ಲೇಖಕರು : ಸ್ಟೋರಿವೀವರ್ರಿಗಾಗಿ ಸಂಜೀವ್ ಜೈಸ್ವಾಲ್
ನಿರೂಪಕರು : ಬಸವರಾಜು ಟಿ.ಡಿ
ಸಂಪಾದಕರು : ಮನಿಷ್

ಕಾಡಿಗೆ ರಾಜನೇ ಆದರೂ ಸಿಂಹಕ್ಕೆ ಹಲ್ಲು ಉಜ್ಜುವುದು ತಪ್ಪಲಿಲ್ಲ. ಕಥೆ ಓದುವ ಮೂಲಕ ಸಿಂಹಕ್ಕೆ ಹಲ್ಲು ಉಜ್ಜುವುದನ್ನ ಹೇಳಿ ಕೊಟ್ಟವರು ಯಾರು ಹಾಗು ಏಕೆ ಎಂಬುದನ್ನ ತಿಳಿದುಕೊಳ್ಳಿ..

ಈ ಕಥೆಯ ಮೂಲಕ ಮಕ್ಕಳಲ್ಲಿ ಉತ್ತಮ ದೈನಂದಿನ ಅಭ್ಯಾಸಗಳನ್ನು ಮೂಡಿಸಬಹುದಲ್ಲದೇ ಮಾಂಸಾಹಾರಿ ಪ್ರಾಣಿಗಳು ಹಾಗೂ ಶಾಖಾಹಾರಿ ಪ್ರಾಣಿಗಳ ಬಗ್ಗೆ ತಿಳಿಸಬಹುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿಯ ಚಟುವಟಿಕೆಗಳು :

1. ಕಾಡಿನಲ್ಲಿ ವಾಸಿಸುವ ಹಾಗೂ ನಾಡಿನಲ್ಲಿ ವಾಸಿಸುವ ಪ್ರಾಣಿಗಳನ್ನು ಪಟ್ಟಿ ಮಾಡಲು ಹೇಳುವುದು.
2. ಹಲ್ಲಿನ ನೋವುಂಟಾಗಲು ಕಾರಣಗಳನ್ನು ಚರ್ಚಿಸಿ.
3. ಹಲ್ಲುಗಳ ಆರೋಗ್ಯವನ್ನು ಕಾಪಾಡಿಕೊಂಡು ಹೋಗಲು ನಿಮ್ಮ ಪೋಷಕರು ನಿಮಗೆ ನೀಡುವ ಸಲಹೆಗಳೇನು?
4. ನಿಮ್ಮ ಹಲ್ಲುಗಳನ್ನು ನೀವು ಆರೋಗ್ಯವಾಗಿ ಕಾಪಾಡಿಕೊಂಡು ಹೋಗಲು ಏನೆಲ್ಲಾ ಕ್ರಮಗಳನ್ನು ಅನುಸರಿಸುತ್ತೀರಿ.
5. ಮಕ್ಕಳ ದೈನಂದಿನ ಉತ್ತಮ ಅಭ್ಯಾಸಗಳ ಕುರಿತು ಚರ್ಚಿಸುವುದು.
6. ದೈನಂದಿನ ಉತ್ತಮ ಅಭ್ಯಾಸಗಳನ್ನು ರೂಢಿಸಿಕೊಳ್ಳದೇ ಹೋದರೆ ಆಗುವ ಪರಿಣಾಮಗಳೇನೆಂದು ಚರ್ಚಿಸುವುದು.
7. ಒಂದು ವೇಳೆ ಸಿಂಹದ ಸಹಾಯಕ್ಕೆ ಇಲಿ ಬಾರದೇ ಇದ್ದಿದ್ದರೆ ನಿರೀಕ್ಷಿಬಹುದಾದ ಪರಿಣಾಮಗಳೇನು?
8. ಕಥೆಯಲ್ಲಿನ ಸಿಂಹಕ್ಕೆ ನೀವು ನೀಡುವ ಸಲಹೆಗಳೇನು?
9. ಈ ಕಥೆಯಿಂದ ನೀವು ಏನನ್ನು ಕಲಿತಿರೀ?
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಶ್ರುತಿ ರಾವ್
ನಿರೂಪಕರು : ಬಸವರಾಜಪ್ಪ ಎನ್
ಸಂಪಾದಕರು : ಬಸವರಾಜಪ್ಪ ಎನ್

ಈ ಕೆಲಸ ಮಾಡಿದ್ದು ಯಾರು? ಅವನಿ ಮತ್ತು ಅವಳ ತಾಯಿಗೆ ಗೊತ್ತಿಲ್ಲ. ಬಟಾಣಿ ಗಿಡದ ಕಥೆಯನ್ನು ಓದಿದಾಗ ಈ ಕೆಲಸ ಮಾಡಿದ್ದು ಯಾರೆಂದು ನಿಮಗೆ ತಿಳಿಯುತ್ತದೆ.

