Koɗo men hannde

Ko holno Afrik waawirta moƴƴinnde marke ngam hiwgol e reenugol ɓiɓɓe duunde ndee ? Jonnde mawnde waɗii hanki Paris laamorgo Faransi e hoore ndee toɓɓere. Leyɗe tawaaaɗe e nguu mbatu foodii leyɗe Afrik ko ɓuri miliyaar gooto dolaar. Kaalisiiji wallirɗi Afrik waawugol moƴƴinde ko yaata 60 e nder teemerewel kala ko faatii e marke gollirteeɗe Afrik ɗoo e hitaande 2050.Ko Faransi wonndude e Dental leyɗe Afrik UA e GAVI, ngoomu adunayankowu daraniingu marke noddi e nguu mbatu. Hooreeɓe Afrik hono, Basiiru Jomaay Faay mo Senegaal, Pool Kagame mo Ruwanda tawano e maggu. Mbele ɗii kaalisiiji fodaaɗi wallan Afrik waawude moƴƴingol marke ? Koɗo men hannde ko Dr Abdullaay Jallo, safroowo jannginoowo iniwersite. Himo jaaboo lamnde Ibrahiima Timmbi Bah.

Hooreejo Senegaal no e njillu Faransi. Basiiru Jomaay Faay yottike Paris ngam tawtoregol e mbatu faatiingu e newinngol moƴƴingol marke (pesorɗe). Kono e nder nguu njillu hooreejo Senegaal waɗidan e hooreejo Faransi jonnde. Ko ngol ɗoo woni laawol aranol ɓee hooreeɓe leydi ɗiɗo hino yiidaa. Ado, o heɓude laamu, Basiiru Jomaay Faay e fedde makko politik hari hino ŋiñi sanne jokkondiral hakkunde Faransi e Senegaal. Ko toɓɓe honɗe ɓee yewtata e ndee jonnde maɓɓe? Ebi’ol Mammadu Albert SIH hertorɗo dawro, janngo daaka konu Faransi wonuka Senegaal wonndude e kaalisi CFA taweete e ɗee toɓɓe yewteteeɗe .
Himo jaaboo lamnde Ibrahiima Timmbi Bah.

Burkina Faso, ko timmi konunkooɓe 100 waraama e ndee yontere faltiinde e nder leygal Mansila, nokkuure nde woɗɗaa keereol Niijeer. Siwilɓe kadi waraama e nder ndee hawande nde fedde kuliyankooɓe JNIM holli wonnde ko kamɓe saabii. Yontere caggal oo fitina, alaa ko hooreeɓe Burkina Faso haali. Alhaali leydi ndii no jiiɓii gila alarba faltiinde ɗum ko caggal nde pellanɗe nanaa sera galle Ibrahiima Tarawore Hooreejo leydi ndii. Holko ko saabii ndee deƴƴere ardiiɓe Burkina Faso? Mbele eɓɓoore maɓɓe haɓirnde kuliyankooɓe woodii ko battini ? Koɗo men hannde ko Mammadu Omaar Lih, hertorɗo Sahel. E faandu haala Ibrahiima Timmbi Bah, o hollii kadi taskaare makko ko faati e no kuliyankooɓe woni e heɓirde kaɓirɗe.

Moritaninaaɓe suɓoto hooreejo leydi maɓɓe ñannde 29 nduu lewru 6ɓuru. Ɓee wootooɓe ɓadiiɓe miliyonji ɗiɗi suɓoto hakkunde kandidaaɓe 7. E ɓen no tawaa Mohammed Wuld El Ghazwaani hooreejo leydi ndin. Ko ɓeydii ɗon ko Mammadu Bokaar Bah mo fedde dawro AJD/MR e Biram Dah Abeyd daraniiɗo hakkeeji ɓaleeɓe Moritani e Hammadi Wuuld Sid’ El Moktaar, mo fedde politik diineyankooɓe "Tawassoul". Kono hino woodi waasɓe taweede e ɗii suɓngooji, ɓen ko hono Mohammed Wuuld Abdel Aziz hooreejo kiɗɗo leydi ndii fawaaɗo kaso . E subaka hannde oo, en taskoto no ɗii suɓngooji saatii laataade. Koɗo men oo ko Mammadu Kaalidu Ba, winndiyankeejo jannginoowo iniwersite. Himo jaaboo lamnde Ibrahiima Timmbi Bah.

