Koɗo men hannde

E alat falfiinde ndee fitina mawɗo waɗii Nzerekore, worgo fuɗnaage Gine. Ɗum ko e saayi
nde timmal foolotiro fuku-koyngal fijetenoo hakkunde diɗɗal diiwal Nzerekore ngal  Labe to estaad Nzerekore noddirteeɗo « etaad 3 ñayaɓuru ». Foolotiro innitiraango Jeneral Mamadi Dummbuya.
Tippude e limoore nde guwerneman on holli, ko timmi yimɓe 56 waasi pittaali maɓɓe e oo estaad, buy kadi barmii. Ko sabu pellital ngal ñaawoowo fijindaaru ndun ƴetti, addi fitinaaji ɗin. Ko ɗon e ɗon piiji fuɗɗaa werleede, polisiiɓe ɓen kaɗi fuɗɗii fellude gaz lakromojeen. E bi’ol Mammadu Aadama JALLO, hooreejo Rajo, "Zaly FM" to N’Zerekore, tawaanooɗo to nder estad, ko nii fitina fuɗɗori haa tiiɗi. Kanko woni koɗo men hannde, himo jaaboo lamnde Faatumata Si Saawane

Leydi sahel ka konu faransi tawata hino heddinoo holliti e yontere yawtunde wonnde ɓe dartinii gollidal maɓɓe e baŋŋe ndeenaagu e konu Faransi. E nder winndannde walla ɓatakuru ndu Abderaman Kulamallah, jaagorɗo halfinaanɗo huuwondiral hakkunde Caad e leyɗe janane siifii, guwerneman Caad anndinii wondema ɓe ƴettii ngal pellital caggal nde ɓe yurnitii fota e dow alhaaliiji Caad.

E bi’ol maɓɓe, hewtii ka leydi ndin daranoo hoore mun fii ndimaaku mayri. Ko holɗum ngal pellital Caad firtugol aadodal ngal ɓe siifidi e Faransi e baŋñe ndeenaaguu fiirti? Ko holɗum ngal pellital waawaata battinnde e gonal konu Faransi e nder

Sahel e Afrik. Koɗo men hannde ko Dr Mansur LIH. Himo jaabo lamnde Faatumata SI SAAWANE

Timmii duuɓi 80 gila warngo battinngo e taariika, waɗi nder Caaroy to Senegaal. Ɗum ko caggal nde konunkooɓe Faransi wari e ndee daakorde Caaroy, tirayeerɓe iwtunooɓe haɓangol Faransi e hare adunayankooje e hitaande 1939-1945 . Ɗum, saɓu hiɓe ƴami joɓdi maɓɓe. E bi’ol ardiiɓe konu Faransi, ko tirayerɓe 35 waranoo nden ñannde. Kono taariikayankooɓe keewɓe no holli wonnde limoore tirayeerɓe waraaɓe Caaroy no sowi laabi sappo ko ɓee hooreeɓe holli ko.

ko holɗum tigi feƴƴi nden ñannde e nder daakorde  Caaroy ? Ko honɗum woni ko waɗaa haa hannde e ngoo waarngo? Koɗo men hannde ko Profeseer Buubakaar BARI taarikeyankeejo.

Mali, oo tele heeriiɗo Joliba TV accii gollude gila hanki. Ɗum ko caggal nde "HAC" on jaɓitii kaydi newnanndi Joliba TV woodeede walla gollude no wi’ee « licence ». Ngal pellital uddugol oo tele, ƴettaama ɓawto nde suudu toowundu halfinaandu kala ko yowitii e kompite (CSC) Burkina Faso wullitii e ɗow oo tele sabu yewtere nde Iisa Kawu Jiim waɗunoo e on tele heɓii jonte. Yewtere nde oo dawroyankeejo malinaajo yeddi e mum alhaali etannde ciwlere laamu nde ardiiɓe Burkina Faso hollunoo no sakkii e nder leydi ndin. Ngal anngal teddinngol ndiimaaku jaaynde ndee jibinii haalullaaji keewɗi e nder Mali.
Jaagorɗo kiɗɗo sariya leydi ndii, Meeter Mammadu Ismaayel Konaate no holli wonnde jaayndeeji ɗin no haani jonnindirde juuɗe ngam dartaade ndee ɓittere walla ɗee doole e lamu faddewu woni e fawde e hoore jaayniɗe ɗen. Ko kanko woni koɗo men hannde e faandu Sori Ibrahima.

Ɗee balɗe 16 hertinanaaɗe haɓugol fitinaaji faweteeɗi e ɗow rewɓe fampaama hanki e alat e nder adunaaru nduu. Cimtol ngol njuɓɓudi rewɓe Afrik noddirteendi e ɗemngal faransiire « Réseau des femmes élues locales d’Afrique » lollini e hitaande 2023, no holli wonndema e nder Afrik, ko fawi debbo gooto e nder ɗiɗo no faweede fitinaaji e nder ñallal. Tawa ɓurɗi ɗin e majji ko hiɓiiɓe ɓen rewɓe waɗɗata ɗi.

Ko holɗum saaɓi ɗii fitinaaji faweteeɗi e dow rewɓe no jokki ? Ko holno oo alhaali haɓirtee? E bi’ol Muusa Yero BAH hooreejo fedde haɓoore fitinaaji waɗeteeɗi e dow rewɓe, ɗii fitinaaji wonaaɗi e waɗeede e dow ɓee rewɓe hanaaka

suuɗeede.

