Koɗo men hannde

Hitaande 2024 hitaanike Afriknaaɓe ɗannotooɓe hitaande ɓaleere. Hiɓe timmi yimɓe 10 400 mayɓe e nder maayo hakkunde Afrik e Espaañ e ndee hitaande saaliinde. Immiiɓe Afrik naati Espaañ hino yaha 47 000 e limoore jaagorgal halfinaangal geɗe ndii leydi. Hewɓe e ɓee ko Senegaal e Moritani ummorii. Hari haa hannde sifa ndee limoore heɓaaka. Holko saabii garol hooreeɓe hesɓe

Senegaal ustaali sukaaɓe senegalnaaɓe wonuɓe e etaade yahugol leyɗe porto ? Hol peeje haana ɓameede ngam ustugol ɗee maayeele yimɓe ɗannotooɓe e nder ɗee maaje ? Koɗo men hannde ko Aamadu Bokar Sam tawaaɗo e fedde Españaare daraniinde hakkeeji feruɓe no wi’ee CEPAIM. Himo jaaboo lamnde Ibrahiima Timmbi Bah

Konu Faransi yaltan Senegaal e Koddiwaar. Ko ɗum hooreeɓe ɗee leyɗe ɗiɗi holli e ndee talataare. Basiiru Jomay Faay e Alasan Waatara ƴettii ngal pellital caggal nde hooreeɓe leyɗe Sahel wonndude e Caad, riiwi konu Faransi e leyɗe maɓɓe. Ngol riiwol Faransi ɗoo wonaa ko ŋalɗini, e yi'annde Dr Abdu Bah sabu e bi’ol makko ɓiɓɓe ɗee leyɗe yiɗaa ko konu Faransi heddii e nder duunde Afrik. Mbele yaltugol nguu konu gonal ngal ɗuuɓi cappanɗe e nder ɗee leyɗe wooday ko battini ? Ko holno darnde Faransi laatorta Afrik e nder ɗii ɗuuɓi arooji ? Koɗo men hannde ko Dr Abdu Bah, jannginoowo to Iniversite. Himo jaaboo lamnde Ibrahiima
Timmbi Bah.

Gine, laamu faddewu gasaali hanki wano haldiranoo non. Lamndal ngal hannde, ko honnde demokarasi artata e ndii leydi?  Ƴettoowo konngol e innde guwerneman on hollii wonnde woote referandom  hino waawa laataade e nder ɗii lebbi jeego’o arooji. Ko Usman Gaawal Jallo woni koɗo men hannde. E faandu haala Ibrahiima Timmbi Bah, o jaabike kadi lunndiiɓe laamu Gine, nodduɓe seppooji gila e ndee yontere aroore. Keɗoɗen.

Laamu faddewu hino haanunoo lannude hannde, ñannde 31 lewru 12ɓuru. Kono, hooreeɓe leydi ndii hollii wonndema ndii ahdi waawa laataade sabu dosɗe walla ñuyle artirooje laamu potal joɗɗinaaka haa hannde. Wasde teddinnde ndii alahdi welaani lunndiiɓe laamu nguu. Hewɓe e maɓɓe noddii seppooji e ɗee balɗe arooje.

Holko saabii nguu laamu faddewu waawataa joofude e nder ndee hitaande ?

Ko holɗun ɗii seppooji ɗi ɓee lunndiiɓe noddi jibbinta ?

Koɗo men hannde ko Dr Abdullay Jallo lunndiiɗo laamu ardiiɗo fedde politik MSD. Himo jaaboo lamnde Ibrahhima Timmbi Bah

Hooreejo jaagorɓe Senegaal, Usmaan SONKO waɗii yewtere mum politik kuuɓal yeeso sarɗiyankooɓe leydi ndii e aljuma yawtunde. Ɗum ko toɓɓe walla eɓɓooje ɗe ɓe jogii gollude e nder duuɓi 25 arooji ɗii, maa mi wi’a haa e hitaande 2050. No jeyaa e ɗen toɓɓe weynugol eɓɓoore sariya fii bortugol sariya yaaforɗo fitinaaji waɗunooɗi hakkunde hitaande 2021 e 2024. Sariya mo Makki Sall ƴamunoo yo woote.

Ɓamtude faggudu leydi ndii e fawgol kala naatoowo Senegaal jogaade visa si tawii senegalnaajo ƴettan visa fii yahugol e ndin leydi. Ngam taskaade ndee yewtere Usmaan Sonko hooreejo jaagorɓe ngam anndinnde toɓɓe ɗe

guwerneman oo haani ɗoworde e nder oo mannda maɓɓe, miɗo ɓanniti Ibrahiimaa ANN, jaayndeyankoojo senegalnaajo herɗorɗo dawro, Ko kanko woni koɗo men.