Hannde koɗo men ko gooto e tawaaɓe e njanngu waɗngu to Mansila, funnaange naayaade rewo Burkina Faso.  Hayso tawi laamu ɓanginaani limoore maayɓe e barmuuɓe kono no sikka konunkooɓe e siwilɓe heewɓe mbaraama e nguu njanngu waɗngu e nder ngoo wuuro ñannde talata 11 lewru 6ɓuru. Keɗoɗen ɗoo gooto e daɗɗo e nguu njanngu e nder wuuro Mansila. O yewtidii e Muusa Umaar Bari

Siftinnde: Ngam ndenka makko, ko een wayluɓe daande nden

Gila e ndee talaataare 11 lewru 6ɓuru 2024 Senegaal tawaama e leyɗe yaltinooje Petrol. Ñallal kala, ko barilji petrol 100 000 woni ko oo sosiyete "Sangomar" yaltintaa Rifisk, nokkuure woɗɗornde Dakar km 90. Mbaa gesa petrol jogiimba baril miliyaarji 630 , addanan Senegaal kaalisi miliyaarji cappanɗe e nder ɗii duuɓi cappantati ngaarooji. Kaalisiiji ɗi hooreeɓe leydi ndii hoolori ngam ɓamtugol Senegaal. Koɗo men hannde ko Demmba Seydi ardiiɗo fedde sosiyete siwil haɓoore ngeenaari bonndi, no wi’ee, "Publiez ce que vous payez" Hollee ko yoɓoton kon. Himo jaaboo lamnde Ibrahiima Timmbi Bah.

Gine gila 1 lewru jeegaɓuru hooreeɓe leydi ndii ƴettuno pellital toɲugol jasirgol kaŋɲe e jaaman e nder leydi fow. Ngal pellital ko ñannde 26 lewru jowaɓuru ngal ɓannginaa. Kono ko pellital sattungall ɗoftaade. Mammadou Lamaraana Jallo tawaaɗo e hooreeɓe ndee mojobere hertornde oogirde e nder Gine woni koɗo men hannde. Himo jaaboo laamnde nultindiraaɗo men Mammadu Jongaasi BAH.

Erop, e ɗii suɓngooji sarɗiyankooɓe laatiiɗi e ndee lannoode yontere ko pelle politique naayorɗe ñaamu ɓuri heɓude polgu. Ɗee pelle politik ko holluɗe kanje hiɗe daranii hakkeeji leyɗe majje. Ɓee dipiteeɓe suɓaaɓe e ɗee woote, ko kanɓe laatotoo sarɗiyankooɓe dental leyɗe Erop, UE. Golle maɓɓe ko fewnugol kala eɓɓoore laatotoonde e nder wertaango UE. Holko saabii yo Eropnaaɓe wotan ɗee pelle politik? Holko garal maɓɓe battinta e yimɓe ɗanniiɓe?

Mbele woodan ko waylii e nder jokkondiral hakkunde Afrik e Erop, so ɗe pelle politik naayorɗe ñaamu laatiike hooreeɓe fedde UE? Ko Mamadou Deme, hertorɗo

renndo e ɓamtaare e nder leydi Faransi woni koɗo men hannde. Hino e faandu haala Ibrahiima Timmbi Bah

Koɗo men hannde woni Dokteer Hadiza Dawuda Janginoowo e Janngirde mawnde nde anndal kimiyaaku e karalaagal ha Ƴola Adamawa anndiraande Adamawa state Polytechnic Ƴola . O haalidi e Yaa'u Ciwto Gemmbu dow ko raarani haala hewtude Ardiiɗo Najeriya Bola Ahmed Tinubu hitaande wootere gila ko o jaɓi laamu lesdi ndin . Doktoor Hadiza wolwi dow golle
goɗɗe gaɗaaɗe e caɗeele giideteeɗe e ma ko haani waee ngam hoyeende heɓe e ko nanndi muuɗum

Faransi, hannde heɓii duuɓi 80 gila  leyɗe noddirteeɗe  hawtuɗe  waɗi "débarquement de Normandie". Ko ɗum woni jippagol konunkooɓe leyɗe 15 arunooɓe wallitagol Faransi saaha mo Almaañ yanunoo e leydi maɓɓe e nder hare adunayankoore ɗiɗaɓere. E ɓen konunkooɓe jippiiɓe e saare Normandi, e nder jemma 6 lewru 6ɓuru hitaande 1944, no tawanoo Ameriknaaɓe e Beretaninaaɓe. E ɓen kadi, no tawanoo Afriknaaɓe noddiraaɓe « Tirailleurs sénégalais ». Ko ballal maɓɓe walli Faransi e wonndiiɓe mum foolugol e ndee hare adunayankoore ɗiɗaɓere dartinaande e hitaande 1945.
Hannde en yewtan fii ndee ñalaande taariikayankoore. Koɗo men ko Profeseer Mammadu Dinnde Jallo, taariikayankoojo, cukko hooreejo  Iniwersite Kankan, e nder Gine. Himo jaaboo lamnde Ibrahiima Timmbi Bah.