Koɗo men hannde

Yimɓe ɗuuɗuɓe, tuumaaɓe ngeenaari bonndi nanngaama e ɗee balɗe faltiiɗe. E ɓen no tawaa Farba Ngom depiteejo, Tahiiru Saar, jooma jawdiijo wonndude e Lat Jop jaagorɗo coftal-ɓalli kiɗɗo. Ɓee fof ko yimɓe ɓaadiiɓe Makki Sall hooreejo leydi kiɗɗo. Hiɓe tuumaa wujjugol miliyaarji CEFA ɗuuɗuɗi.

E bi’ol maɓɓe, kamɓe ko sabu golle politik ɓe nanngira. E oo subaka hannde, en tasko oo alhaali. Koɗo men hannde ko Sammba Njaay, tawaaɗo e fedde Forum Siwil haɓoore ngeenaari bonndi. Himo jaaboo lamnde Ibrahiima Timmbi Bah

E oo saaha hannde fitinaaji mawɗi no jaalii e nder duunde Afrik. Hare kuliyankooɓe e nder leyɗe Sahel... Hare hakkunde konunkooɓe e nder Sudan... Hare hakkunde laamu RD Konngo e muurtuɓe M23: E nder ɗii kareeli muusɗi, ko siwilɓe wonaa e waraade, jawle mun bonnee. Ɗum no holli  hay so tawii sariyaaji no seeka, golle mawɗe hino haana waɗeede ngam tabintingol hakkeeji neɗɗanke.

Ngam taskagol pehe haanaaɗe ɓameede ngam ustugol ɗii kareeli tabintina ko haanani neɗɗanke, hiɗen jáɓɓii hannde Meetr Soyata Mayga, hooreejo kiɗɗo salndu Dental Leyɗe Afrik, UA toppitiindu hakkeeji Neɗɗanke. Himo jaaboo lamnde Sory Ibrahim...

Senegaal, sukaaɓe rewɓe ɓe duuɓi mum toowaali timmuɓe 11 sunninaama walla haddaama e hakkundeere nduu lewru ɗiɗiɓuru e nder Diiwal Kasamans. Ko ɗum holli calɗi Dental adunaaru ONI daraniiɗi hakkeeji rewɓe e sukaaɓe. Ɗee pelle mettinii oo kabaaru. Kono, o ŋalɗinaali Abi Jallo hooreeɗo kiɗɗo fedde sarɗiyankooɓe (Juriste) Senegaal. Ko ɗum si o ñaagii Hooreeɓe Senegaal ɓamugol peeje haɗooje sunningol sukaaɓe rewɓe. Ko kanko woni koɗo men Hannde. Heɗoɗen mo e faandu haala Ibrahiima Timmbi Bah. 

Yarugol doroogu Kush hino ɓeydaade e leyɗe hirnaange Afrik, tenŋtinii Sarlon, Gine, e Gine Bisawo. Doroogu wonɗo e saabaade mayde sukaaɓe ɗuuɗuɓe. Ko ɗum ciimtol fedde Initiative globale, haɓoore fitinaaji eɓɓaaɗi holli. Yaurgol oo Kush hino layude e leyɗe goɗɗe hono Senegaal e Gaana.

So peeje ɓamaaka, bone oo doroogu mettan huɓindaade, ko ɗum wi’i Muhammadu Kaan wiɗtotooɗo ndee fedde Initiative globale, haɓoore fitinaaji eɓɓaaɗi. Ko kanko woni koɗo men hannde. Heɗoɗen mo e faandu haala Ibrahiima Timmbi Bah

Gine-Bisawo, suɓngooji hooreyaaku waɗan ñannde 30 lewru 11ɓuru. Ko ɗum hooreejo leydi ndii holli e ndee alaare. Lunndiiɓe laamu woɓɓe no saalii ngal pellital. E bi’ol maɓɓe manndaa Umaar Sisoko Mbaalo no haani gasude ñannde 27 nduu lewru ɗiɗaɓuru. Ɗum non, hayso tawii suudu ñaawirdu mawndu Gine-Bisawo hollii mannda oo hooreejo leydi ko ñannde 4 lewru 9ɓuru gasata.

