Lestin

Í Lestinni í dag verður meðal annars hugað að nýju sjónvarpsefni, láglaunastörfum og umdeildri auglýsingamynd.

BBC America hefur staðið sig vel í framleiðslu á efni þar sem konur eru fremstar í flokki bæði fyrir framan og aftan myndavélina. Nýjasta afurð þeirra Killing Eve er engin undantekning. Áslaug Torfadóttir skellir sér í njósnagírinn og fjallar um Killing Eve í þætti dagsins. Við tökum umfjöllun hennar síðan aðeins lengra að þessu sinni og rýnum nánar í þættina með Árna Sigurðssyni, sérlegum aðdáanda. Í pistli dagsins fjallar Halldór Armand Ásgeirsson um bullstörf og af hverju verðmætustu störfin eru verst borguð. "Við erum tilbúnir fyrir Rússland," lýsti Knattspyrnasamband Íslands yfir á Facebook um helgina. Færslunni fylgir litrík mynd í anda teiknimyndasagna. Moskva brennur í bakgrunni og fyrir framan eru ellefu vöðvastæltir og ofurmannlegir líkamar íslenska karlalandsliðsins tilbúnir til árásar, með skildi og spennta vöðva. Í Lestinni í dag rýnum við í umdeilda auglýsingamynd KSÍ fyrir heimsmeistaramótið í Rússlandi sem hefst í næstu viku.

„Mennirnir elskuðu náttúruna svo mikið að þeir gleyptu hana í sig, eyddu henni algjörlega.“ Það er þessi ást, þessi tengsl manns og náttúru, sem er meginumfjöllunarefni dansverksins The Lover eftir Báru Sigfúsdóttur sem verður sýnt á Íslandi á Listahátíð í Reykjavík í vikunni. Bára er búsett og starfar í danshöfuðborg Evrópu, Brussel í Belgíu. Þar var The Lover frumsýnt árið 2015, síðan þá hefur það ferðast víðsvegar um Evrópu og er nú loksins sýnt á Íslandi. Bára tekur sér far með Lestinni í dag.

Breska djasshljómsveitin Sons of Kemet gaf á dögunum út plötuna Your Queen is a Reptile eða Drottning yðar er skriðdýr. Platan kemur ekki út í tilefni að konunglegu brúðkaupi Harry og Meghan heldur er það hárbeitt ádeila gegn bresku konungsstjórninni. Tómas Ævar Ólafsson veltir fyrir sér drottningum og skriðdýrum í þætti dags

Everyday Africa er Instagram síða sem virðist vera hafa umbyltandi áhrif á ímynd Vestur-landabúa á Afríku. Everyday Africa samanstendur af ljósmyndurum sem koma víðs vegar að í álfunni og taka myndir af hversdagslífi í ríkjum álfunnar. Stofnendur síðunnar, ljósmyndarinn Peter DiCampo, og blaðamaðurinn Austin Merrill, hyggjast sýna Afríku í nýju ljósi, sýna Afríku í því ljósi sem fréttamiðlar gera ekki, og geta ekki. Á Instagram síðunni, sem þrjúhundruð fjörtíu og fimm þúsund fylgjendur skoða, eru nú að finna hátt í fjögur þúsund myndir.

Lestin verður með óhefðbundnu sniði í dag í tilefni að Listahátíð Reykjavíkur sem hefst í dag. Þátturinn verður sendur út frá Klúbbi Listahátíðar sem staðsettur er í Hafnarhúsinu og þangað koma góðir gestir og ræða saman um og út frá þema hátíðarinnar, en í ár er þemað “heima.“

Hvenær erum við heima og hvað þýðir það að eiga heimili? Hvar á listin heima, og hvað gerist þegar hún færir sig út fyrir hið hefðbundna rými sitt?

Gestir þáttarins verða Terry Gunnell, Ásrún Magnúsdóttir, Garðar Eyjólfsson, Guja Dögg Hauksdóttir, Valgeir Sigurðsson, Steinunn Knútsdóttir, Heiðar Kári Rannversson og Markús Þór Andrésson.

