Koɗo men hannde

Kawtital Leyɗe Sahel artataa abada e nder fedde CEDEAO. Ko ɗuum Hooreeɓe leyɗe Mali, Burkina e Niijeer kolliti e ndee ɗoo yontere, nde ɓe nantini sosde fedde Dowlaaji Sahel, Confédération des Etats du Sahel. Newinngol yaha-ara yimɓe e jawle maɓɓe, mballondiral nder haɓugol ŋakkeere kisal e sosde banki njulaagu, ko ɗeen ngoni eɓɓooje ɓurɗe teeŋtude Konfederasiyon keso oo. Ñalunde caggal nguu mbatu, ardiiɓe leyɗe CEDEAO kawri to Abuja. Ɓe pellitii neldude gardiiɗo leydi Senegaal hono Basiru Jomaay Faay ngam etaade kadi laawol gootol artirde dawlaaji tati ɗii e nder fedde ndee. Mbele omo waawi artirde konunkooɓe ardiiɓe ɗee leyɗe caggal ? Ngam jaabaade ngal namdal e naamne goɗɗe koɗo men hannde subaka, ko Doktoor Mammadu Sow, jannginoowo-wiɗtiyanke to duɗal jaaɓi haaɗtirde Nouakchott to leydi Moritani. O jaaboto ko e naamne Ibrahiima Timmbi Bah

Meɗen ñoggana on ɗoo jeewte e miijooji neldaaɗi ka taskaram mon On Tottaama Konngol. Keɗoɗen ɗoo ñoggannde jeewte waɗaaɗe ka taskaram On Tottaama Konngol e nder nde yontere. Ko Muusa Umaar BARI waɗani en. Heɗiaynkooɓe ɓen  neldii ji'anɗe maɓɓe e toɓɓe ɗe ɓe yiɗi artude e mum

Dewgal sukaaɓe rewɓe, ɓe heɓaani duuɓi 18 haɗaama to leydi Sarlon. Julius Maada Bio Hooreejo leydi ndii lawɗinii oo sariya e talaata ɓennuɗo o. Ooɗoo sariya ina yiɗi reenude sukaaɓe rewɓe e batte bonɗe immorɗe e dewle sukaaɓe ɓe hellifaaka. Gila hanki e talaata kala neɗɗo saabiiɗo dewgal cukalel deyel o fawete duuɓi 15 kaso. E hitaande 2017, ciimtol UNICEF hollitii wonnde sukaaɓe rewɓe ɓe hellifaaka timmuɓe 800 000 dewlaama. E ɓen 400000 tawi heɓaali duuɓi 15. Sifa ɗee dewle ina taƴa jaŋnde maɓɓe, ina addana ɓe jibinnde ko yaawi... Ummu Hawa JALLO, jeyaaɗo e fedde daraniinde sukaaɓe rewɓe to leydi Gine, no weltorii oo sariya. Ko kanko woni koɗo men hannde. Omo jaaboo naamne Ibrahiima Timmbi Bah.

Moritani, ko gardiiɗo leydi oo dañi poolgu e ɗii suɓngooji ɓennuɗi e aset faltiiɗo oo. Mohammed Uld Ghazouani heɓii daaɗe 56% e ɗee woote. O hikkii e makko ko lunndiiɗo mo mawɗo biyeteeɗo Biram Dah Abeïd, dañɗo ko ɓuri daaɗe 22%. Ooɗo daraniiɗo jojjanɗe aadee, gonɗo e haɓaade maccungaaku, ina lunndii  njeñtudi ɗi CENI yaltini ɗii.

O noddii daraniiɓe makko yo njaltu e laabi ngam haɓaade ndii njeñtudi e nder jam. Jooni noon, yimɓe tato mbaraama e ɗeen dille to Kaédi, to bannge worgo leydi Moritani, e wiyde jaagorgal nder leydi, walla jaagorgal kalfinaangal fiyaakuuji leydi. Mbele nguu poolgu hooreejo leydi e daawal gadanal ko huunde haawniinde ? Hol no o jogori haɓaade ɗee caɗeele ummoriiɗe e ɗii seppooji lunndiiɓe laamu ? Hol golle o haani waɗde e nder duuɓi joy garooji ɗii ? Eɗen njeewta heen hannde subaka e enen Bakari Gueye jaayndiyanke moritaninaajo, hertorɗo dawro. Omo jaaboo naamne Ibraahiima Timmbi Bah

Faransi ko kawtital pelle fantiyankooje ñaamo no wi’ee "Rassemblement national RN",woni ko fooli daawal gadanal suɓngooji sarɗiyankooɓe ɗii. Ndee fedde añunde hoɓɓe heɓii daaɗe 34,2 %. Ko hikkii e mayre ko pelle ooñorɗe nano, ɗun ko "Nouveau Front populaire", heɓuɗe daaɗe 29,1 %. Fedde politik hooreejo leydi ndii laatii tataɓere. Nde heɓii daaɗe 21,5 %. Ko yimɓe honɓe ɓuri wotannde ndee fedde fantiyankoore RN ? Mbele hinde waawi heɓude ɓural e daawal ɗiɗaɓal ɗii suɓngooji e ndee alatiire ? Mamadou Deme, hertorɗo renndo e ɓamtaare jooɗiiɗo Faransi woni kɗo men hannde. Himo jaaboo lamnde Ibrahiima Timmbi Bah.