ಈ ಕಥೆಯ ಮೂಲಕ ಮಕ್ಕಳಿಗೆ ಕಾಳು ಗಿಡವಾಗುವ ಪ್ರಕ್ರಿಯೆ, ಗಿಡದ ಬೆಳವಣಿಗೆ ಹಾಗೂ ಅದರ ಬೆಳವಣಿಗೆಗೆ ಅವಶ್ಯಕವಿರುವ ಅಂಶಗಳನ್ನು ಮಕ್ಕಳಿಗೆ ತಿಳಿಸಿಕೊಡಬಹುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿ ಚಟುವಟಿಕೆಗಳು.

1. ಮಕ್ಕಳಿಗೆ ಕಥೆಯನ್ನು ಅವರದ್ದೇ ಮಾತುಗಳಲ್ಲಿ ಹೇಳುವಂತೆ ತಿಳಿಸುವುದು.
2. ಕಥೆಯಲ್ಲಿ ಬಂದಂತಹ ಪಾತ್ರಗಳು ಯಾವುವೂ? ಆ ಪಾತ್ರಗಳಿಗಿದ್ದ ಹೆಸರುಗಳೇನು ಹಾಗೂ ಅದರಲ್ಲಿ ನಿಮಗಿಷ್ಟವಾದ ಪಾತ್ರ ಯಾವುದು? ಯಾಕೆ? ಎಂದೆಲ್ಲಾ ಮಕ್ಕಳೊಂದಿಗೆ ಚರ್ಚಿಸುವುದು.
3. ಬೀಜ ಮೊಳಕೆಯೊಡೆದು ಗಿಡವಾಗುವ ಕುರಿತು ಅಥವಾ ಯಾವುದಾದರೂ ಗಿಡವನ್ನು ಬೆಳೆಸಿರುವ ಅನುಭವವನ್ನು ಹಂಚಿಕೊಳ್ಳಲು ಅವಕಾಶ ನೀಡುವುದು.
4. ಭೂಮಿಯಲ್ಲಿ ಕಾಣಸಿಗುವ ಎರೆ ಹುಳು, ಅದರ ಕಾರ್ಯದ ಕುರಿತು ಗುಂಪಿನಲ್ಲಿ ಚರ್ಚಿಸಿ ಹೇಳುವಂತೆ ತಿಳಿಸುವುದು.
5. ಭೂಮಿಗೆ ಬಿದ್ದ ಬೀಜ ಮೊಳಕೆಯೊಡೆದು ಗಿಡವಾಗಿ ಮೇಲೆ ಬರಲು ಅದಕ್ಕೆ ಅವಶ್ಯಕತೆಯಿರುವ ಅಂಶಗಳಾವುವು ಎಂಬುದನ್ನ ಗುಂಪಿನಲ್ಲಿ ಚರ್ಚಿಸುವಂತೆ ಮಕ್ಕಳಿಗೆ ತಿಳಿಸುವುದು.
6. ಬೀಜ ಮೊಳಕೆಯೊಡೆದು ಗಿಡವಾಗುವ ನಡುವಿನ ವಿವಿಧ ಹಂತದ ಚಿತ್ರಗಳನ್ನು ಬರೆಯಿರಿ.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ವೆಂಕಟರಮಣ ಗೌಡ
ನಿರೂಪಕರು : ಶಿವ ಕುಮಾರ್
ಸಂಪಾದಕರು : ಸೌಮ್ಯ ಕೆ.ಆರ್

ಮೊಲ ಮತ್ತು ಆಮೆ ನಡುವೆ ಓಟದ ಪಂದ್ಯದ ಹಳೆಯ ಕಥೆ ನೆನಪಿದೆಯಾ? ಇದು ಅಂತಹುದೇ ಪಂದ್ಯದ ಹೊಸ ಕಥೆ. ಪೈಪೋಟಿಯಲ್ಲ, ಸಹಯೋಗದ ಸ್ಪರ್ಧೆ ಏನಾಯಿತೆಂದು ಮೊಲ ಮತ್ತು ಆಮೆ ಕತೆ ಓದಿ ತಿಳಿಯಿರಿ.

