Koɗo men hannde

Lurral mawngal no taskaa hakkunde Iran e Israyel gila e lannoode ndee yontere faltiinde. Ndee ko fuɗɗi, ko nde Israyel wari diplomatɓe Iran joɗiiɓe Damas e nder Siri. Caggal ɗun, Teheran faɗɗike misilji wonndude e dronaaji 300 e nder leydi Israyel. Ardiiɓe Israyel nantini wonndema ɓe yottoto. Kono leyɗe gollidiiɗe maɓɓe wano Dawlaaji Leyɗe Ndentuɗe Amerik hino ñippude  ngal lurral. Koɗo men hannde ko Dr Fabilu, jannginoowo Iniwersite Ngawunndere. Himo jaaboo lamnde Ibrahiima Timmbi Bah.

Mali, gila ñannde 10, 4ɓuru, golle pelle politik e pelle sosiyete siwil yowitiiɗe e dawro darnaama e nder ndii leydi. E bi’ol konunkooɓe ardiiɓe leydi ndii, ko saabii ngal pellital ko ngam tabintingol jam e deeƴere e nder Mali. Kono, hooreeɓe pelle politik e Sosiyete siwil jaɓaali ngal pellital, sabu hiɓe tuumi konunkooɓe ardiiɓe Mali faaleede heddaade e laamu, caggal nde happu laamu faddewu nguu joofi. Ngam taskagol oo alhaali Ibrahiima Timmbi Bah no jaɓɓii Dr Abdu BA, hertorɗo dawro. Heɗoɗen.

Sappo e joyi lewru nayaɓuru hitaande 2023 sappo e joyi lewru nayaɓuru hitaande 2024,waɗii hannde hitaande gila ɗee hawre fuɗɗii hakkunde Jeneral Abdel Fattah Al Bourhane e Jeneral Mohamed Hamdan Dogolo lollirɗo "Hemetti" Ko ɓuri ujune sappo e tati yimɓe maayii e nder hare ɗee e ley hitaande, e maɓɓe rewɓe kañun e sukaaɓe. Ko ɓuri miliyon jeetati sudanaaɓe eggii e nokkuuje mun. Miliyon gooto yimɓe piccal jeɗɗi mooloyike leyɗe kerodirɗe e leydi ndii. Hjenerooɓe ɓen ɗiɗoono alhaali balle hine e yurmeede worri e leydi ndii?  E wi’i Mammadu Jan BALDE hooreejo salndu ONU daraniindu moloyiiɓe e leyɗe Afrik fuɗnange "Corne Afrik" kañun e falnde "grands Lacs", alhaali oo ana tiiɗi sanne. Sabi ɓe lorriiɓe ana kasidini e nguure, cafaaje.... Ngam no ɓen baawiri heɓude nguureeji, HCR ana haaja e  ballal njawdi ko yaata e miliyaar gooto pcical ɗiɗi kaalisi dollars no yaawiri. Mammadu Jan BALDE ardiiɗo HCR e leyɗe fuɗnange Afrik woni daraniinɗo yuɓɓindirgol golleeji fedde ndee to Sudan, Ko kanko  woni koɗo men beete hannde. Himo jaaboo lamnde Minati JALLO.

Keɗoɗen jooni ñoggannde jewte waɗaaɗe ka taskaram On Tottaama Konngol e nder nde yontere.Ko Faatumata SI SAAWAANE waɗani en.

Gine, suɓngooji rawnorɗi (dartinanɗi) laamu faddewu waawataa laataade e ndee hitaande hikka ndee. Ko ɗum hooreejo jaagorɓe keso oo nantini. Gila Bah Wuuri yaltini oo kabaaru, lunndiiɓe laamu ɗuuɗuɓe hollii mette maɓɓe. Ɓe ƴamii hooreeɓe laamu faddewu Gine, teddingol sarti mo ɓe siifidi e CEDEAO. Sarti yamirɗo yo ɓee konunkooɓe immo e nguu laamu e ndeehitaande hikka. Ngal lurral hino maapini ndee fedde Sosiyete Siwil noddirteende DPEG, "Démocratie Paix Election et Développement Durable", nde Mammadu Sire Jum ardii. E bi’ol makko yewtere nde hooreejo jaagorɓe oo fuɗɗii ndee, hino waawa ñippude ngal lurral si hawri nde jibinii kaaldal e kawral ɓiɓɓe Gine. Ko kanko woni koɗo men hannde. Himo jaaboolamnde Ibrahiima Timmbi Bah.