Í Lestinni í dag verður meðal annars hugað að húðflúrum, rappi, svikahröppum og myndlist. The Icelandic Tattoo Convention - árlega húðflúrshátíðin verður haldin 13 árið í röð núna um helgina í Gamla Bíói. Skipuleggjendur hátíðarinnar eru jafnframt eigendur húðflúrstofunnar Reykjavík Ink við Frakkarstíg. Við heimsækjum stofuna og ræðum við Lindu Mjöll Hafþórsdóttur og Össur Hafþórsson. Við rifjum upp plötu, sem er oft sögð besta plata rappsögunnar. Þetta er Reachin' (A New Refutation of Time and Space) með djassrappsveitinni Digable Planets. Davíð Roach Gunnarsson segir frá. Anna Delvey er einskonar Frank Abagnale sinnar kynslóðar, en hún smyglaði sér í innstu raðir ríka og fræga fólksins í New York og náði hátt í 60 milljónum dala út úr bönkunum á fölskum forsendum. Hún situr nú í gæsluvarðhaldi í Rikers fangelsinu og bíður dóms. Nina Richter fjallar um málið í þætti dagsins. Skil og endurvarp nefnist einkasýning þýska myndlistarmannsins Ignacio Uriarte sem opnar í i8 í dag. Ignacio byrjaði að pára á pappírsarkir þegar hann vann í hefðbundinni skrifstofuvinnu, og verkin á sýningunni eru framhald af þessu dútli. Lestin heimsækir gallerí i8 og ræðir við Þorlák Einarsson um sýninguna.

Svartmálmur er ný ljósmyndabók eftir Hafstein Viðar Ársælsson, en þar skrásetur hann hina öflugu íslensku svartmálmssenu með öllum sínum drunga og djöfulgangi. Sýning með myndum úr bókinni opnar á morgun í Ljósmyndasafni Reykjavíkur, Lestin renndi við á safninu og ræddi við Hafstein. Karl Ólafur Hallbjörnsson veltir fyrir sér pólitískri sannfæringu rökræðulýðræði í pistli sínum í dag. Tónlistarkonan og plötusnúðurinn Coucou Chloé hefur vakið mikla athygli undanfarið fyrir sína tilraunakenndu klúbbatónlist en meðal aðdáenda eru Rihanna og Björk Guðmundsdóttir. Við náðum tali af Chloé í Lundúnum en hún er nýkominn úr tónleikaferðalagi um Asíu. Í síðustu viku opnaði Google Arts and Culture, rafrænt listasafn tæknirisans, sína stærstu vefsýningu til þessa. Tæknirisinn Google opnaði í síðustu viku stafræna yfirlitssýningu á lífi og verkum mexíkósku listakonunnar Fridu Kahlo. Þar geta vefgestir skyggnst inn í heimili listakonunnar og virt fyrir sér verk hennar í návígi. Við skoðum sýninguna, og Khalo, nánar í þætti dagsins. Rifjum einnig upp brot úr viðtali við listakonuna Jóní Jónsdóttur.

Lestin kíkir við á síðasta listaverkauppboði vetrarins í Gallerí Fold. Þar eru meðal annars boðin upp verk eftir Jóhannes Kjarval, Svavar Guðnason og Börböru Árnason en auk þess eru uppstoppuð Snæugla, Bjarnarhaus og fleiri sérstakir munir slegnir hæstbjóðanda. Rætt verður við uppboðshaldara, starfsfólk og gesti uppboðsins. Tómas Ævar Ólafssson kíkti á Kjarvalsstaði og skoðaði útskriftarsýningu bakkalárnema í arkitektúr, hönnun og myndlist. Í horni safnsins á bak við rauð gluggatjöld má þar sjá sjónræna plötnu I Thought I'd Be More Famous By Now, eða Það stóð til að vera orðin frægari núna, eftir listamanninn Katrínu Helgu Andrésdóttur sem gengur undir listamannanafninu Special K. Tómas ræðir við listakonuna í þætti dagsins. Halldór Armand Ásgeirsson fjallar um hættulega drauma og úrslitaleikinn í meistaradeild Evrópu í þriðjudagspistli sínum.

