Koɗo men hannde

Senegaalnaaɓe suɓoto e ndee alatiire depiteeɓe maɓɓe. Suɓngooji adintinaaɗi. Caggal lebbi 8 arugol Basiiru Jomaay Faay e laamu. Ɗii suɓngooji sarɗinkooji laatanto nguu laamu hesu ɓeto. Hino tawaa e majji pelle e kawtite lunndiiɗe laamu hewɗe. Ko ɓuri tentude e majje ko kawtital Makki Sall hooreejo leydi kiɗɗo Senegaal, ardiiɗo doggol woote. Caggal orngal musngal e nder leydi ndii, mbele PASTEF fedde politik laamuyankoore waawan dañude keewal e nduu suudu mbatu mawngu ? Taw si Makki Sall hooreejo kiɗɗo leydi ndii heɓtan daaɗe Senegalnaaɓe caggal lebbi 8 iwgol mo e laamu ? Ko holno ɗii suɓngooji joofirta caggal fitinaaji waɗuɗi e nder ngal orngal ? Ngam jaabaade ɗee lamnde, koɗo men hannde ko Demmba Ndongo, hertorɗo dawro. Heɗoɗen mo e faandu haala Ibrahiima Timmbi Bah.

Ko Tiken Jah Fakoli regge-manjo iwarnaajo woni koɗo men hannde. Oo yimoowo mawɗo hino jogii hirde hannde kiikiiɗe e yamnɗe 19 silmaaji 40 to Paris, laamorgo Faransi. E yewtere nde Frederik Garat waɗidi e makko, ɓe kaaldii ko faati e politik e nder leyɗe sahel wonndude e gartol Donald Trump e hoore Dawlaaji Ndentuɗi Marik. Heɗoɗen Timmbi Bah e Umaar Sow firi yewtere nden

Faa hannde anndaaka ko honnde tuma laamu faddewu nguu lannata. Sariya mawɗo mo guwerneman fodii on ɗoo e lannoode ndee hitaande wotaaka haa jooni hayso tawii eɓɓoore makko no weeɓitaneede ginenaaɓe ɓen e wertaango leydi ndii fof. E oo saaha, imminaaɓe Dental Adunaaru ONU no e njillu e nder ndii leydi ngam taskagol ko holɗun Gine hanndi ngam laatingol suɓngooji ɗin.

Ɓen imminaaɓe ONU yiidii e ardiiɓe pelle politik lunndiiɗe e ndee yontere faltiinde. Koɗo men hannde ko Rafii'u Soh, ardiiɗo fedde politik PRP. Faale makko ko yo ɓee imminaaɓe ONU tabintina kaaldal e kawral hakkunde konunkooɓe ardiiɓe laamu faddewu e pelle politik. Himo jaaboo lamnde Ibrahiima Timmbi Bah.

Cop 29, ɗum woni jonnde faatiinde e kiwal taariindi, fuɗɗike hannde Baku laamorgo Azerbaïjan. Ko ɓuri himmude e ndee jonnde hikka ko mottondiral jawle haɓirɗe mbayliigu weeyo. Kono, nguu batu no waɗude saha nde kulol mawngol woodani kiwal taariindi. Ko saabii ɗum, ko beydagol cemmbe dawroyankooɓe seɓɓitiiɓe, anndiraaɓe ngayngu kiwal taariindi. Ko ɓeydii ɗon kadi ko gartol Donald Trump e hoore Dawlaaji Ndentuɗi Amerik, neɗɗo mo suuɗata ngayngu makko faade e kiwal taariindi.

Alhaali saabiiɗi annde daraniiɓe kiwal taariindi, sabu ciimti ɗuuduɗi hollii wonndema so aadiiji goɗɗi waylaaka, bone mawɗo no saati juhude nduu adunaaru. Ngam yewtude e ndee toɓɓere hiɗen jaɓɓii hannde Faatumata Kante, hertorɗo taariindi. Himo jaaboo Ibrahiima Timmbi Bah.... 

To Dawlaaji Ndentuɗi Amerik ko Danald Trump arti e laamu. Oo kandidaajo repibliknaaɓe foolii Kamala Harris oo debbo Demokratjo. Kono Ngol gartol Donald Trump hino ŋalɗini yimɓe heewɓe. Hingol laatii kadi annde lsuɓngeyɗe ɗuuɗuɗe e nder nduu adunaaru, sabu darnde oo hooreejo leydi suɓaaɗo no serti e yi'annde mo o lomtotoo oo.

Mbele gartol makko woodan ko wayli e kareeli jaaliiɗi e nduu adunaaru? Ko holɗun wonata politik makko faadee e Afrik? Koɗo men hannde ko Abdul Soh, diplomatjo golloowo dental ONI foftiiɗo. Himo jaaboo lamnde  Ibrahiima Timmbi Bah.

