Koɗo men hannde

Koore di Siid e duunde Afrik no e jonnde gila hanki to Sewul. Ko ndee laatii jonnde aranere hakkunde ndii leydi e duunde Afrik. Hooreejo Koore di Siid oo waɗii fodooje mawɗe faade e Afrik. Yoon Suk Yeol hollii wonnde o walliran leyɗe afriknaaje miliyaarji 10 dolar e nder duuɓi 6 arooji ɗii sabu tabintingol ɓamtaare majje. O ñawlan sosiyeteeji Koore di Siid wonuɗi Afrik  miliyaarji 14 dolar. Ɗii kaalisiiji nafan Afrik e fannuuji hewɗi wano baŋŋe teknoloji e mbaylaaje. Banŋe ɗe Afrik hatonngini mbawka Koore di Siid. Ko ɗum holli Mohammed Wuuld El-Ghazuani, hooreejo Moritani, ardiiɗo Dental Afrik. E bi’ol Mammadu Faalilu Jallo fagguyankeejo, leyɗe Afrik no waawi rewde e mbawka Koore di Siid ngam waylugol oogirɗe majje. Ko kanko woni koɗo men hannde. Himo jaaboo lamnde Ibrahiima Timmbi Bah.

E suɓngooji sarɗiyankooɓe naatuɗi e taariika Afrik di Siid, fedde dawro ANC ndee wasii ɓural maɓɓe ka parleman, e tee ɗum ko go'o gila duuɓi 30. E nder sarɗinkooɓe 400 wootanaaɓe, fedde ndee ko 159 pet. Holko woni sabu yo fedde dawro ANC ndee foole? Holko addani yo fedde Zakob Zuma, hooreejo kiɗɗo Afrik di Siid, wonu 3ɓere e ɗii suɓngooji? Holko foti wonde darnde ANC ngam hedaade e laamu? Ko ɗee naamne e namne goɗe koɗo men hannde, Dr Faabilu  jaabotoo.

Ko holno leyɗe Mali, Burkina Faso e Niijer artirta e nder CEDEAO? Ndee, ko annde BasiiruJomaay Faay hooreejo Senegal, wonunooɗo e njillu e nder Bamako e Wagadugu e lannoode ndee yontere saaliinde. Faandaare makko, ko yo konunkooɓe ardiiɓe ɗee leyɗe jaɓu artude e nder CEDEAO. Caggal yiidigal makko e Kolonel Asimi Goyta mo Mali, o hollii golle ɗee sattan kono hiɗe waawa laataade. Ko Holno Mali, Burkina Faso e Niijer, cincuɗe fedde hayre noddiraande.

Fedde Leyɗe Sahel AES artirta CEDEAO? Koɗo men hannde ko Bangali Jallo, hertorɗo dawro. Himo jaaboo lamnde Ibrahiima Timmbi Bah

Gine, hooreeɓe leydi ndii uddii mejaaje ɗuuɗuɗe. Ɗin ko FIM FM, Espace TV e Djoma TV. Ɗee mejaaje fow ko heeriiɗe (ɗe wonaa-luaamuyankooje). Guwerneman Gine no tuumi ɗe wasde teddinnde sariyaaji jaayndeyankaagal wonndude e yaɓɓitugol golle laamu e nder leydi ndii.
Kono senndika jaayndeyankooɓe no yeddi ɗee tuume. Ngal pellital ɓamaama caggal lebbi ɗi laamu Gine toŋi ndimaagu konngol e nder leydi ndin. Koɗo men hannde ko Jaaray Jallo, ardiiɗo fedde daraniinde hakkeeji mejaaje no wi'ee APAC. Himo jaaboo lamnde Ibrahiima Timmbi Bah

Koddiwaar, mbele Alasaan Watara laatoto kanndidaajo e suɓngooji saatiiɗi e ndee hitaande 2025 ? Ngal ko lamndal. Kono ko ɗum woni faale fedde dawro makko. E nder mbatu waɗungu e fuɗɗoode ndee yontere, ardiiɓe RHDP ƴamii Alasaan Watara yo jaɓu wonude kanndidaajo maɓɓe e ɗii suɓngooji saatiiɗi. Kono haa hannde alaa ko oo hooreejo Koddiwaar haali e ndee toɓɓere. Mbele o jaɓan ngal ƴamal ? Koɗo men hannde ko Abdurahmaan BARI hertorɗo dawro Himo jaaboo lamnde Ibrahiima Timmbi Bah.

