Koɗo men hannde

Fotde yimɓe ɗanniiɓe 5 000 ummoriiɓe e leyɗe hirnaange Afrik maayii hakkunde lewru 1ɓuru e lewru 5ɓuru ndee hitaande hikka. Ko ɗum holli fedde Espaañ wi'eteende "Caminando Fronteras" nantinde wonndema limoore mayɓe e nder maaje ɓeydike sanne. Leyɗeele hirnaange Afrik yeru Senegaal e Moritani ngontii nokkuuji ɗi ɗannotooɓe ujunaaji ujunaaji ummortoo ngam yahugol Erop. Huunde maapinnde Salimata SIH, Moritaninaajo dilloowo ko faati e ɗalle. E bi’ol makko laawi ɓamaaɗi ngam haɓugol ɗalle ɗe rewaani sariya ko batte bonɗe saabii. Ko ɗum waɗi himo ƴami yo laawi kesi teske. Ko kanko woni koɗo men hannde. Omo jaaboo lamnde Ibrahiima Timmbi Bah.

To Leyɗeele Ndennduɗe Amrik, ko hommbo laatotoo kandiaajo fedde demokraatɓe e wooteeji saatiiɗi e lewru 11ɓuru arooru nduu? Joe Biden ardiiɗo leydi ndii, toɗɗike Kamala Harris, caggal yiltagol mo e ɗee woote. Heddii ko ƴeewude mbele cukko hooreejo leydi ndii no waawi jaɓeede, denndaangal ardiiɓe fedde politik makko nden bammba mo? So o yawtii ngal ɗon daawal, mbele Kamala Harris, oo ngonnooɗo pororureerjo Kaliforniya  waawi wonnde debbo arano hooreejo Amerik ? Mbele leƴƴi tosooki ɗii wallan Kamala Harris sabu kanko e hoore makko ko e majji o ummii? Hannde eɗen njeewta e dow ɗee toɓɓe enen e Ceerno Sulaymaan Abdallaay JALLO daraniiɗo hakkeeji ɓaleeɓe USA. Himo jaaboo ko e lamnde Ibrahiima Timmbi Bah.

Laamu Najeriya waɗii fedde metta ɓernde, ɓe fawii  ñomaande dow "meta" , apilikasiyon renndinɗo Facebook e Whatsapp. Ɓe ƴamii yoɓeede ceede Dolar Milliyooji teemeɗɗe ɗiɗi e noogay. Laamu ngun no tuumi "Meta" huutoraade keɓe 
Najeriya taw o ƴaɓɓitaaki laawol sariya. Koɗo men hannde woni Doktor Kabiiru Ɗanladi Lawanti Jannginoowo haa yeɓre/duɗal anndal jaayndiyankaagal Ahmadu Bello to Zaariya nden boo annduɗo ko raarani anndal "Social media".
Nultinndiraaɗo amin Yaa'u Ciwto Gemmbu yewtidi e maako dow toɓɓere ndee

Fotde yimɓe 250 000 maayii e aksidanji laabi e nder Afrik e hitaande 2021. Ndee, ko limooje Dental Adunaaru toppitiinde Cellal (OMS) jeertinnde ɓeydagol musibbaaji jowitiiɗi e laawi e nder Afrik. Ko saabii ɗee maayɗeele no heewi? Gila dogudu ɓurtundu (uuyeendi ɓurtundi) haa waasde ɓoornaade kaaskje moto e duhol kisal  e nder oto. Yeru, maayɓe e nder kasaraaji moto, ɓeydiima fotde laabi ɗiɗi e nder duuɓi sappo njawtuɗi ɗii, ko ɗum OMS wi'i. E bi’ol Mammadu Seydu KAMARA jeyaaɗo e Njuɓɓudi mooftundi jooma waɗɗeteeɗi GINE, ndee limoore OMS wonaa ko hawnii. Wonannde mo, golle mawɗe no haanaa waɗeede ngam ustude maayeele immorɗe e aksidanji laawi. Ko kanko woni koɗo men hannde. Himo jaabo naamne
Ibraahiima Timbi Bah.

Gine: caggal nde hooreeɓe FNDC nannga naadaa sokaa e nokku mo anndaaka, caggal nde seppooji toŋaa e hoore laawi, yoga e mejaaje uddaa. Alhaali hakkeeji neɗɗo fuɗɗii maapinde njuɓɓudiiji  daraniiɗi hakkeeji neɗɗanke. Ɓe hollii mette maɓɓe e alhaali mo ɓe sifori "anngal teddingol hakkeeji neɗɗo e noone hulɓiniiɗo. Njuɓɓudi awokaaɓe Gine noddii e dartingol fitinaaji liddu hakkeeji neɗɗanke.  Koɗo men hannde ko Meeter Maamuudu Saane jeyaaɗo e njuɓɓudi awokaaɓe Gine. Himo e faandu haala Mammadu Aadama JALLO.