ಕಥೆಯ ಮೂಲಕ ಹೊಸ ಪದಗಳ ಪರಿಚಯ, ಸರಳ ವಾಕ್ಯಗಳ ರಚನೆ ಮತ್ತು ಪರಸ್ಪರ ಸಹಾಯ ಮಾಡಬೇಕೆಂಬ ನೀತಿಯನ್ನ ತಿಳಿಸಿಕೊಡಬಹುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿ ಚಟುವಟಿಕೆಗಳು.

1. ಕಥೆಯನ್ನು ತಮ್ಮದೇ ಮಾತುಗಳಲ್ಲಿ ಹೇಳುವಂತೆ ಮಕ್ಕಳಿಗೆ ತಿಳಿಸುವುದು.
2. ಪರಸ್ಪರ ಸಹಾಯದ ಕುರಿತಾಗಿ ಅನುಭವ ಹಂಚಿಕೊಳ್ಳಲು ಮಕ್ಕಳಿಗೆ ಅವಕಾಶ ಮಾಡಿಕೊಡುವುದು.
3. ಕಥೆಯನ್ನು ಇನ್ನಷ್ಟು ಸ್ವಾರಸ್ಯಕರವಾಗಿ ಕಟ್ಟುವಂತೆ ಗುಂಪು ಚಟುವಟಿಕೆ ನೀಡುವುದು.
4. ಮಕ್ಕಳ ಕಲ್ಪನೆಗೆ ಬಂದ ಯಾವುದಾದರೊಂದು ಸನ್ನಿವೇಷವನ್ನು ಚಿತ್ರ ಬಿಡಿಸುವಂತೆ ತಿಳಿಸುವುದು.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಚೆರ್ಲಿಲ್ ರಾವ್
ನಿರೂಪಕರು : ದಿನೇಶ್ ಎಲ್
ಸಂಪಾದಕರು : ದಿನೇಶ್ ಎಲ್

ಶಾಂತಿ ತುಂಬಾ ಚೂಟಿ. ಅವಳು ಸುಮ್ಮನೆ ಕುಳಿತದ್ದಾಗಲಿ, ಮಾತಾಡದೇ ಇದ್ದುದನ್ನಾಗಲೀ ಯಾರೂ ನೋಡಿರಲಿಲ್ಲ. ಆದರೆ ಒಂದು ದಿನ ಅವಳು ಇದ್ದಕ್ಕಿದ್ದಂತೆ ತನ್ನ ಸ್ನೇಹಿತರೊಂದಿಗೆ ಮಾತು ನಿಲ್ಲಿಸಿದ್ದಳು. ಶಾಂತಿಗೆ ಏನಾಗಿತ್ತು?

ಮಕ್ಕಳಿಗೆ ತಮ್ಮ ಅನುಭವಗಳನ್ನು ಹಂಚಿಕೊಳ್ಳಲು ಅವಕಾಶ ಮಾಡಿಕೊಡುವ ಮೂಲಕ ಮಾತನಾಡುವ ಕೌಶಲ್ಯವನ್ನು ಮೂಡಿಸುವುದು, ಕಥೆಗೆ ಸಂಭಂದಿಸಿದಂತೆ ಕೆಲವು ತರಗತಿ ಚಟುವಟಿಕೆಗಳು.

1. ಮಕ್ಕಳು ತಮ್ಮ ಸ್ನೇಹಿತರೊಡನೆ ಶಾಲೆಗೆ ಬರುವಾಗ ಮತ್ತು ಹೋಗುವಾಗಿನ ಅನುಭವಗಳನ್ನು ಹಂಚಿಕೊಳ್ಳಲು ತಿಳಿಸುವುದು.
2. ನಿಮ್ಮ ನೆಚ್ಚಿನ ಸ್ನೇಹಿತ ಬೇಸರದಲ್ಲಿದ್ದರೆ ನೀವು ಅವನಿಗೆ ಹೇಗೆ ಪ್ರತಿಕ್ರಿಯಿಸುತ್ತೀರಿ?
3. ಚಿಕ್ಕಂದಿನಲ್ಲಿ ನಿಮ್ಮ ಹಲ್ಲು ಉದುರಿದಾಗ ನಿಮ್ಮಲ್ಲುಂಟಾದ ಭಾವನೆ ಮತ್ತು ಅನುಭವವನ್ನು ಹಂಚಿಕೊಳ್ಳುವಂತೆ ತಿಳಿಸಿ.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಸೇಜಲ್ ಮೆಹ್ತ
ನಿರೂಪಕರು : ಪ್ರದೀಪ್
ಸಂಪಾದಕರು : 