Burkina Faso kapitenn Ibrahiim Tarawoore heddoto e laamu duuɓi 5 e kadi o nattii wonnde hooreejo laamu ƴanngal, o wontii hooreejo Faso. O newnanaama wonugol kanndidaajo e suɓngooji saatiiɗi. Ko e jonnde genndiire renndinnde pelle dawro e diinayankooɓe e hooreeɓe laamuuji finaa-tawaa, laatiinde e ndee aseweere saaliinde fiɓi ɗee pellite. Kono pelle politik e
sosiyete siwil buy tawanooko e ndee jonnde. Koɗo men hannde ko Karim Jallo taskotooɗo kabaruuji hertorɗo sariya. E faandu haala Ibrahiima Timmbi Bah, himo taskoo ko fiɓaa e ndee jonnde ngenndiire Burkina Faso

Jeegon nduu lewru ɓiɓɓe Caad suɓiike hooreejo mum. E yontere ƴaɓɓiinde ndee hooreejo keso Mahammat Idriis Debi Itno keɓuɗo poolgu e ɗee woote fuɗɗii laamu mun. Faade nden e orngal woote, Alhaji Usmaanu Aamadu Bakari hooreejo Tabital Pulaaku Caad, tawano e diiwe kewɗe leydi ndii ngam waɗude suɓɓo e ɗi woteeji.

Holko saabi waɗude makko golleeji politik ? hono nguurndam fulɓe Caad worrii ? Alhaji Usmaan Aamadu Bakari woni koɗo men hannde, omo jaabo lamnde ɗen e faandu haala Minaati JALLO, iminaaɗo RFI fulfulde to Caad e saha woteeji hooreyaaku ɗin

Doggol leyɗe jaɓuɗe yo Palestin laato leydi rimɗundi ɓeydike. Ɗe timmii jooni 146 e nder nduu adunaaru. Ko Norvege, Espaañ e Irlanda sakkitii ƴettude ngal pellital. Faale ɗee leyɗe ko yo Israayel e Palestin laato leyɗe ɗiɗi sertuɗe hara ndi kala hino jogii ndimaagu mun. Mbele ngal pellital ɗee leyɗe tati wallay tabintingol oo annuyee? Koɗo men on ko Ceerno
Seydu Nuuru Njacc. Himo jaaboo lamnde Ibrahiima Timmbi Bah.

Porokirerjo CPI on, ƴamii yo mannda fawo-junngo fampe liddu woɓɓe e ardiiɓe Israayel wonndude e hooreeɓe Hamas. Ɓen ko Benjamiin Netanyahu, hooreejo jaagorɓe Israyel e Yoav Gallan, jaagorɗo makko halfinaaɗo deenaagu. E banŋe Hamas ko Yehiya Sinwar, e Ismayel Haniyeh. Ɓee fow no tuuma waɗugol fitinaaji hare mawɗi wonndude e war-neɗɗanke e nder Gaza e Israyel. Ngal pellital Karim Khaan oo porokirerjo no addani pelle daraniiɗe CPI e nder Afrik weltaare. Koɗo men hannde ko Busuriyu Jallo, tawaaɗo e ɗee pelle. Himo jaaboo lamnde Ibrahiima Timmbi Bah.

Iran, Ibrahiim Raysi hooreejo leydi faatiiɗo fuɗɗaama du’aneede hannde, e nder Taheran. Ko e nder asidan elikopteer makko, o lutti kanko e gollidiiɓe makko ɗuuɗuɓe no jeyaa e ɓen Hossen Amir Abdollahiyan, jaagorɗo halfinaaɗo gollidal hakkunde Iran e leyɗe Janane. Ndee maayde ɓee waɗii saaha mo tawata, ngal diiwal "Moyen-Orient"  hino e alhaali sattuɗo sabu kareeli wonuɗi e
waɗude wano Yamen, Suuriya e Palestin. Ko holɗun ndee maayde Ebrahiim Raysi battinta e ngal diiwal ngal Iran jogitii darnde mawnde ? Mbele woodan ko waylii ? Ko neɗɗo hommbo waawata lomtaade mo ? Koɗo men hannde ko Dr Abdu Bah, wiɗtotooɗo. Hinomo e faandu haala Ibrahiima Timbi BAH.