Ñaawoore warngooji 28_settambur, joofan ko ɓooya. Yimɓe tawaaɓe e nder mayre gayni yewtereeji maɓɓe ɗin e yontere faltiinde ndee. Prokireerɓe ɓen ƴamii yo Muusa Dadis Kamara, konunkoojo ardinooɗo Gine saaha nde ngoo warngo waɗi, kanko e tuumidaaɓe makko 6 yo ɓe soke kattudi ngurndam maɓɓe. Ɓee, ko tuumira ko saabagol mayde ko ɓuri yimɓe 157, mutina woɓɓe, doola rewɓe cappanɗe e hitaande 2009.

Warngooji hewɗi waɗaama e nder Gine, kono hay wooto ñaawaaka. Mbele, ndee ñaawoore warngo 28 septembre udditan laawol no fitinaaji heddiiɗi ñaawiree? Koɗo men hannde ko Profeseer Alfa Aamadu Bano Bari renndoyankeejo, jaagorɗo Gine kiɗɗo. Himo jaaboo lamnde Ibrahiima Timmbi Bah.

Moritani, orngal wote ɗee joofan hannde jemma. Ngal orngal waɗii e nder deeƴere e nder ɗee jonte ɗiɗi faltiiɗe hay so tawii lurral taskaama e nder saare Nowaajibu, baŋŋe rewo leydi ndii. Ɓee kanndidaaɓe 7 yiilike e nder leydi ndii fof ngam hollugol eɓɓooje walla porogramji maɓɓe faatiiɗi e ɗalle, faggudu, jannde wonnude e haɓugol maccangaaku. E baŋŋe fewnugol ɗii suɓngooji, ardiiɓe CENI suudu toppitiindu woote holli wonnde pehe fof renndinaama ngam laɓɓingol ɗee woote. Ɗum non, ko caggal linndiiɓe laamu ɓee nantini kulol maɓɓe ko faati e laaɓal ɗii sungooji. Ngam taskgol no ngal orngal yaari? Koɗo men hannde ko Demmba Ndongo hetrorɗo dawro. Himo jaaboo lamnde Ibrahiima Timmbi Bah.

Mali, dawroyankooɓe 10 hino sokaa e kaso gila e alkamisa faltiinde. Ɓee, hino tuumaa waɗugol mbatu haɗaangu ngam bonnugol laamu leydi ndii. Ko e nder galle neɗɗo maɓɓe gooto ɓe nanngaa e nder Bamako, laamrogo leydi ndii. Banndiraaɓe maɓɓe lunndiiɓe laamu hino yeddi tuume fawaaɗe e maɓɓe ɗee. Ko Seeku Ñaamey Baccili, ƴettoowo konngol e innde fedde politik RPM woni koɗo men hannde. Himo jaaboo lamnde Ibrahiima Timmbi Bah.   

Niijeer, perefeejo Bilma e komandanjo sandarmeri e gollidiiɓe mun siwlaama e aljuma faltiiɗo o nder Dirku, wuro wontirngo rewo naayaade fuɗnaange leydi ndii. Ado oo bone, ko pipeline, naɓirɗo karbiran Niijeer yaade Benin woni ko bonnaa. Ko pelle ɗiɗi murtuɓe noddirteeɗe FPJ e FPL woni ko saabii ɗee piyanɗe. Ardiiɓe ɗee pelle hino lanndii yo Mohamed Bazoum hooreejo leydi kiɗɗo oo, accite. Hannde namɗe hewɗe hino woodi e dow ɗee pelle. Ko homɓe woni caggal majje ? Holko saabii ko fewndo ɗoo ɗe fuɗɗii ɗee piyanɗe ? Ko holɗun ɗee piyanɗe battinta e alhaali deenaagu Niijeer ? Ko Dr Mamadou Sow, jannginoowo to iniwersite Nuwakshot woni koɗo men hannde. Himo jaaboo lamnde Ibrahiima Timmbi Bah.

Lurral no teskaa hakkunde mejaaji ɗii e laamu leydi ndii. Ko saabii ɗun ko ñamaande ɗi joganii laamu nguu. E bi’ol Usmaan Sonko hooreejo jaagorɓe Senegaal, meejaaji ɗii no jawlii sagalle walla limpoo fawɗo miliyarji 40, CFA, fii kala Makki Saal, hooreejo kiɗɗo leydi ndii holluno ɗi yaafanaama ndee ñamaande. Usmaan Sonko yamirii yo kaalisiiji majji wonuɗi ka bankiiji yo joge. Holko saabii mejaaji Senegaal alaa e waawude yoɓude sagalle ? Ko salaare walla ko ŋakkere kaalisi ? koɗo men hannde ko Mammadu Njaay, jaayndeyankeejo mawɗo hertorɗo faggudu. Himo jaaboo lamnde Ibrahiima Timmbi Bah.