ಕಾಡು ಇಷ್ಟು ಶುಚಿಯಾಗಿರುವುದು ಹೇಗೆ? ಕಾಡಲ್ಲಿ ಕಸವೇ ಕಾಣುವುದಿಲ್ಲ ಏಕೆ?
ಈ ಕಥೆಯ ಮೂಲಕ ಮಕ್ಕಳಿಗೆ ವಿವಿಧ ಪ್ರಾಣಿಗಳ ಪರಿಚಯ, ಅವುಗಳ ಗುಣಲಕ್ಷಣ ಮತ್ತು ಆಹಾರ ಚಕ್ರದ ಕುರಿತು ತಿಳಿಸಿಕೊಡಬಹುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿಯ ಚಟುವಟಿಕೆಗಳು. 

1. ಕಾಡಿನ ಪ್ರಾಣಿಗಳು ನಾಡಿನ ಪ್ರಾಣಿಗಳು ಹಾಗೂ ಅವುಗಳ ಆಹಾರವನ್ನು ಕುರಿತು ಗುಂಪಿನಲ್ಲಿ ಚರ್ಚಿಸುವುದು. 
2. ಕಾಡು ಹಾಗೂ ಕಾಡು ಪ್ರಾಣಿಗಳ ಗುಣಲಕ್ಷಣಗಳ ಬಗ್ಗೆ ಮಕ್ಕಳೊಂದಿಗೆ ಚರ್ಚಿಸುವುದು. 
3. ಕಾಡು ಸ್ವಚ್ಛ ಹಾಗೂ ಸುಂದರವಾಗಿರುವುದಕ್ಕೆ ಹೇಗೆ ಸಾಧ್ಯವಾಗುತ್ತದೆ ಎಂದು ಚರ್ಚಿಸುವುದು. 
4. ಆಹಾರಕ್ಕಾಗಿ ಒಂದು ಪ್ರಾಣಿ ಮತ್ತೊಂದು ಪ್ರಾಣಿಯನ್ನು ಅವಲಂಬಿಸಿರುವ ಆಹಾರ ಚಕ್ರದ ಕುರಿತು ಮಕ್ಕಳೊಂದಿಗೆ ಚರ್ಚಿಸುವುದು. 
5. ಒಂದು ಪ್ರಾಣಿ ತಿಂದು ಬಿಟ್ಟ ಆಹಾರವನ್ನು ಅವಲಂಬಿಸಿರುವ ಇತರ ಪ್ರಾಣಿಗಳ ಕುರಿತು ಚರ್ಚಿಸುವುದು.

ಲೇಖಕರು : ಸ್ಟೋರಿವೀವರ್ರಿಗಾಗಿ ಕುಜಾಲಿ ಮಣಿಕಾವೆಲ್
ನಿರೂಪಕರು : ಪ್ರಸಾದ್ ಕೆ.ವಿ
ಸಂಪಾದಕರು : ವೀರಭದ್ರಯ್ಯ ಎಂಬಿ

ಒಂದು ಜೀರುಂಡೆ ಇತ್ತು. ಅದಕ್ಕೆ ಎಣಿಸುವುದು ಎಂದರೆ ಬಹಳ ಇಷ್ಟ. ಅದಕ್ಕೆ ಸಮಸಂಖ್ಯೆ ಬೆಸಸಂಖ್ಯೆಗಳನ್ನು ಗುರುತಿಸುವುದು ಎಂದರೆ ಬಹಳ ಖುಷಿ. ಒಂದು ದಿನ ಜೀರುಂಡೆ ಬೆನ್ನ ಮೇಲೆ ಅಂಗಾತ ಉರುಳಿಕೊಂಡು ಬಿಟ್ಟಿತು. ಎಷ್ಟು ಜನ ಗೆಳೆಯರು ಜೀರುಂಡೆಗೆ ಸಹಾಯ ಮಾಡಲು ಬಂದರು? ಸಮಸಂಖ್ಯೆಯ ಗೆಳೆಯರಾ ಅಥವಾ ಬೆಸಸಂಖ್ಯೆಯ ಗೆಳೆಯರಾ?

