etats-Unis jaɓɓoto hannde nanndodiiɗo makko mo Ukraine to suudu laamordu Amérique. Ɗum, ko balɗe seeɗe caggal jiyondiral makko taarihayankeewal e Vladimir Poutine, hooreejo Russie. Faandaare Donald Trump ko dartingol hare wonnde hakkunde Russie e Ukraine. Hay so tawi ko laaɓi heɓaaki e ndeen jonnde waɗnde ñande aljuma, 15 lewru 8ɓuru ndu ngonɗen, hooreejo Amerik hollii kawral heɓaama e toɓɓe keewɗe. Kono haa jooni hare hakkunde Russie e Ukraine dartaaki, piyanɗe ɗee nana njokki. Ngam artude e ndee jonnde, tasko ko saati waɗde e ɗee balɗe arooje, koɗo men hannde ko Dr Aboubacar Sidy Sow, jannginoowo to duɗal jaaɓe haaɗtirde Loyola, to Chicago. Omo jaabo e naamnde Ibraahiima Timmbi Bah

Mauritanie, hooreeɓe leydi ndii njuɓɓɓinat yeewtere ngenndi hakkunde ɓiɓɓe Moritaninaaɓe ngam ɓamde peeje tabitinooje paamondiral duumiingal. Kono Biram Dah Abeid, mawɗo luulndiyankooɓe Mauritanie hollii tawetaake ndee jonnde. E nder yeewtere nde men waɗdi e makko o nantinii ngal kaaldigal alaa faayida. Fedde politik laamu Mauritanie woni INSAF ñiŋii pellital Biram Dah Abeid. E bi’ol Aïssata Alassane Ngaido tawaaɗo e hooreeɓe ndee fedde politik, so Biram Dah Abeid waasi taweede ndee jonnde, maa luulndiiɓe laamu nguu woɗɓe tawe. Ko kanko Aïssata Alassane Ngaido woni koɗo men hannde. Ibraahiima Timmbi Bah yeewtidii e makko e alhaali ŋakkeere ndiyam e nder Nouakchott, ina wonndi e riwugol ɗannatooɓe afriknaaɓe e ndii leydi. Keɗoɗen.

Guinée, Pelle politik luulndiiɓe laamu noddii seppo ñande 5 lewru 9ɓuru. Ɗum ko ngam hollugol salaare maɓɓe heddagol général Mamadi Doumbouya e hoore leydi Guinée. Oɗon nganndi, en keɗiima hanki e oo sahaa ɗoo, Cellou Dalein Diallo luulndiiɗo laamu Guinée, gardiiɗo fedde politik UFDG. Kanko e wonndiiɓe makko, ɓe tuumi général Mamady Doumbouya, oo konunkoojo ardiiɗo laamu faddewu waɗugol sariya mawɗo keso ngam heddaade e laamu. Ƴettoowo konngol guwerneman on hino mettini e ngoo seppo. Ousmane Gaoual Diallo nantinii wonnde ɓe jaɓataa dawroyankooɓe jooɗiiɓe caggal leydi ina caaboo bone e nder leydi ndii. Ko kanko woni koɗo men hannde. E faandu Ibraahiima Timmbi Bah, o artii e toɓɓe goɗɗe hono woote hooreyaaku saatiiɗe e ndee hitaande hikka. Heɗoɗen.

Guinée, suɓngo referendum (Eey walla Alaa) waɗat ñande 21 lewru 9ɓuru. Ko e nder ɗeen woote ɓiɓɓe Guinée cuɓotoo sariya mawɗo leydi ndii. Luulndiiɓe laamu nguu yahdaani e ɗiin suɓngooji. Ina tawee e ɓeen Cellou Dalein Diallo. Oo luulndiiɗoo laamu Guinée, gardiiɗo fedde politik UFDG tuumi général Mamadi Doumbouya ko yiɗde rewde e ngoo suɓngo ngam heddaade e jappeere laamu nguu. O anndinii wonnde oon yiɗa teddinde woondoore mum tottitde laamu nguu. Ko kanko Cellou Dalein Diallo woni koɗo men hannde. E faandu haala Ibraahima Timmbi Bah, o artii e toɓɓe keewɗe gila e ngoo seppo ngo ɓe noddi ñande 5 nduu lewru 9ɓuru haa e alhaali hootugol makko Gine.

Keɗoɗen..

To leydi Moritani: wonii hannde lebbi ko ardiiɓe leydi ndii puɗɗii golle mumen ngam haɓde e ɗanne e nder leydi hee tawo ko ɗanne ɗe ndewaani sariya. Ko e nder ɗuum ɓe puɗɗii nawtude arani en to leyɗeele ɓe Afrik worgo Saharaa. Ko gollal ngal luulndiyanke mawɗo Moritaninaajo, hono Biram Dah Abeyd, ñiŋi. Hooreejo haɓɓere haɓatoonde Tippudi laamu Moritani (coalition anti-système) woni koɗo men hannde. E faandu haala jooɗaniiɗo en to Nuwaasot, Umaar Alhajji Caam, o yeewtii kadi e geɗe goɗɗe joljole  ko wayi no kampaañ momtugol njelaari e yuɓɓinde kaaldigal ngenndiwal ngal laamu nguu daɗɗi.