To Leyɗeele Ndennduɗe Amrik, noddugol ngam yo deeƴere tabitu no jokkaa. Ɗum, ko caggal nde suka mo duuɓii 20 etii wargol Donald Trump e asewe ɓennunde ndee. Hari oo hooreejo leydi kiɗɗo, laatiiɗo kanndidaajo fedde repibliknaaɓe e suɓngooji arooji ɗoo no e orngal nde kural woopi mo. O barmi e nowru. Kono gila ndee  eɓɓaande warngo, haalullaaji hewɗi no njiilo e meejaaje renndo. ko honɗum wonata batte ɗum e ngal orngal suɓngo hooreyaaku? Mbele Donald Trump ina waawi naftoraade ɗum e baŋŋe dawro? Eɗen etoo jaabaade ɗee laamnde enen e Abdullaay Yaya BA, jannginoowo Amerik. Ibraahiima Timmbi Bah.

Mali, dawroyankooɓe e yimɓe jeyaaɓe e pelle  sosiyete siwil ina mbaawi jokkude golle maɓɓe. Ko hooreeɓe leydi ndii dartini pellital haɗunoongal golle maɓɓe. Ngal kuulal ƴettaangal gila e lewru 4ɓuru ɓennundu nduu, adduno ñiŋooje keewɗe e nder leydi ndii haa e caggal mayri. Wurin, ngal pellital wonii sabu caɗeele buy wonande ardiiɓe politik, sappo e gooto e maɓɓe, ina sokaa gila 20 lewru faltiindu. Mbele ɓee konunkooɓe ardiiɓe Mali artii caggal walla ko feere politik saabii ɓe ɓami ngal pellital ? Eɗen njeewtida hannde e Alhuseyni BAH subaka hertorɗo dawro. Ko kanko woni koɗo men hannde. Omo jaaboo naamne
Ibraahiima Timmbi Bah.

To Iran, Hooreejo leydi keso oo jooɗoto e laamu ñannde 30 nduu lewru 7ɓuru. Massoud Pezeshkian, laatike hooreejo leydi Iran gadano, jogiiɗo "programme"/ njuɓɓudi dawro mbaylirɗo jaɓɓal laamu, ɗun no wi’e "reformateur" e faransiire. Ittugol kuule fawaaɗe e dow "enternet" e salaade torraaji ɗi polisiiɓe waɗata e dow sukaaɓe rewɓe... ɗee ko fodooje Massoud Pezeshkian e nder orngal woote makko. .

O holluno kadi wonnde ko maa o ɓeydu darnde rewɓe kañun e diineeji e leƴƴi tokoosi e nder laamu makko. Mbele omo waawi laatinnde ɗeen oɓɓooje, e yeeso mawɓejogiiɓe doole keewɗe e nder leydi ndii, hono ayatollah Ali Khamenei ? Hol ko gargol Massoud Pezeshkian e laamu waawi waylude e nder "Moyen Orient", diiwaan mo luural keewngal jaalii ?Koɗo men hannde ko Dr Abdu Ba, jogiiɗo anndal e alhaali dawro leyɗe Arab. O jaabotoo ko e naamne Ibraahiima Timmbi Bah

Senegaal, hannde waɗii balɗe 100 gila Basiiru Jomay Faay laatii hooreejo leydi ndii. Oo lunndiiɗo suɓaama e dow programm faandiiɗo waylude laamu Makki Sal. E nder balɗe 100 ɗee, Basiiru Jomaay Fay hollitii peeje keewɗe ngam etaade huɓnude
ɗaminaare senegaalnaaɓe suɓiiɓe mo. Hol ko woni ƴeewndo ɗii lebbi tati makko arani e hoore leydi Senegaal ? Mbele golle baɗaaɗe ɗee ina kollita mbayliingu, ngu o fodunoo nguu no e laawol laatagol ? Hol no ballondiral hooreejo leydi Basiiru Jomaay Fay e gardiiɗo jaagorɓe Usmaan Sonko sifori ? Mammadu Albeer SI senegaalnaajo hertorɗo dawro woni koɗo men hannde. Omo jaabotoo ko e naamne Ibraahiima Timmbi Bah.

Faransi ko Nouveau "Front Populaire",  kawtital renndingal lanndaaji ooñorɗi nano, ɓuri dañude
depiteeɓe e daawal ɗiɗaɓal wooteeji sarɗiyankooɓe ɗii. Ngal heɓii ko ɓuri sarɗiyankooɓe180.
Ngal poolgal ko hawniingal sabu ko kawtital seɓɓitoriingal ñaamo RN tijjanoo foolugol ɗii
woteeji. Kono RN laatike tataɓo e dow depiteeɓe143. Dendaangal pelle politik wonnduɗe e
laamu heɓii kañun depiteeɓe 163. Hol ko saabii ko kawtital seɓɓitoriingal ñaamo RN heɓaali
poolgu e ɗii suɓngooji hayso tawii ko kañum woni lannda ardiiɗo leydi ndii e ƴeewde njeñtudi
ndii ? Mbele fedde nano ndee, ina waawi jaɓde toɗɗaade gardiiɗo jaagorɗe leydi ndii e
nanondiral ? Hol batte ndii njeñtudi accata e fedde politik laamuyankoore ? Mamadou Deme,
hertorɗo renndo e ɓamtaare jooɗiiɗo Faransi woni koɗo men hannde. Himo jaaboo lamnde
Ibrahiima Timmbi Bah