Weñagol naange walla nanngal naange, ɗun woni "éclipse" e faransiire waɗii e fuɗɗoode ndee yontere e nder leyɗe ɗuuɗuɗe duunde Amerik. Ndee, ko huunde nde heewa waɗude. Ko ɗun si hinde laati kummpa miliyonaaji yimɓe e nder aduna nduu. Dawlaaji Leyɗe Ndentuɗe Amerik, e ndee teninre sukaaɓe hewɓe suɓino ƴeewugol ngoo weeño, hara ɓe yahaali ka duɗe. Ko holɗun woni weño naange ? Mbele ɗun no waɗa Afrik ? Koɗo men hannde ko Hammadi Jah, astronotjo, hertorɗo gannde koode oo fannu. Himo jaaboo lamnde Ibrahiima Timmbi Bah.

E nder falnde Sahel, ko nguleendi ndi hono mum meeɗaa waɗude, taskaa e fuɗɗoode nduu lewru 4ɓuru hikka. Ndiinguleendi ndii toowii haa e daraja 48,5° e nder saare Kaay, hirnaange Mali. Ndii ko nguleendi muusundi saabiindi caɗeele mawɗe. Woodi yimɓe nawnuɓe e nayeeɓe maayuɓe e sabu mayri. Holko saabii ndii nguleendi ? Ko pehe honɗe haana ɓameede ngam ustugol ndii nguleendi ? Ko Dr Mammadu Lamiin Bah hertorɗo metewo woni koɗo men hannde. Himo Jaaboo Ibrahiima Timmbi Bah.

Balɗe tati nde hooreejo keso leydi ndii fiila lefol laamu ngol, o anndinii guwerneman makko e jemma Aljumaa paltiiɗo oo. Ley ɓee jaagorɓe noogas e joyo, ko ɓuri ɗudde e maɓɓe yo hesɓe e ɗee golle. E bi’ol Elimaan Habi Kan, jeyaaɗo e sosiyete siwil kadi gardiiɗo yiilirde wi’eteende Legs Africa, nguu laamu hesuru ko laamu yaakaare. Kono saɗɗa on,  ko rewɓe ɓee ina poɗno ɓurde heewde e nguu laamu. Himo jaaboo laamnɗe Alhuseynu BAH. Keɗoɗen mo.

Caggal lewru gila Rigobert SONG, eltoowo diɗɗal fuku-koyngal Kamerun follaa, eltoowo keso toɗɗaama. Ko Marc Brys beljiknaajo lomtotoo SONG e hoore ngal diɗɗal. Ko jaagorgal toppitiingal ɗarte e coftal-ɓalli banngini ɗum hanki 2 lewru nayaɓuru 2024. Silmaaji seeɗa caggal nde oo kabaaru feeñi, federasiyon anndinii wonnde ɓe tawnaaka e ƴettugol ngal pellital suɓagol eltoowo keso. Ngal anngal nanondiral hakkiunde jaagorgal ngal e "Fecafoot" addii haallulaare mawnde. Noy battane ɗum fuku-koyngal Kamerun, noy dabare yaltugol e ɗee caɗeele?  Hayaatu KOYRANGA koronikeerjo coftal-ɓalli, jooma mejaare no jaaboo lamnde Rufaa'u Baaba Ashwariya.

Pelle politik e baale sosiyete siwil ɓurɗe 80 ƴamii yo laamu faddewu dartine. Ko e ndee alatiire faltiinde, ɗee pelle ñaagii hooreeɓe laamu faddewu ɓamugol dabareeji ko ɓuri e yaawude ngam artirgol laamu potal. Ngam laatingol ndee eɓɓoore maɓɓe, hiɓe ñaagii hooreeɓe ɓee, yo joƴƴin yewtere ngenndi hakkunde maɓɓe e ɓiɓɓe leydi ndii. Holko saabii yo ɗee pelle renndu fewndo ɗoo ? Mbele nduu noddaandu no waawa laataade ? Ko Sammba KORERA cukko hooreejo fedde politik ASMA-CFP woni koɗo men hannde. Himo jaaboo lamnde Ibrahiima Timmbi Bah.