Fjármálaráðherra segir að svo virðist sem sum fyrirtæki í ríkiseigu hafi ekki tekið tillit til tilmæla ráðuneytisins um hóflega launastefnu.

Tæplega 100 börn hafa látist í Kongó vegna ebólu-smits frá því að faraldur braust út í landinu í ágúst í fyrra. Faraldurinn er nú orðinn næstskæðasti ebólufaraldur sögunnar.

Janúarumferð á höfuðborgarsvæðinu hefur aldrei verið meiri en í ár. Þetta sýna mælingar Vegagerðarinnar.

Í nýjustu mánaðarskýrslu Íbúðalánasjóðs um ástandið á húsnæðismarkaði kemur fram að leiguverð hafi í fyrra hækkað meira en íbúðaverð og laun miðað við árið áður. Það hefur ekki gerst frá því 2013. Arnar Páll Hauksson ræðir við Unu Jónsdóttur hjá Íbúðalánasjóði.

Theresa May forsætisráðherra Breta ávarpaði þingið í dag til að tilkynna hver staðan í Brexit-viðræðunum væri. Þó May nefndi ýmsa fundi er staðreyndin sú að hún hefur engu áorkað um að breyta útgöngusamningnum við Evrópusambandið. Sigrún Davíðsdóttir ræðir Brexit-horfur og breska pólitík.

Tugir hvítabjarna halda litlu bæjarfélagi í rússneska eyjaklasanum Novaja Semlja í Norður-Íshafi í heljargreipum. Dýravistfræðingur á Náttúrufræðistofnun telur líklegra að íbúar verði fluttir á brott en að birnirnir verði skotnir. Arnhildur Hálfdánardóttir ræðir við Guðmund A. Guðmundsson, dýravistfræðing.

Umsjón: Arnhildur Hálfdánardóttir