ಮಕ್ಕಳಿಗೆ ಸರಿ ಸಂಖ್ಯೆಗಳು ಮತ್ತು ಬೆಸ ಸಂಖ್ಯೆಗಳ ನಡುವಿನ ವ್ಯತ್ಯಾಸಗಳನ್ನು ತಿಳಿಸಿಕೊಡುವುದರ ಜೊತೆಗೆ ಸರಳ ಅಂಕಿಗಳ ಸಂಕಲನವನ್ನು ಹೇಳಿಕೊಡಬಹುದು. ಕಥೆಗೆ ಸಂಭಂದಿಸಿದಂತೆ ಕೆಲವು ತರಗತಿ ಚಟಿವಟಿಕೆಗಳು.

1. ಮಕ್ಕಳು ಕಥೆಯನ್ನು ತಮ್ಮ ಸ್ವಂತ ವಾಕ್ಯದಲ್ಲಿ ಹೇಳುವಂತೆ ತಿಳಿಸುವುದು.
2. ಹಲವಾರು ಸಂಖ್ಯೆಗಳ ಸಮೂಹಗಳನ್ನು ನೀಡಿ ಸರಿ ಸಂಖ್ಯೆ ಮತ್ತು ಬೆಸ ಸಂಖ್ಯೆಗಳಾಗಿ ವಿಭಾಗಿಸುವಂತೆ ತಿಳಿಸುವುದು.
3. ಸರಿ+ಸರಿ=? ಸರಿ+ಬೆಸ=? ಬೆಸ+ಬೆಸ=? ಇಂತಹ ಸಂಖ್ಯೆಗಳನ್ನು ಕೂಡುವಂತೆ ತಿಳಿಸಿ ಬಂದಂತಹ ಉತ್ತರ ಸರಿ ಸಂಖ್ಯೆಯೋ ಅಥವಾ ಬೆಸ ಸಂಖ್ಯೆಯೋ ಎಂದು ತಿಳಿಸುವ ಚಟುವಟಿಕೆ ನೀಡುವುದು.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಕರಣ್ಜೀತ್ ಕೌರ್ 
ನಿರೂಪಕರು : ದಿನೇಶ್ ಮತ್ತು ರೇಷ್ಮ
ಸಂಪಾದಕರು : ದಿನೇಶ್ ಎಲ್

ಕಸದ ರಾಶಿಯ ಮೋಡ ಚೀಕುವಿನ ತಲೆಯ ಮೇಲೆ ತೇಲುತ್ತಿದೆ. ಇದು ಅವಳನ್ನು ಜಗತ್ತಿನ ಅತಿ ದುಃಖಿತ ಹುಡುಗಿಯನ್ನಾಗಿ ಮಾಡಿದೆ. ಆ ಕಸದ ರಾಶಿ ಚೀಕುವಿನ ತಲೆ ಮೇಲೆ ಏಕೆ ತೇಲುತ್ತಿದೆ ಅದರಿಂದ ಚೀಕು ಹೇಗೆ ಮುಕ್ತಗೊಂಡಳು ಎಂಬುದನ್ನ ತಿಳಿಯಿರಿ.

ಮಕ್ಕಳಿಗೆ ಸ್ವಚ್ಛತೆ ಹಾಗೂ ಆರೋಗ್ಯದ ಬಗ್ಗೆ ಅರಿವು ಮೂಡಿಸಿ ತಮ್ಮ ಸುತ್ತಲೂ ಸದಾ ಸ್ವಚ್ಛತೆಯನ್ನು ಕಾಪಾಡಿಕೊಂಡು ಹೋಗುವಂತೆ ಪ್ರೇರೇಪಿಸಬಹುದು ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿಯ ಚಟುವಟಿಕೆಗಳು :