Faatumata Si Sawaane

Alhaali darwo sukaaɓe ɓen ko huunde haanunde hittineede fii mun. 75 e nder teemederewel ɓiɓɓe leydi ndii ko sukaɓe ɓe duuɓi 35. A tawan feƴƴere e maɓɓe ko duuɓi 18 jogii. Ɗee limooje no holli wonndema, ko sukaaɓe ɓen ɓuri ɗuuɗude e ɓiɓɓe leydi ndii. kono ngal keewal maɓɓe ɗuuɗaali nafude e nder ɓamtal leydi ndii e baŋŋeeli goɗɗi, sabu ton sukaaɓe ɓen ɗuuɗa e politik .Ko ɗum saabi sukaaɓe keewɓe kamerun no daranii waylude ɗum .

Hannde yidi maɓɓe ko yo sukaaɓe ɓen dawro. Ɗum ko wano oo wi’eteeɗo Ibrahim Yiche, mo duuɓi 32 hooreejo fedde dawro « ACTION » daraniiɗo heyɗintinngol. O dañii mbuuñaari to baŋŋe politik noddirteendi “Révélation politique de l’année 2024” ko kanko woni koɗo men hannde Himo holla nafaa tawtoreede sukaaɓe ɓen e alhaali dawro leydi e faandu haala Mariyamu Mumini nultondiraazo amen Kamerun

Faransi, caggal balɗe sappo ɗe innde jaagorɓe heyɓe guwerneman on haɓɓa, Emmaniyel Makron anndinii e altine jaagorɓe oo guwerneman keso mo François Bayrou woni hoore mum. Hooreeɓe jaagorɓe Faransi hiɓɓe ɗiɗo no jeyaama e oo guwerneman: Elisabett Boorn e Manuel Valls, woodii artiraaɓe kadi e guwerneman Faransi wano Gerald Darmanin wonnunooɗo jaagorɗo fiyaakuuji  nder leydi gila hitaande 2020 haa e hitaaande 2024. Ngam joɗɗinngol oo guwerneman makko, François Bayrou ɓuri tugnaade ko e jogiiɓe ganndal e faamu to baŋŋe politik. Kono tippude e golle haɓɓiiɗe mo, ko holno taskorɗon oo guwerneman keso?
Ngam jaabagol ɗee lamnde, koɗo men on hannde ko Mammadu DEM , renndoyanke, hertorɗo alhaali dawro Faransi.Himo e faandu haala Faatumata SI Sawaane.

Leyɗe Dental AES,( Mali, Burkina Faso e Nijeer) ɓeydii fayin anndinde pellital maɓɓe yaltugol e Dental CEDEAO. E nder ɓatakuru ndu ɓe waɗi e alat yawtuɗo, ɓe bugitike walla ɓe salike happu lebbi jeego'o ngu hooreeɓe CEDEAO jonni ɓe nde ɓe tummbondiri ñannde 15 nduu lewru, Abuja. Happu ngu leyɗe AES jonnanoo ngam daarude si ɓe ruttoto e ngal Dental Leyɗe Hiraanga Afrik. Ko holɗum ngal pellital jibinanta leyɗeele ɗee ? Heɗoɗen Husseyn BAH jaayndeyankoojo, hertorɗo falnde Sahel, hino jaaboo lamnde Faatumata Si Sawaane.

Huuwondiral/jokkondiral hakkunde Najeriya e Niijeer leyɗe ɗiɗi kawtirɗe, no ɓeyɗoo tan bonude. Najeriya yeddii e aset tuume ɗe ardiiɓe Nijeer fawi e ɗow maɓɓe. Tuume wi’uɗe wonnde Najeriya no wonude sabu dillinnde leydi maɓɓe ndin. E nder ɓatakuru, ɓee hooreeɓe Najeriya no tentini wonnde konu maɓɓe tambitaaki walla huuwondira e ngoomu kuliyankooɓe noddirteengu Lakurawa wadunde ndee fiyannde liddu « oléoduc » to keerol hakkunde Niijeer-Benen ñannde 13 lewru ndu wonuɗen e mun.

Ko holɗum ngal pooɗondiral hakkunde Niijeer e Najeriya waawi battinnde e leyɗe ɗiɗi ɗee. Koɗo men hannde ko Abdallah Umaru golloowo e bannge faggudu « operateur economik » himo jaaboo lamnde Faatumata Si Sawaane

Ndee ñalaande adunayankoore hertinanaande fergu walla ɗanle wurnitaama walla teddinaama hanki ñannde 18 12ɓuru e nder adunaaru nduu. Fii nga ñallal ko ngam ƴeewndaade e humpitude ko faatii e ɗee ɗanle ɗe ɗoftaaki sariya, wonuɗe e ɓeydaade ñannde kala e wonuɗe kadi e saabaade maayde ujune ujune ɗanniyankooɓe. Huunde walla bone mawɗo mo ardiiɓe leyɗe ɗee waawaali haɓude haa nih.

E bi’ol Mammadu Mustafa BAH jooɗiiɗo Dawlaaji Ndentuɗi Amerik, daraniiɗo haɓugol ɗanle ɗe ɗoftaaki sariya, ujunaaje yimɓe rewruɓe Mexique naati ɗii duuɓi sakkitiiɗi Amerik no jogii caɗeele ngam wonude e nder leydi ndin . Ko kanko woni koɗo men hannde, himo jaaboo lamnde Faatumata Si Sawaane