E nder oo KABARU men heeriiɗo faatiiɗo e ɗii suɓngooji hooreyaaku taariikayankooj Dawlaaji Ndentuɗi Amerik, En jaɓɓoto hoɓɓe ɗiɗo. Ɓen ko Demmba Ndongo, hertorɗo dawro, hiɗen wonndi e makko e guurol ngol gila Nuwakshot, leydi Moritani.
Koɗo men ɗiɗabo ko Abdurahman Jallo, jooɗiiɗo New York, Dawlaaji Ndentuɗi Amerik. Ko neɗɗo Sosiyete Siwil daraniiɗo ɓaleeɓe e nder Amerik.

Ɓiɓɓe Amerik suɓoto hannde hooreejo leydi maɓɓe hakkunde Donald Trump, hooreejo leydi kiɗɗo repibliknaajo e Kamala Harris, debbo demakratnaajo. Ɗii suɓngooji waɗan caggal orngal musngal hakkunde ɓee kanndidaaɓe ɗiɗo, sertuɓe eɓɓooje. Ko hommbo e maɓɓe ameriknaaɓe suɓotoo ? Mbele ɓe waɗan Kamala Harris debbo arano, hooreejo Dawlaaji Ndentuɗi Amerik ? Mbele ɓe artiran Donald Trump e hoore leydi ndii ? Koɗo men hannde ko Demmba Ndongo, hertorɗo dawro himo jaaboo lamnde Ibrahiima Timmbi Bah.

Dawlaaji Ndentuɗi Amerik: suɓngooji hooreyaaku ɗii waɗan janngo. Ɓiɓɓe Amerik suɓoto hakkunde Donald Trump, hooreejo leydi kiɗɗo republiknaajo e Kamala Harris, debbo demakratnaajo. E nder ngal orngal, ɓee non kandidaaɓe ɗiɗo, inde Afrik yewtaaka fayda. Ɗun no holli alhaali ndee duunde hittaane e hooreeɓe Dawlaaji Ndentuɗi Amerik. Ko ɗun holli Abdrahman Jallo, daraniiɗo Afriknaaɓe wonuɓe New York.

O ɓeydi wonnde hino waawa ko ndee darnde Dawlaaji Ndentuɗi Amerik wayloo e ɗii duuɓi arooji sabu kirondiral hakkunde maɓɓe e Siin e Riisi ngam semmbingol darnde e nder Afrik. Ko  Abdrahman Jallo  woni koɗo men hannde. Himo jaaboo lamnde Ibrahiima Timmbi Bah

Senegaal, torraaji ɗi waameeji saabii addii bonondaaji buy e nder ndii leydi. Ko ɓuri tiiɗinnde oo bone ko keeweeɗi mawndi canɗi hono Senegaal, Faleme e Gammbiya. Ndiyam yaltii e majji bonnii gese e gure ɗuuɗuɗe e nder leydi ndii. Hannde ngurndam hoɗuɓe e ɗee nokkuuje hino sattii, sabu ɓe alaa koɗorɗe, ɓe alaa kadi ko ñaama. Ko ɓeydii e ɗum kulol no woodani cellal maɓɓe. Koɗo men hannde ko Ibrahiima Jah, go'oto e ardiiɓe fedde dariinde wallugol ɓee yimɓe lorriiɓe e ɗam ilam. Himo jaaboo lamnde Ibrahiima Timmbi Bah.

E leydi Senegaal, kanndidaaɓe kawtite e parti politikji 41 hino yiilaade gila alat feƴƴuɗo e leydi ndii ngam ɗaɓɓude daaɗe sengalnaaɓe faade e suɓngooji depiteeɓe saatiiɗi ñannde17 lewru 11ɓuru. Gila ngal orngal fuɗɗi RFI Fulfulde e Mandenkan no jaɓɓaade ɓee kanndidaaɓe ngam yo ɓe holluɓe eɓɓooje maɓɓe e ɗii suɓngooji.

Caggal Aamadou Ba, ardiiɗo kawtital Jam Ak Jariñ ɗun woni jam e nafoore e ɗemngal Fulfulde, e Makki Sall hooreejo Senegaal kiɗɗo, hannde hiɗen jaɓɓii Alfa Ba, tawaaɗo e fedde laamuyankoore PASTEF. Ko kanko woni koolaaɗo laamu halfinaaɗo koperatiifji e wallitagol remooɓe (Secrétaire d’État aux Coopératives et à l’Encadrement paysan ). Himo jaaboo lamnde Ibrahiima Timmbi Bah.