1. ಕಥೆ ಕೇಳುವ ಮುನ್ನ ಕಸದ ಕುರಿತು ಮಕ್ಕಳು ಗಮನಿಸಿರುವ ಅಂಶಗಳ ಬಗ್ಗೆ ಚರ್ಚಿಸುವುದು - ಎಲ್ಲೆಲ್ಲಿ ಕಾಣುತ್ತದೆ, ಕಸ ವಿಲೇವರಿಯಲ್ಲಿ ಒಳ್ಳೆಯ ಮತ್ತು ಕೆಟ್ಟ ಅಭ್ಯಾಸಗಳೇನಿರಬಹುದು, ಮುಂತಾದವು.
2. ಕಥೆಯ ಮಧ್ಯದಲ್ಲಿ ನಿಲ್ಲಿಸಿ, ಅವರಿಗೂ ಚೀಕುವಿನ ಪರಿಸ್ತಿಥಿ ಬಂದಿದ್ದರೆ ಏನು ಮಾಡುತ್ತಿದ್ದರು ಎಂದು ಗುಂಪು ಚರ್ಚೆ ಮಾಡುವುದು.
3. ಮಕ್ಕಳಿಗೆ ಗೊತ್ತಿರುವ ಬೇರಾವುದಾದರೂ ಕೆಟ್ಟ ಅಭ್ಯಾಸವನ್ನು ಮತ್ತು ಚೇಕುವಿನ ಕಥೆಯನ್ನು ಆಧಾರವಾಗಿಟ್ಟುಕೊಂಡು ತಮ್ಮದೇ ಆದ ಒಂದು ಕಥೆಯನ್ನು ರಚಿಸಲು ಹೇಳುವುದು.
4. ಮಕ್ಕಳು ತಮ್ಮ ಮನೆಯಲ್ಲಿ ಕಸವನ್ನು ಕುರಿತು ಹೇಗೆ ಸ್ವಚತೆಯನ್ನು ಕಾಪಾಡಿಕೊಳ್ಳುತ್ತಾರೆ ಎಂದು ಚರ್ಚೆಮಾಡುವುದು.
5. ನಮ್ಮ ದಿನಚರಿಯಲ್ಲಿ ನಾವು ಉತ್ಪಾದಿಸುವ ಕಸದ ಪ್ರಮಾಣವನ್ನು ಕಡಿಮೆ ಮಾಡಲು ನಾವು ಮಾಡಬಹುದಾದ ಕೆಲವು ಮಾರ್ಗಗಳನ್ನು ಯೋಚಿಸಬಹುದು?
6. ನಮ್ಮ ಸುತ್ತಮುತ್ತಲನ್ನು ಸ್ವಚ್ಛವಾಗಿಡುವುದು ಏಕೆ ಮುಖ್ಯವೆಂದು ತೋರುತ್ತದೆ? ನಾವು ಅದನ್ನು ಮಾಡಿದರೆ ಏನಾಗಬಹುದು?
7. ಕಥೆಯ ವೇಳೆ ಹುಡುಗಿಯ ಭಾವನೆಗಳು ಕಸದ ಮೋಡದ ಬಗ್ಗೆ ಹೇಗೆ ಬದಲಾಗುತ್ತವೆ? 
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಕಿರಣ್ ಕಸ್ತೂರಿಯಾ
ನಿರೂಪಕರು : ಮಂಗಳ ಗೌರಿ
ಸಂಪಾದಕರು : ದಿನೇಶ್ ಎಲ್

ಮನುಗೆ ಅಪ್ಪ, ಅಮ್ಮ ಮಳೆಗಾಲದ ಹೊಸ ಮೇಲಂಗಿ ಕೊಡಿಸಿದ್ದಾರೆ. ಅದನ್ನು ಹಾಕಿಕೊಳಲು ಮನುಗೆ ಆತುರವೊ ಆತುರ. ಆದರೆ ಮಳೆ ಬರದೆ ಸತಾಯಿಸುತ್ತಿದೆ. ಅವನೀಗ ಮಳೆಗಾಗಿ ಕಾದು ಕುಳಿತಿದ್ದಾನೆ.

ಮಕ್ಕಳಿಗೆ ವಿವಿಧ ಕಾಲಮಾನಗಳು ಹಾಗೂ ಅದರ ಲಕ್ಷಣಗಳ ಕುರಿತು ತಿಳಿಸಬಹುದಲ್ಲದೇ ಕಾಲಮಾನಕ್ಕೆ ತಕ್ಕಂತೆ ಅನುಸರಿಸಬೇಕಾದ ಆರೋಗ್ಯ ಕ್ರಮಗಳ ಬಗ್ಗೆ ತಿಳಿಸಿಕೊಡುವುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿ ಚಟುವಟಿಕೆಗಳು.