 Jeneral Abdullay Mayga fuɗɗino golle mun hooreejo jaagorɓe e aljuma, ɗum ko bimmbi ñannde hooreejo laamu faddewu nguu toɗɗiimo lomtoo Coggel Mayga, ɓortaaɗo laamu hooreyaaku jaagorɓe e alkamisa yawɗuɗo, ɓawto nde o ŋiñi komunkooɓe ardiiɓe Mali. Abdullay Mayga oo hooreejo keso tonnginaali joɗɗinngol guwermeman mo o gollidata on. Kono oo guwerneman waylitere mawnde taskaaka e mun. Sabu yoga e jaagorɓe hiɓɓe ɓen artiraama.

Abdullay Mayga ardoto fayin jaagorgal fiyaakuuji leydi ndii ngal o halfinanoo e guwerneman kiɗɗo on. O sinci jaagorgal kesal halfinaangal kala ko yowitii e dawro e alhaali suɓngooji leydi ndii. Ko holɗum haana maanditeede e nguu mbayliigu guwerneman Mali ? Huseeni BA, jaayndeyankoojo, hertorɗo falnde Sahel no jaaboo lamnde Faatumata Si Sawaane

To Banngi ina tawee e nder kasooji merseneerɓe Riisi, jaggaaɓe ko gila lebbi 9 hannde walla maayɓe. Ko ina tolnoo e duuɓi tati, Ephrem Yalike wonii jogiiɗo kabaaruuji goomu wagner, haa nde o tuuma jamfa caahtugol bonanndaaji ɗi merseneerɓe mbaɗi. Kono o waawi yaltude leydi ndii e dow ballal njuɓundi noddiirteendi « plateforme des lanceurs d'alerte en Afrique » (PPLAAF).

Kanko woni Koɗo François Mazet

To Mali haalullaaji no jokki caggal konnguɗi ɗi hooreejo jaagorɓe ɓee, Coggel Mayga, suuti e asaweere ƴaɓɓiinde ndee. E nder tumnbondiral e wonanɓe fedde makko noddirteende  M5 RFP, oo hooreejo guwerneman ŋiñii sanne konunkooɓe ardiiɓe Mali gila e hitaande 2020. E bi’ol makko konunkooɓe ɓee alaa e tawnorde mo e pellite keewɗe ɗe ɓe ƴettata ko faati e alhaali leydi ndii, wano ko yowiti e happu laamu faddewu nguu. Ɗii konnguɗi Coggel Mayga liddiiɗi ardiiɓe laamu faddewu nguu addii mette ɗuuɗuɗe haa teeŋti to ɓanŋe pelle jinnganooje konunkooɓe ɓee. Pelle goɗɗe ƴamii ittugol mo hooreejo jaagorɓe. Holno taskorɗon ɗii konnguɗi Coggel Mayga? Ko holno njiiruɗon gollidal hakkunde Coggel Mayga e konunkooɓe ardiiɓe laamu faddewu nguu caggal nde o ŋiñi no ɓe laamori leydi ndii ?

Demmba Ndongo, hertorɗo dawro ina jaabo e ɗee naamnde. Heɗoɗen mo e faandu haala Faatumata Si Sawane

Senegaal ko hannde ndii njaltudi suɓngooji sarɗinkooɓe yuɓɓinaaɗi e alat yawtuɗo ko hannde e talaata yaltintee. Kono njaltudi araniri feeñuɗi ɗii no holli wonnde ko PASTEF, fedd nde Usmaan Sonko woni hoore doggol mum fooli e keewal e ɗii suɓngooji. Tunaade e njuɓundi toppitiindi mooɓindirgol njaltuɗi no wi’ee « Vie-Publique.sn » Pastef, fedde laamuyankoore nden heɓii Julle 129 e nder 165 to suudu sarɗinkooru.
E bi’ol Mammadu Albeer SI, hertorɗo dawro, nguu poolgu PASTEF, wonaa huund juhude mo . Jooni non Senegaalnaaɓe no haɓɓori ɓe hunnugol aadiiji ɗi ɓe ƴettani ɓe nde ɓe ɗaɓɓata daaɗe maɓɓe fii laamagol. Ko kanko woni koɗo men hannde, himo jaaboo lamnde Faatumaya Si Sawaane.

Lurral mawngal no teskaa hakkunde hooreejo leydi ndin e lunndiiɓe laamu makko. Lurral waɗungal saaha nde caɗeele woodi e njuɓɓudiiji leydi ndin : Mbatu mawngu nguu fusanooma. Lurral no jaali e suudu ñaawirdu mawndu ndun, tawti kadi suɓngooji
hooreyaaku haanuɗi waɗude ɗoo e lewru ɗiɗaɓuru hitaande aroore ndee no saatii ko naɓtiraa yeeso. Ɗee caɗeele addii lunndiiɓe laamu Umaru Sisoko Mbalo tuumude mo salaade laatinnde woote hooreyaaku leydi ndii saaha nde ɗe haani waɗude ɗon.

Ko ɗun addi yo lunndiiɓe laamu nguu eɓɓu waɗugol seppooji ɗi ɓe waawaani laatinnde. Kono ɓe winndanii dental CEDEAO ɓatakuru, ngam hollude ko fawndii e nder Gine Bisaawo. Mbelle ndee fedde waawan ñippude ngal lurral ? Ko holnde ɗii suɓngooji hooreyaaku waawata laataade ? Koɗo men hannde ko Mammadu Muktar Jallo, jannginoowo iniwersite. Himo jaaboo lamnde

Ibrahiima Timmbi Bah