Koɗo men hannde

Caad laamu faddewu gasan ko ɓooyaa. Ko ɗum holli suudu toppitiindu woote no wi’ee ANGE. Suɓngojji hooreyaaku ɗii waɗan ñannde 6 lewru 5ɓuru. Suɓgooji ɗi Mahmaat Idriis Debi Itno, lontiiɗo baaba mum gila hitaande 2021, tawtortee. Kono woodii dawroyankooɓe holluɓe wonnde oo happu hino hiɓɓe (faaɗi) walla fanɗi. Mbele ANGE waawan laatinnde ɗii suɓngooji no haaniri? Mbele ɗii suɓngooji wonaa haala tan, sabu lunndiyankooɓe mawɓe leydi ndii fof tawtii Mahmaat Idriis Debi Itno? Si oo laatike hooreejo leydi, mbele konunkooɓe ciwliiɓe laamu e nder leyɗe hirnaange Afrik ñemmbitaa mo? Ko Dr "Boutché Jean Pierre" toowa ganndaljo jannginoowo e duɗe mawɗe woni koɗo men hannde. Himo jaaboo lamnde Ibrahiima Timmbi Bah

Dental Erop UE e Moritani no saati siifugol kawral fawiingal e dartinngol ɗalle ɗe rewaani sariya. Faandaare ndee ko ustugol limoore ɗannotooɓe rewayɓe Moritani ngam yottagol Erop. Limoore ɓee hino ɓeydoo ñalaande kala. Gila ndee hitaande hikka fuɗɗi 80% laaɗe immoriiɗe Afrik naati Espaañ ko Moritani immii. Eɓɓoore ngal kawral ko artirgol Moritani kala ɗanotooɗo nanngaaɗo sera maaje ndii leydi. E nder  Dental Leyɗe walliray Nuwaakshoot miliyonji 522 ero. Kaalisiiji gollirteeɗi e fannu kisal e ɓamtaare. Kono yimɓe dawro e sosiyete siwil woɓɓe yaadaa e ndee eɓɓoore. E ɓen no tawaa Salimata Sii, jeyaaɗo e feddesosiyete siwil Moritani AMPEF. Himo jaaboo lamnde Ibrahima Timmbi Bah.

Gine, golle hino dartii e nder leydi ndii gila hanki e altine. Ko saabii ɗum ko yoppere golle nde pelle sinndikaaje 13 noddi e muuɗum. Ɓee sinndikaaɓe hino lanndii yo Seeku Jamal Pendesa gollidiiɗo maɓɓe, fawaaɗo lebbi 6 kaso yo accite, e kadi coggu ñaameteeji uytee. Ɓayti Gine alaa guwerneman gila kippu Bernard Gomu follaa e yontere saaliinde ndee. Ko ardiiɓe diina ɓee fuɗɗii yewtere hakkunde sinndikaaɓe ɓee e konunkooɓe ardiiɓe leydi ndii. Mbele ndee yewtere waɗaande hanki jibinan kawral hakkunde maɓɓe ? Ko Kajjatu Bah, ardiiɗo fedde Sinndikaare SLECG woni koɗo men hannde. Himo lamnde Ibrahiima Timmbi Bah.

Dental leyɗe hirnaange Afrik CEDEAO ɓamtii yagginanɗe ɗe nde fawunoo e hoore, Niijeer. Gila e udditugol keeri leydi ndin haa e gollidal e baŋŋe faggudu. Ɗee yannginanɗe ittaama. Ko saabii yo hooreeɓe leyɗe Afrik ɓamtu ɗe , ko newinngol guurɗam jamaa Niijeer e nder lewru korka. Haa hannde alaa ko konu Ñaamey haali caggal ittegol ɗee pawe yagginirɗe. E bi’ol Mammadu Albeer SIH hertorɗo dawro, hooreeɓe CEDEAO faamii wonnde ɗee yagginanɗe ko ɓiɓɓe Niijeer tan lorri. O hollii ngam heɓtugol darnde maggal, dental CEDEAO hino haani ɓeydude cemmbe mum e baŋŋe diplomaasi, wonndude e heblugol konu leyɗe ɗee. Himo jaaboo lamnde Ibrahiima Timmbi Bah.