1. ಮಕ್ಕಳಿಗೆ ತಿಳಿದಿರುವ ಕಾಲಮಾನಗಳ ಕುರಿತು ಚರ್ಚಿಸುವುದು.
2. ಮಕ್ಕಳಿಗೆ ಇಷ್ಟವಾದ ಕಾಲ ಯಾವುದು ಮತ್ತು ಏಕೆ ಎಂದು ಮಾತನಾಡಲು ಅವಕಾಶ ನೀಡುವುದು.
3. ವಿವಿಧ ಕಾಲಗಳ ಗುಣಲಕ್ಷಣಗಳನ್ನು ಗುಂಪಿನಲ್ಲಿ ಚರ್ಚಿಸುವುದು.
4. ಮಳೆ ಬರುವ ಮುನ್ಸೂಚನೆಗಳನ್ನು ಚರ್ಚಿಸುವುದು.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ವೆಂಕಟರಮಣ ಗೌಡ
ನಿರೂಪಕರು : ಬಸವರಾಜು ಟಿ.ಡಿ
ಸಂಪಾದಕರು : ಸಿದ್ದರಾಮೇಶ್ವರ

ಮುಳ್ಳುಹಿಂಡಿನಲ್ಲಿ ಬಿದ್ದ ಹಣ್ಣು ಎತ್ತಿಕೊಳ್ಳಲು ಏನೇನೋ ಸಾಹಸ ಮಾಡಿದ ಗುಬ್ಬಿಗೆ ಕೊನೆಯಲ್ಲಿ ಏನಾಯಿತು? “ಗುಬ್ಬಿ ಮತ್ತು ಹಣ್ಣು” ಪ್ರಕೃತಿ ನ್ಯಾಯದ ನಿಯಮ ಬಿಚ್ಚಿಡುವ ಕಥೆ.

ಈ ಕಥೆಯ ಮೂಲಕ ಮಕ್ಕಳಿಗೆ ವಾಕ್ಯಗಳನ್ನು ಸಂಯೋಜಿಸಿ ಕಥೆಯನ್ನು ರಚಿಸುವ ಕೌಶಲ್ಯವನ್ನು ತಿಳಿಸಿಕೊಡಬಹುದು. ಇಟ್ಟ ಗುರಿಯನ್ನು ಮೆಟ್ಟಿ ನಿಲ್ಲುವವರೆಗೂ ನಿಲ್ಲಬಾರದೆಂಬ ನೀತಿಯನ್ನ ಹಾಗೂ ನಮ್ಮ ಕಾರ್ಯಕ್ಕಾಗಿ ಇನ್ನೊಬ್ಬರನ್ನ ಬಲವಂತವಾಗಿ ಬಳಸಿಕೊಳ್ಳಬಾರದೆಂಬ ನೀತಿಯನ್ನ ಮಕ್ಕಳಿಗೆ ಮನದಟ್ಟು ಮಾಡಿಕೊಡುವುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿಯ ಚಟುವಟಿಕೆಗಳು :

1. ವಿವಿಧ ವೃತ್ತಿಗಳ ಕುರಿತಾಗಿ ಚರ್ಚಿಸಬಹುದು.
2. ವಿವಿಧ ಪ್ರಾಣಿಗಳು ಹಾಗೂ ಅವುಗಳ ಆಹಾರ ಚಕ್ರದ ಕುರಿತಾಗಿಯೂ ಚರ್ಚಿಸಬಹುದು.
3. ಒಂದು ವೇಳೆ ನೀನು ಗಬ್ಬಿಯ ಸ್ನೇಹಿತನಾಗಿದ್ದರೆ ಅದರ ಹಣ್ಣನ್ನು ಹಿಂದಿರುಗಿಸಿದ ನಂತರ ಗುಬ್ಬಿಗೆ ಏನು ಸಲಹೆ ನೀಡುತ್ತಿದ್ದೆ.
4. ಗಬ್ಬಿಯು ತನಗೆ ಸಹಾಯ ಮಾಡದವರಿಗೆ ಕೇಡು ಬಯಸಿದ ಕುರಿತು ನಿಮ್ಮ ಅಭಿಪ್ರಾಯವೇನು?
5. ಗುಬ್ಬಿ ಸಹಾಯ ಕೇಳಿದವರಲ್ಲಿ ನೀವು ಕೂಡ ಒಬ್ಬರಾಗಿದ್ದರೆ ನೀವು ಏನು ಮಾಡುತ್ತಿದ್ದಿರಿ ಹಾಗೂ ಆಗ ನಿಮಗೆ ಹೇಗನಿಸುತ್ತಿತ್ತು?
6. ಗುಬ್ಬಿಯು ತನಗೆ ಸಹಾಯ ಮಾಡುವಂತೆ ಬೇರೆಯವರನ್ನು ಕೇಳುತ್ತಿದ್ದ ರೀತಿ ಹೇಗಿತ್ತು ಹಾಗೂ ಅದರ ಕುರಿತು ನಿಮ್ಮ ಅಭಿಪ್ರಾಯವೇನು?
7. ಈ ಕಥೆಗೆ ಸಂಬಂಧಿಸಿದಂತೆ ಮಕ್ಕಳ ನೈಜ ಜೀವನದಲ್ಲಿ ನಡೆದಿರುವ ಕೆಲವು ಘಟನೆಗಳನ್ನು ತರಗತಿಯಲ್ಲಿ ಸ್ನೇಹಿತರೊಂದಿಗೆ ಚರ್ಚಿಸಲು ತಿಳಿಸುವುದು.
    

