Koɗo men hannde

Timmii hannde hitaande gila ndee loonde kuɓɓan fetti e nder galluure Korontiin, Komiin Kalum, Konaakiri. Ɗum ko jemma ñannde 17 no weetude 18 lewru 12ɓuru hitaande 2023. Tippude e limoore nde laamu ngun lawɗini, ko ɓuri yimɓe 20 waasuno pittaali maɓɓe e ndee fettannde, ɗuuɗɗuɓe kadi barmi. Ko ɓadii yimɓe ujune 11, ɗum no hawra emmbere ɓennguureeji ujune ɗiɗi e ko fawi heɓuɗi caɗeele e nder oo musiiba.

Hitaande caggal oo bone, Gine fuɗɗitike ɓamtude faggudu mun yanunoondu, kono looriiɓe ɓen kañunm haa jooni no wuurude talla-lakke (battane) masiibo on. Salimatu BARI, gooto e lorriiɓe sabu fettugol ndee loonde kuɓɓan, no sifoo fii cadɗeele ɗe ɓe wuuri e nder ndee hitaande. Ko kanko woni koɗo men hannde. Himo jaabo lamnde faatumata Si Saawaane.

Yimɓe miliyonji 35 e nder duunde Afrik eggii leyɗe mum e nder hitaande 2023. Ko ɗum mojobere adunayankoore toppitiinde eggudu nder leyɗe noddirteende IDMC holli e nder cimtol ngol ɓe lollini balɗe feƴƴuɗe. E bi’ol maɓɓe, ndee limoore hino sowi laabi tati limooje yimɓe egguɓe heɓii duuɓi 15. Ko woni sabu ɗii egguɗuuji, ko hare e musibaaji ɗuuɗuɗi no jeyaa e ɗin waame, yooro leydi e kokke. Alexandra Bilak hooreejo IDMC, no taskoo oo alhaali. Ko kanko woni koɗo men hannde. Himo e faandu haala Leyla Mande.

Hooreeɓe leyɗe dental CEDEAO tumnbondirii hanki a alat to Abuja laamorde Najeriya. E ndee jonnde maɓɓe 66 ɓere, ɓee hooreeɓe leyɗe yewti ko faati e yaltugol dental leyɗe sahel AES e nder Cedeao. Mali, Burkina Faso e Niijeer no okkanoo happu haa 29, 1ɓuru hitaande darotoonde ndee. Gila nden ɓe  jeyetaake hankadi e Dental Leyɗe Hirnaange Afrik. Kono Jonnde  CEDEAO ndee juutinii ngal lajal lebbi jeego'o kadi. Ko holno taskorɗon pellite hooreeɓe dente ɗee ɗiɗi, CEDEAO e AES? Dr Abdu BA hertorɗo dawro e dental CEDEAO no jaaboo lamnde Faatumata SI Sawaane.

Ko ɓadii konunkooɓe teemedere waasii pittaali mun e piyanɗe kuliyankooɓe e nder departeman Tera diiwal Tilaberi. Ko timmi siwilɓe 50yo kadi maayi e nder fiyannde wootere nden. Nguu njaggu waɗii balɗe 5 tan ɓawto waɗungu e asawe yawtunde e nokkuure wootere nden, nde yimɓe 21 heddii e nder mun.

Holko saabii piyanɗe no jokki waɗude e ndee nokkuure Tera? Ko holno ɓee kuliyankooɓe/jihadiyankooɓe woni e heɓude doole ngam fawude wano ɗii fitinaaji e dow konunkooɓe e siwilɓe. Ko Demba Ndongo hertorɗo alhaali ndeenaagu woni koɗo men hannde e faadu haala Faatumata SI Sawaane

Ɓawto duuɓi jeetati nde o iwi e laamu hooreyaaku, John Mahama, suɓitaama hooreejo leydi laawol ɗiɗaɓol. Oo hooreejo kiɗɗo leydi, kanndidaajo jeyaaɗo e lumndiiɓe laamu nguu fooli e ɗii suɓngooji hooreyaaku yuɓɓinaaɗi e asewe yawtunde. O foolii oo tiindondiraaɗo makko Mahamuudu Bawumiya, cukko hooreejo leydi ndin,wonɗo kadi kanndidaajo fedde laamuyankoore nden. Mahamuudu Bawumiya foolaaɗo oo e ɗee woote jaɓii poolgu John Mahama, o nooddii mo ngam weltanagol mo. Ghana jonni  misal kadi  e baŋŋe demokrasi denndaangal leyɗe hirnaange Afrik ɗe konunkooɓe ciwlii laamuuji. Ko holno taskorɗon poolgu oo hooreejo kiɗɗo Ghana ? Ko holɗum haawi wonude golle heñoraɗe teeriiɗe mo? Koɗo men hannde ko Umaru Sanda AAMADU, Jaayndeyankooja Ghana , hertorɗo alhaali dawro. Himo jaaboo lamnde Faatumata Si Saawane.