Ko e oo saaha lurral, Dental leyɗe Hirnaange Afrik CEDEAO immini surooɓe mun e nder ndii leydi. Ngam taskagol oo alhaali, koɗo men hannde ko Idriisa Jallo, ardiiɗo fedde Politik Kawral Gine-Bisawo (l’Unité Nationale Bissau-Guinéenne). Himo jaaboo lamnde Ibrahiima Timmbi Bah.

E nder leyɗe Sahel, hakkeeji yimɓe daraniiɓe ko haanani neɗɗanke teddinaaka. Yoga e maɓɓe no torre Mali, Burkina Faso, Niijeer e Caad, ko ɗum holli FIDH   Fedde adunayankoore daraniinde hakkeeji Neɗɗanke  e OMCT, Walde haɓoore leptuggol neɗɗanke. Ɗin torraaji musɗi no fawii e nanngeede, sokkeede, hulmineede walla raɗeede. Koɗo men hannnde ko Hapsatu Bah Minte gooto e hooreeɓe FIDH. Hinomo jaaboo lamnde Ibrahiima Timmbi Bah.

 Gollooɓe e baŋŋe cellal e jannde ngaɗii yoppere golle e ndee yontere. Ɓee, no ƴami hooreeɓe leydi ndii ɓeydugol joɓdi maɓɓe e newaare e nder gollirɗe maɓɓe. Ndee yoppere golle waɗii saaha mo guwerneman on holli wonnde leydi ndii hino joggii caɗeele faggudu. Ngam yewtugol ko holno hooreeɓe leydi ndii aadii jaɓɓoraade ɗee ƴamanɗe, koɗo men hannde ko Mammadu Lamin Jante hooreejo suudu mawndu toppitiindu kaaldigal Renndo. Himo jaaboo lamnde Oolel Taal.

Hikka ko Queen Rima dañi Mbuuñaari Dekuwerte Rfi. Oo debbo yimoowo Ginenaajo mo duuɓi 29 heɓii nguu polgu caggal ɗaɓɓanɗe tati. Gimol makko foolingol mo ko yimiraangol dancehall wonndude e aalaaji yimirɗi Ginenaaji. Ko amugol e jaɓangol yimooɓe, Queen Rima fuɗɗori naalankaagal. Gimi makko ɓurɗi ɗuuɗude no faatii e ɓamtaare rewɓe. Dañugolmo ndii Mbuuñaari no laatii welo-welo mawngo. Ko kanko woni koɗo men hannde. Himo jaaboo lamnde Ibrahiima Timmbi Bah.

Ko Mahamudu Ali Yusuf suɓaa hooreejo ngoomu Dental Leyɗe Afrik. Oo jibutinaajo foolii Rayla Odinga, ɓuranooɗo tijjeede laataagol hooreejo ngal Kawtital. Ko Mahamudu Ali Yusuf ardotoo ngal dental e ɗii duuɓi 4 arooji ɗoo. Oo jaagorɗo kalfinaaɗo jokkondiral hakkunde Jibuti e Leyɗe Goɗɗe kiɗɗo no jogii piile heewɗe e laamu makko e ngal Dental UA.

Gila RD Konngo haa Sudan, hara em yejjitaali Leyɗe Sahel. Ko holɗum Mahamudu Ali Yusuf waawi waɗude ngam artirgol jaam e ɗee leyɗe? Koɗo men hannde ko Muley Ismayël Jallo, hertorɗo dawro. Himo Jaaboo lamnde Ibrahiima Timmbi Bah.

Ivoine Akhi Soyer, debbo ardiiɗo meeri Freetown laamorde Siyera Lewon gilla duuɓi 6 hannde. O waɗii haɓugol waylo weeyo e daranaade hakkeeji sukaaɓe rewɓe.Ɗee golle ko keewɗe faayda e ndii leydi Siyera Lewon to sukaaɓe famarɓe keewi heɓude deedi ko ɓuri heewde ɗo Afrik.

.E ndee laamorde Freetown, yimɓe heewɓe no maaya hitaande kala ko rewi e fawtagol ndiyam toɓo saabu battane  waylo weeyo.No Ivoine Akhi Soyer,meer Freetown tammborii ɗee golle mawɗe, himo jaaboo lamnde Kajjatu JALLO nultondiraaɗo men to Freetown.