ಲೇಖಕರು : ಸ್ಟೋರಿವೀವರ್ರಿಗಾಗಿ ಮಾಲಾ ಕುಮಾರ್, ಮನಿಶಾ ಚೌಧರಿ 
ನಿರೂಪಕರು : ಪ್ರದೀಪ್
ಸಂಪಾದಕರು : ಬಾಲಾಜಿ

ಇಂಪಾದ ಕಜರಿ ಆಲಿಸುವುದರಿಂದ ಹಿಡಿದು, ಪುಟಾಣಿ ಜಲಪಾತಗಳನ್ನು ವೀಕ್ಷಿಸುವವರೆಗೆ ಹಾಗೂ ಮಣ್ಣಿನ ಸುವಾಸನೆಯಿಂದ ಹಿಡಿದು, ಅಮ್ಮನ ಪಕೋಡದ ಪರಿಮಳದವರೆಗೆ, ಮಳೆಗಾಲದ ಪ್ರತಿಯೊಂದು ಸಣ್ಣ ಪುಟ್ಟ ಸಂಗತಿಗಳನ್ನು ಕೂಡ ಮೀನು ಪ್ರೀತಿಸುತ್ತಾಳೆ.

ಈ ಕಥೆಯ ಮೂಲಕ ಮಕ್ಕಳಿಗೆ ಮಳೆಗಾಲದ ಗುಣಲಕ್ಷಣಗಳು, ಮಳೆನೀರು ಶೇಖರಣೆ ಕುರಿತು ತಿಳಿಸಿಕೊಡಬಹುದಲ್ಲದೇ ಮಕ್ಕಳಿಗೆ ಅನುಭವ ಹಂಚಿಕೊಳ್ಳಲು ತಿಳಿಸುವ ಮೂಲಕ ಮಾತನಾಡುವ ಕೌಶಲ್ಯವನ್ನು ಮೂಡಿಸುವುದು. ಕಥೆಗೆ ಸಂಬಂಧಿಸಿದಂತೆ ಕೆಲವು ತರಗತಿ ಚಟುವಟಿಕೆಗಳು.

1. ಮಕ್ಕಳಿಗೆ ತಿಳಿದಿರುವ ಕಾಲಗಳನ್ನು ಪಟ್ಟಿ ಮಾಡುವುದು.
2. ಮಳೆಗಾಲದ ಗುಣಲಕ್ಷಣಗಳನ್ನು ಚರ್ಚಿಸುವುದು.
3. ಮಳೆಗಾಲದಲ್ಲಿ ಮಕ್ಕಳಿಗೆ ಇಷ್ಟವಾಗುವ ತಿಂಡಿ ತಿನಿಸುಗಳ ಬಗ್ಗೆ ಮಾತನಾಡಲು ಅವಕಾಶ ಮಾಡಿಕೊಡುವುದು.
4. ಮಳೆ ನೀರನ್ನು ಶೇಖರಣೆ ಮಾಡುವ ತಂತ್ರಗಳನ್ನು ತಂಡದಲ್ಲಿ ಚರ್ಚಿಸುವಂತೆ ತಿಳಿಸುವುದು.
5. ಮಳೆಗಾಲದಲ್ಲಿ ಅನುಸರಿಸಬೇಕಾದ ಅರೋಗ್ಯ ಕ್ರಮಗಳನ್ನು ಚರ್ಚಿಸುವುದು.