Í Lestinni í dag kíkjum við á nýja indí-poppsenu sem hefur verið að gerjast í reykvísku tónlistargrasrótinni undanfarna mánuði. Gunnar Theódór Eggertsson rýnir í nýja íslenska kvikmynd, Kona fer í stríð eftir Benedikt Erlingsson. Vorhefti Skírnis - tímarits Hins íslenka bókmenntafélags er komið út. Efni heftisins er fjölbreytt, meðal annars hugvekja Erlu Huldu Halldórsdóttur um Bríeti Bjarnhéðinsdóttur og skó Jóns Sigurðssonar. Þar veltir hún fyrir sér hvort kona gæti, eða hefði getað, orðið þjóðhetja. Erla Hulda Halldórsdóttir verður gestur Lestarinnar í dag. Að vanda rýnir Áslaug Torfadóttir síðan í nýja sjónvarpsþætti í mánudagspistli sínum.

Í Lestinni í dag verður meðal annars hugað að leiðsögutækjum, kvikmyndum og tónlist. GPS leiðsögutæki eru farin að spila stórt hlutverk í lífi okkar í dag, þau hjálpa okkur að þekkja staðsetningu okkar í heiminum, finna leiðir, rata aftur heim. Rannsóknir hafa sýnt að manneskjan þarf þá í minni mæli að nota meðfæddan leiðsögubúnað heilans. Getur verið að GPS tæknin muni hafa áhrif á heila mannsins í framtíðinni? Lestin rýnir í sögu þessa merkilega tæknifyrirbæris og ræðir við sérfræðinga um áhrif þess á heilann. Lestin rennir svo við hjá Halldóri Eldjárn, forritara og tónlistarmanni, sem leggur nú lokahönd á tónverkið GPS Reykjavík ásamt Úlfi Eldjárn. Verkið verður frumflutt á Listahátíð í Reykjavík í júní. En tónlistin í verkinu er tengd við ákveðin GPS-hnit í miðbænum og breytist eftir því hvar hlustendur eru staddir og hvert þeir rölta. Gunnar Theódór Eggertsson rýnir í kvikmyndirnar A Gentle Creature og Annihilation. Rokksveitin Singapore Sling hefur í hátt í tvo áratugi gefið frá sér tónlist sem gleypir ljós og fagnar úrkynjun, örvæntingu og dauða. Sveitin leikur á sínum fyrstu tónleikum í langan tíma á Húrra um helgina og Davíð Roach Gunnarsson rýnir í höfundarverk þeirra í vegferð dagsins.

Í Lestinni í dag verður meðal annars hugað að grasrótarmenningu, eplum, twitter fári og vinsælum ferðmannastöðum. „Ungt fólk í Póllandi er mjög meðvitað um rými listarinnar sem mikilvægan vettvang til að spyrna gegn ríkjandi viðhorfum, þau nota listina ekki síður en fjölmiðla eða hefðbundin stjórnmál.“ Þetta segir pólski listamaðurinn og listrýnirinn Hubert Gromny sem er búsettur hér á landi, og hélt í vikunni fyrirlestur um pólska grasrótarmenningu á Loft Hostel. Við ræðum við Hubert um pólska grasrót og list-aktívisma. Þær Magnea Björk Valdimarsdóttir og Marta Sigríður Pétursdóttir frumsýndu heimildarmynd sína Kanarí á Skjaldborg síðustu helgi. Í myndinni skoða þær íslenskt samfélag á spænsku eynni Kanarí og hvernig það hefur þróast á síðustu áratugum. Velt er upp spurningum eins og: Hvað þýðir það eiginlega að vera túristi? Við heyrum nánar um myndina hér á eftir. Karl Ólafur Hallbjörnsson fjallar í pistli sínum í dag um samband altaka, einstaka og tiltaka. Nýlega lauk fimmtu þáttaröð af gamanþáttunum Brooklyn 99 og allt leit út fyrir að hún yrði sú síðasta. En ótrúleg atburðarás varð til þess að þeim hefur verið bjargað, við mikinn fögnuð aðdáenda. Áslaug Torfadóttir skoðaði málið í þætti dagsins.