Senegaal suɓngooji hooreyaaku leydi ndii hino waawa laataade ɗoo e lewru 6ɓuru. Ko ɗum holli Makki Sall, nantinɗon wonnde mannda makko on timman ñannde 2 lewru 4ɓuru. Kono oo hooreejo leydi anndinaali so tawii o immoto e laamu  ngun si oo mannda makko gasii. E bi’ol makko ɗum anndete caggal yewtere genndi waɗaynde altine e talata arooje . Ko nden yewtere ngenndi toɗɗi fof naɓete to suudu reenooru doosgal leydi ndin. Ngam taskagol ɗii konnguɗi makki ɗin, hiɗen jaɓɓii Elhaaj Seydu Nuuru JAH, taskoɗoo kabaaruuji. Himo jaaboo lamnde Ibrahiima Bah.

Gila altine feƴƴunde Gine jogaaki guwerneman. Ko koolaaɓe kuɓal jaagorɗe ɗee woni e gollude e innde guwerneman on. Jeneral Mamadi Dummbuya hooreejo laamu faddewu nguu hollaali ko saabi yo o ɓamu ngal pellital. Kono e yi’annde, Mammadu Sire JUM ardiiɗo fedde sosiyete siwil DPEG ko lurral taskaangal hakkunde jaagorɓe ɓee saabii yo oo kippu Bernard Gomou folle. Ko ɓeydii e ɗum ko ŋakkere kuɓɓam e kuuran wonndude tayugol internet e faale sinndikaaɓe dartingol golle... Mammadu Sire JUM no jaaboo lamnde Timbi BAH.

Hannde ko 21 lewru 2ɓuru. Ngal ko ñallal hertanaangal ɓamtaare ɗemɗe muy(s)naaɗe.  Ñallal hittungal sabu ɗemɗe ɗuuɗuɗe ko wonuɗe e laawol mulugol woni. E bi’ol UNESCO fedde adunaaru daraniinde jannde e needi. Faandaare ndee ko tabintingol jannde ɗemɗe muynaaɓe ɗee fof. Woodii wiɗtooji buy holliɗi wonnde janngugol e ɗemngal mum  hino jogii nafoore mawnde.Koɗo men hannde ko Jinnda Dem winndiyankeejo e ɗemngal Fulfulde. Himo jaaboo lamnde Ibrahiima Timmbi Bah.

Jonnde dental Afrik UA joofii e timmoode ndee yontere Addis -Abeba, laamorgo Ecopii.  Ko Mohammed Uld El-Ghazuwani,  hooreeɓe leyɗe Afrik ɗee suɓii ngam ardagol ndee fedde e ɗii lebbi 12 garooji. Oo hooreejo Moritani ardoto golle UA faatiiɗe hikka e baŋŋe jannde . E nder yewtere makko, Mohammed Uld El- Ghazuwani, hollii wonnde ko maa kisal e deenaagu tabintinee e nder leyɗe Afrik. Kisal non, ko toɓɓere nde oo hooreejo leydi joganii anndal. Ko ɗum Mahmud Kaan, diplomatjo Moritani, golloowo UA kiɗɗo holli e ndee yewtere amen. Himo jaaboo lamnde Ibrahiima Timmbi Bah.

Sengaal kawtital Sosiyete Siwil "Aar Sunnu Election", ɗum woni reenoowo suɓngooji meeɗen, renndinii yimɓe ujune Dakar e ndee aseweere. Faanddare ndee ko ƴamugol yo Makkil Immo e jullere laamu nden ñannde ɗiɗi lewru 4ɓuru. Hay so tawii hooreeɓe leydi ndii, jaɓii ngoo seppo waɗaa, ɓe accitii kadi kasanooɓe nanngaaɓe e alhaali politik ɗuuɗuɓe, "Aar Sunnu Election", no fiɓi wonnde dartintaa golle maɓɓe haa faale maɓɓe laatoo. Ɗen faale ko yo woote waɗe e nder Senegaal hakkunde 3 e 10 lewru 3ɓuru. Koɗo men hannde ko Dr Fatimata Lih Faal, gooto e ardiiɓe "Aar Sunnu Election". Himo jaaboo lamnde Ibrahiima Timmbi Bah.

Senegaal, suudu ñaawirdu reenooru doosngal leydi ndii riiwii pellital bugitorngal ñalaande woote ɗee yeeso. E nder yamiroore taariikayankoore, nduu suudu hollitii wonnde sariyaaji newnuɗi dirtingol ɗii suɓngooji hino lunndii dosngal leydi ndii. Ko ɗum saabii yo ɓee ñaawooɓe mawɓe yamir hooreeɓe Senegaal  laatingol ɗee woote ko ɓuri e yaawude. Ngam taskagol ndeeyamiroore nduu suudu ñaawooru, hiɗen jaɓɓii hannde Muhammadu Mustafaa Sih hertorɗo sariya. Ko kanko woni koɗo men hannde. Himo Jaaboo lamnde Ibrahiima Timmbi Bah.