Hooreeɓe 11 pelle dawro Mali sokanooɓe gila e lewru 6 ɓuru hitaande nde wonuɗen e mun, accitama e alkamisa yawtuɗo. Ɓee jaagorɓe hiɓɓe e dawroyankooɓe siifunooɓe ɓatakuru noddirteendu « Déclaration du 31 mars », jagganooɓe sabu hiɓe salii ɗoftaade laamu faddewu nguu, newnanaama yoppiteede tawo, caggal nde ɓe rewnaa yeeso ñaawowo to Bamako.

Ngal pellital yoppitugolɓe ƴettaama e saayi nde tawata leydi ndii no e caɗeele dawro, hitooji goɗɗi kadi no noddude e kaaldal hakkunde ɓiɓɓe Mali.  Hara ko holno ngal pellital sariya accitugol ɓee dawroyankooɓe 11 Mali faamiraa ? Koɗo men on hannde ko Abduramaan Korera, cukko hooreejo fedde dawro ASMA (Alliance pour la solidarité au Mali). Himo jaabo lamnde Faatumata Si Saawane.

Ɓawto nde o ardii Siiri duuɓi 24 e nder hurmeede, Bashar El-Assad ɓortike laamu ngun o dogii o yaltii leydi ndin. Ɗum ko caggal nde pelle muurtuɓe liɓii laamu makko. Ca’e mawɗe Siiri keewɗe yananaaɗe bonnaama. Hay Damas laamorgo ngon waawaali dartaade njaggu ngun. Ngol yanugol hannde laamu Bashar El-Assad ngu Riisi e Iran tammbitii, ko waylitere taariikayankoore. Ko holɗum haanaa maandeede e yanugol laamu doole Bashar El-Assad ?

Ko holɗum ɗum battinnta e leyɗe Sahel jikkinorɗe ballal Riisi. Dr Abubakaar Demba Diabi no jaaboo e faandu haala Faatumata Si Saawaane. Ko kanko woni koɗo men hannde

Taskaram Koɗo Mawɗo jaɓɓii hannde ko Halima Rama Balde jannginoowo, daraniiɗo hakkeji rewɓe to Gine. O winndii deftere wi'eteende "les martyres de la tradition" rewɓe lorliiɓee e aada. Hannde njeewtaten ko e luulnde balɗe 16 ɗe ONU lelni hitaande kala ngam jeertinde haɓugol fitinaaji pawateeɗi e rewɓe. Ndee luulnde non fuɗɗiima gila altine 25 lewru sappo e go'oɓuru maa nde huuɓu ñannde 10 lewru ndu ngonɗen nduu.

Ko e yontere sakkitiinde daranagol fii hakkeeji rewɓe e ɗee balɗe 16 ɗe ONU lelni wona, holno no njiiruɗa ndee toɓɓere hikk?

holto worɓe ɓe ndarori e nde luulnde balɗe 16 ?

Heɗiyankooɓe, ko ɗoo yewtere men haaɗi hannde. Koɗo men wonno ko Halima Rama Balde jannginoowo, daraniiɗo hakkeji rewɓe to Guinee. o winndi deftere wi'eteende "les martyres de la tradition" rewɓe lorliiɓee e aada.

Njeewtatnoɗen hannde ko e luulnde balɗe 16 ngam haɓaade fitinaaji pawateeɗi e dow rewɓe.

Duuɓi jowi caggal nde juulirde mawnde Katolik’en noddirteende « Notre Dame de Paris » sumi, ɗun ko ñannde 2 lewru 4ɓuru hitaande 2019, udditugol nde ɓawto nde nde moƴƴintinaa laatooto e aset aroore. Wattitagol ndee juulirde mawnde no jeyanoo e faaleeji mawɗi hooreejo Faransi Emmaniyel Makron. Ngam yewtude fii taariika e kala ko fewti oo katedral « Notre Dame de Paris » Koɗo men on ko Joseph Mansare diinayankoojo kretiyen, imminaaɗo fii yottinngol lingilaa. Himo jaaboo lamnde Faatumata Si Saawane

E alat yawtunde hooreeɓe pelle jogiiɗe kaɓirɗe to rewo Mali buy, jeyaaɓe kawtital  kawtinoddirteengal "FLA", waraama bimmbi ñannde kawtital ngal joɗɗinaa. Ɗum waɗii caggal nde konu Mali werlii bommbooje e dow Tinsawaten sera keerol Aljeriya. FLA kawtital pelle wonuɗe e ƴamude yo Azawad hettu hoore mum, hollii wonnde ko konu Mali fawi ko’e e dow maɓɓe, e ko ɓe wari ɓee hooreeɓe maɓɓe, ko cembe tan okki ɓe. Taw ko holɗum saabii joɗɗinngol walla sincugol ngal kawtital FLA? Mammadu Umaar LIH hertorɗo ndeenaagu no taskoo alhaali oo. Himo e faandu haala Faatumata Si Sawaane.